អ្នកជំនាញថា ម៉ាសប្រភេទនេះ ទើបមានសមត្ថភាពខ្លាំង ការពារវីរុសបំប្លែងខ្លួន Delta បាន

ស្របពេលដែលវីរុសបំប្លែងខ្លួន Delta កំពុងបន្តកើនឡើងនៅទូទាំងពិភពលោក អ្នកជំនាញអាមេរិកទូន្មានថា ម៉ាសធម្មតាដែលយើងប្រើសព្វថ្ងៃហាក់មិនអាចការពារវីរុសកូវីដបំប្លែងខ្លួនថ្មីបានខ្ពស់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Michael Osterholm នាយកមជ្ឈមណ្ឌលស្រាវជ្រាវជំងឺឆ្លងនៃសាកលវិទ្យាល័យ  Minnesota បានប្រាប់សារព័ត៌មាន CNN ថា គ្រប់គ្នាគួរតែប្ដូរម៉ាសធម្មតាមកប្រើម៉ាសក្រណាត់ ឬម៉ាស N95s​ ឬម៉ាស K-N95s ដើម្បីការពារវីរុសបំប្លែងខ្លួនបានរឹតតែប្រសើរ។

លោកបន្តថា ម៉ាស N95s ជាឧបករណ៍ជួយឱ្យដកដង្ហើមបានស្រួលជាងម៉ាសធម្មតា ជាពិសេសវាអាចជួយច្រើនបំផុតចំពោះមនុស្សដែលមិនទាន់បានចាក់វ៉ាក់សាំង ឬមិនទាន់ឆ្លងកូវីដពីមុនមក។ មិនតែប៉ុណ្ណោះ វាអាចការពារអ្នកពាក់ និងអ្នកជុំវិញខ្លួនមិនឱ្យឆ្លងមេរោគតាមរយៈការដកដង្ហើម ខណៈម៉ាសធម្មតា ហាក់មានប្រសិទ្ធភាពតិចតួចណាស់ដើម្បីការពារការចម្លងវីរុស។

ទន្ទឹមគ្នាដែរ លោកវេជ្ជបណ្ឌិត Scott Gottlieb អតីតប្រធានរដ្ឋបាលចំណីអាហារនិងឱសថអាមេរិក យល់ស្របថា ប្រសិនបើអាចពាក់ម៉ាស N95s ឬម៉ាស K-N95s នោះវានឹងផ្តល់នូវការការពារកាន់តែច្រើនទ្វេដង។

បើយោងតាមគេហទំព័រ The Hill វិញបានឱ្យដឹងថា បញ្ហាមួយដែលនាំឱ្យមានការកើនឡើងនូវវីរុសបំប្លែងខ្លួន Delta នៅសហរដ្ឋអាមេរិក គឺដោយសារពលរដ្ឋមិនពាក់ម៉ាស ជាពិសេសពួកគេអត់ពាក់ម៉ាស N95s ឬម៉ាសក្រណាត់​ឡើយ។ នេះជាអ្វីដែលពលរដ្ឋប្រទេសផ្សេងគួរយកចិត្តទុកដាក់ និងប្រុងប្រយ័ត្នខ្ពស់។

តើគួរពាក់ម៉ាសទេ ប្រសិនបើអ្នកបានចាក់វ៉ាក់សាំងពេញលេញ?

លោក Todd Vento វេជ្ជបណ្ឌិតផ្នែកជំងឺឆ្លងនៅឯមជ្ឈមណ្ឌល Intermountain Healthcare អាមេរិកបានប្រាប់ថា ទាំងអ្នកមិនទាន់ចាក់ឬបានចាក់វ៉ាក់សាំងពេញលេញ ត្រូវតែពាក់ម៉ាសដាច់ខាតរាល់ពេលចេញក្រៅ ឬទៅកន្លែងប្រមូលផ្ដុំមនុស្ស ព្រោះពេលនេះពិភពលោកកំពុងប្រឈមជាមួយវីរុសបំប្លែងខ្លួន Delta ដែលពិបាក់ទប់ទល់។ ក្រៅពីនោះ គ្រប់គ្នាត្រូវរក្សាអនាម័យជាប្រចាំ ព្រមទាំងបន្តរក្សាគម្លាតសង្គមជានិច្ច៕

ប្រែសម្រួល៖ សន្យា

ប្រភព៖ Deseret News

ចុចអាន៖ ពិតឬអត់! ពាក់ម៉ាសពីរជាន់អាចការពារការចម្លងវីរុសកូវីដបានល្អជាងពាក់តែមួយ?

ចុចអាន៖ អ្នកជំនាញព្រមានអំពីគ្រោះថ្នាក់ចំពោះអ្នកខ្ជិលពាក់ម៉ាស

ចុចអាន៖ ម៉ាសធម្មតា និងម៉ាស KN95 អាចពាក់បានប៉ុន្មានម៉ោង?