ព័ត៌មានអន្ដរជាតិ

អ៊ីស្រាអែលកំពុងធ្វើឲ្យអឺរ៉ុបនិងសហរដ្ឋអាមេរិកបែកបាក់គ្នាដ៏ជូរចត់

បានផុស

២ ខែ មុន

នៅ

ថ្ងៃអង្គារ ១៦ កញ្ញា ២០២៥

ដោយ

រាប់ទសវត្សរ៍មកហើយជាពិសេសចាប់តាំងពីការបញ្ចប់សង្គ្រាមលោកលើកទី២មក គេតែងដឹងថា សហរដ្ឋអាមេរិក និងមហាអំណាចនៅអឺរ៉ុប ឬថា សហភាពអឺរ៉ុបទាំងមូល មានភាពល្អូកល្អើន ជួយគ្នាទៅវិញទៅមក ដើម្បីប្រយុទ្ធប្រឆាំងនឹងអំពើទាំងឡាយដែលសម្ព័ន្ធមិត្តរបស់ខ្លួនយល់ថា មិនត្រឹមត្រូវ ប៉ុន្តែចំណងមិត្តភាពនិងភាពជាដៃគូយូរអង្វែងរបស់ពួកគេបង្ហាញការបែកបាក់ក្នុងជំហរដាច់ខាតរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ (Benjamin Netanyahu)។

រដ្ឋមន្ត្រីការបរទេសសហរដ្ឋអាមេរិកលោក ម៉ាកូ រ៉ូប៊ីអូ និង នាយករដ្ឋមន្ត្រីអ៊ីស្រាអែល បេចាមីន ណេតាន់ញ៉ាហ៊ូ។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណាក់កាលចុងក្រោយ គោលជំហររបស់សហរដ្ឋអាមេរិក និងអឺរ៉ុបបានដើរផ្ទុយគ្នាយ៉ាងច្រើនលើបញ្ហាជម្លោះអ៊ីស្រាអែលនិងក្រុមហាម៉ាសប៉ាឡេស្ទីននៅមជ្ឈិមបូព៌ា។ បញ្ហានៅត្រង់ថា រដ្ឋាភិបាលអ៊ីស្រាអែលដឹកនាំដោយនាយករដ្ឋមន្ត្រី បេនចាមីន ណេតាន់ញ៉ាហ៊ូ (Benjamin Netanyahu) មិនបានអើពើចំពោះការអំពាវនាវរបស់សហគមន៍អន្តរជាតិឡើយ។

ក្នុងជម្លោះរវាងអ៊ីស្រាអែលនិងក្រុមហាម៉ាសប៉ាឡេស្ទីនដែលឈានដល់ខួប២ឆ្នាំនៅថ្ងៃទី៧ខែតុលា២០២៥ ខាងមុខនេះ អ៊ីស្រាអែលបានវាយកម្ទេចតំបន់ហ្គាហ្សា និងបានពង្រីកការវាយប្រហារដល់ប្រទេសជិតខាងមួយចំនួនក្នុងតំបន់ ដូចជាលីបង់និងស៊ីរី ព្រមទាំងទៅកាន់ប្រទេសឆ្ងាយៗពីព្រំដែនរបស់ខ្លួន ដូចជា អ៊ីរ៉ង់ យេម៉ែន និង ចុងក្រោយនេះ គឺប្រទេសកាតា ក្រោមហេតុផលថា «តាមកម្ទេចក្រុមមេដឹកនាំហាម៉ាស»។

ការវាយប្រហារលើប្រទេសកាតាកាលពីថ្ងៃទី៩ខែកញ្ញាកន្លងទៅនេះ ដែលបារាជ័យក្នុងការសម្លាប់មេដឹកនាំជាន់ខ្ពស់ក្រុមហាម៉ាស លោក Khalil al-Hayya អនុប្រធានការិយាល័យនយោបាយក្រុមហាម៉ាស បានធ្វើឲ្យអ៊ីស្រាអែលដឹងខ្លួនឯងយ៉ាងច្បាស់ថា «ខ្លួនកាន់តែឯកោ» បន្ទាប់ពីមេដឹកនាំរដ្ឋអារ៉ាប់បានបង្ហាញសញ្ញារួបរួមគ្នា និងថ្កោលទោសអ៊ីស្រាអែលចំពោះការវាយប្រហារប្រទេសកាតាដែលមានអធិបតេយ្យភាពពេញលេញ។

ក្នុងជម្លោះនៅតំបន់ហ្គាហ្សានេះ សហរដ្ឋអាមេរិកបានបង្ហាញសញ្ញាគាំទ្រអ៊ីស្រាអែលមិនងាករ៉េ ទោះស្ថិតក្រោមសម្ពាធការទូតអន្តរជាតិថ្កោលទោសអ៊ីស្រាអែលស្រោចដូចភ្លៀងទាមទារឲ្យអ៊ីស្រាអែលបញ្ចប់សង្គ្រាមនេះយ៉ាងណាក្តី ប៉ុន្តែប្រទេសសំខាន់ៗនៅតំបន់អឺរ៉ុបបានងាកចេញពីអ៊ីស្រាអែល និងសហរដ្ឋអាមេរិក។

តាមការចេញផ្សាយរបស់BBC នៅឯអង្គការសហប្រជាជាតិ ប្រទេសជាច្រើននៅទ្វីបអឺរ៉ុប រួមមាន ចក្រភពអង់គ្លេស បារាំង បែលហ្សិក និងប្រទេសក្រៅតំបន់អឺរ៉ុប រួមមាន អូស្រ្តាលី និង កាណាដា បានអះអាងថា ពួកគេគ្រោងនឹងទទួលស្គាល់ប៉ាឡេស្ទីនជារដ្ឋនៅសប្តាហ៍ក្រោយ ខណៈដែលសហរដ្ឋអាមេរិកបានព្រមានពីការទទួលស្គាល់បែបនេះ ហើយ អ៊ីស្រាអែលបានបដិសេធដាច់អហង្ការចំពោះការបង្កើតរដ្ឋប៉ាឡេស្ទីន។

នៅដើមខែនេះ ប្រទេសបែលហ្ស៊ិកបានប្រកាសដាក់ទណ្ឌកម្មជាបន្តបន្ទាប់ រួមទាំងការហាមឃាត់ការនាំចូលពីការតាំងទីលំនៅរបស់ជនជាតិជ្វីហ្វខុសច្បាប់នៅតំបន់ West Bank ការពិនិត្យឡើងវិញនូវគោលនយោបាយលទ្ធកម្មជាមួយក្រុមហ៊ុនអ៊ីស្រាអែល និងការរឹតបន្តឹងលើជំនួយកុងស៊ុលដល់ប្រជាជនបែលហ្ស៊ិកដែលរស់នៅក្នុងការតាំងទីលំនៅ។

បែលហ្ស៊ិកក៏បានប្រកាសថារដ្ឋមន្ត្រីរដ្ឋាភិបាលអ៊ីស្រាអែលរឹងរូសពីរនាក់គឺ Itamar Ben-Gvir និង Bezalel Smotrich, ជារដ្ឋមន្ត្រីមិនគួររាប់រក និងហាមចូលបែលហ្ស៊ិក រួមជាមួយនឹងអ្នកតាំងលំនៅជនជាតិជ្វីហ្វដែលត្រូវបានចោទប្រកាន់ពីបទហិង្សាលើប៉ាឡេស្ទីននៅតំបន់ West Bank ។

ប្រទេសផ្សេងទៀត រួមទាំងប្រទេសអង់គ្លេស និងបារាំង បានចាត់វិធានការស្រដៀងគ្នានេះរួចហើយ។

មួយសប្តាហ៍បន្ទាប់ពីការផ្លាស់ប្តូររបស់បែលហ្ស៊ិក អេស្បាញ បានប្រកាសវិធានការផ្ទាល់ខ្លួន ដោយបង្វែរការហាមឃាត់អាវុធដែលមានស្រាប់ទៅជាច្បាប់ ដោយប្រកាសពីការហាមឃាត់ការនាំចូលដោយផ្នែក រារាំងការចូលទឹកដីអេស្ប៉ាញសម្រាប់ជនណាដែលពាក់ព័ន្ធក្នុងអំពើប្រល័យពូជសាសន៍ ឬឧក្រិដ្ឋកម្មសង្រ្គាមនៅហ្គាហ្សា និងហាមមិនឲ្យនាវា និងយន្តហោះដែលផ្ទុកអាវុធនៅអ៊ីស្រាអែលចូលចតនៅកំពង់ផែអេស្ប៉ាញ ឬចូលដែនអាកាសរបស់ខ្លួន។

រដ្ឋមន្ត្រីការបរទេសអ៊ីស្រាអែល លោក Gideon Saar បានចោទប្រកាន់ប្រទេសអេស្ប៉ាញថា ជំរុញគោលនយោបាយប្រឆាំងសាសនា និងបានស្នើថា អេស្បាញនឹងរងទុក្ខច្រើនជាងអ៊ីស្រាអែលពីការហាមឃាត់ពាណិជ្ជកម្មអាវុធ។

តាម BBC មានសញ្ញាគួរឲ្យព្រួយបារម្ភផ្សេងទៀតសម្រាប់អ៊ីស្រាអែល។ នៅក្នុងខែសីហា មូលនិធិទ្រព្យសម្បត្តិរដ្ឋចំនួន ២ទ្រីលានដុល្លារបស់ប្រទេសន័រវេស (១.៧ទ្រីលានអឺរ៉ូប) បានប្រកាសថាខ្លួននឹងចាប់ផ្តើមដកខ្លួនចេញពីក្រុមហ៊ុនដែលបានចុះបញ្ជីក្នុងប្រទេសអ៊ីស្រាអែល។ នៅពាក់កណ្តាលខែកញ្ញា ក្រុមហ៊ុនចំនួន ២៣ត្រូវបានដកចេញ ហើយរដ្ឋមន្ត្រីក្រសួងហិរញ្ញវត្ថុលោក Jens Stoltenberg បាននិយាយថា ក្រុមហ៊ុនន័រវេសច្រើនទៀតអាចធ្វើតាម។

ទន្ទឹមនឹងនេះ សហភាពអឺរ៉ុប ដែលជាដៃគូពាណិជ្ជកម្មដ៏ធំបំផុតរបស់អ៊ីស្រាអែល គ្រោងនឹងដាក់ទណ្ឌកម្មរដ្ឋមន្ត្រីស្តាំនិយម និងមួយផ្នែកផ្អាកធាតុពាណិជ្ជកម្មនៃកិច្ចព្រមព្រៀងសមាគមរបស់ខ្លួនជាមួយអ៊ីស្រាអែល។

នៅក្នុងសុន្ទរកថារដ្ឋសហភាពអឺរ៉ុបកាលពីថ្ងៃទី ១០ខែកញ្ញា ប្រធានគណៈកម្មការសហភាពអឺរ៉ុប លោកស្រី Ursula von der Leyen បាននិយាយថា ព្រឹត្តិការណ៍នៅហ្គាហ្សាបាន «អង្រួនមនសិការរបស់ពិភពលោក»។

ប្រធានគណៈកម្មការសហភាពអឺរ៉ុប លោកស្រី Ursula von der Leyen។ Kyiv Post

មួយថ្ងៃក្រោយមក អតីតមន្ត្រីការទូត និងមន្ត្រីអឺរ៉ុបចំនួន ៣១៤នាក់បានសរសេរទៅកាន់លោកស្រី von der Leyen និងប្រធានគោលនយោបាយការបរទេសរបស់ EU លោកស្រី Kaja Kallas ដោយអំពាវនាវឱ្យមានវិធានការតឹងរ៉ឹង រួមទាំងការផ្អាកទាំងស្រុងនៃកិច្ចព្រមព្រៀងសមាគមជាមួយប្រទេសអ៊ិស្រាអែល។

រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រ៉ូប៊ីអូ (Marco Robio) បាននិយាយប្រាប់អ្នកសារព័ត៌មានមុនចាកចេញដំណើរទៅកាន់ប្រទេសអ៊ិស្រាអែលកាលពីថ្ងៃសៅរ៍ថា ទាំងរូបលោក និងប្រធានាធិបតី ដូណាល់ ត្រាំ មិនសប្បាយចិត្តចំពោះការវាយប្រហាររបស់អ៊ីស្រាអែលនៅកាតាឡើយ៕

យោងការផ្សព្វផ្សាយរបស់ក្រសួងការបរទេសអាមេរិក នាយករដ្ឋមន្ត្រីអ៊ីស្រាអែល ណេតាន់យ៉ាហ៊ូ បាននិយាយក្នុងសន្និសីទរួមគ្នាថា៖«លោករដ្ឋមន្ត្រី Marco ដំណើរទស្សនកិច្ចរបស់អ្នកទៅកាន់រដ្ឋធានីដ៏អមតៈ និងគ្មានការបំបែកបានរបស់យើង «ហ្សេរុយសាឡឹម» គឺជាការបញ្ជាក់ដ៏មានឥទ្ធិពល និងរឹងមាំនៃចំណងទំនាក់ទំនងដ៏មានឥទ្ធិពល។ យើងក្រោកឈរក្នុងពេលនៃការប្រឈមដ៏ធំធេង ការឈ្លានពានរបស់ប្រទេសអ៊ីរ៉ង់ និងអ្នកតំណាងភេរវកររបស់ពួកគេ អ្នកដែលស្រែកថា «ងាប់ទៅអាមេរិក! ងាប់ទៅអ៊ីស្រាអែល!»៕

រ៉ាន់ រើយ