ជាសះស្បើយពីកូវីដបាន៤ខែ អាចចាក់វ៉ាក់សាំងបាន តែមានផលរំខានខុសអ្នកដទៃមួយចំណុច

ថ្មីៗនេះ ក្រសួងសុខាភិបាល ​បានអំពាវនាវដល់អ្នកជំងឺជាសះស្បើយពីកូវីដ-១៩ រយៈពេល៤ខែឡើង អាចអញ្ជើញទៅចាក់វ៉ាក់សាំងបានហើយ បន្ទាប់ពីធ្លាប់ព្រមានថា អ្នកទើបជាសះស្បើយភ្លាមៗ ទោះបីចាក់ក៏គ្មានប្រសិទ្ធភាពអ្វី។

ចំពោះអ្នកធ្លាប់វិជ្ជមានវីរុសកូវីដ-១៩ ឬកូវីដបំប្លែងខ្លួនដទៃទៀតមិនថាមុនតេស្តពុំទាន់បានចាក់វ៉ាក់សាំងសោះ អ្នកទើបចាក់មួយដូស ឬអ្នកចាក់ពីរដូសហើយក្ដី ក្រោយជាសះស្បើយរយៈពេល ៤ខែ ឬលើសពីនេះ អាចវ៉ាក់សាំងចាប់ពីពេលនេះតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក ចំពោះផលរំខាននៃវ៉ាក់សាំងសម្រាប់អ្នកធ្លាប់ឆ្លងកូវីដ ហាក់មិនខុសគ្នាឆ្ងាយពីបុគ្គលទូទៅនោះទេ ប្លែកត្រង់ពេលវេលាប៉ុណ្ណោះ ដែល​អាចមានរយៈពេលយូរជាងអ្នកមិនធ្លាប់វិជ្ជមានទាល់តែសោះ។

យោងតាមការស្រាវជ្រាវកន្លងមករកឃើញថា អ្នកជាសះស្បើយពីកូវីដ-១៩ រងផលរំខានរាងកាយដូចគ្នា តែអាចធ្ងន់ជាងអ្នកមិនធ្លាប់វិជ្ជមានវីរុសនេះ បន្ទាប់ពីចាក់វ៉ាក់សាំងរួច។

អ្នកស្រាវជ្រាវមកពីសាកលវិទ្យាល័យ Johns Hopkins បានប្រមូលទិន្នន័យពីបុគ្គលិកថែទាំសុខភាពចំនួន ៩៥៤ នាក់ ក្នុងរដ្ឋ ម៉ារីឡេន (Maryland) សហរដ្ឋអាមេរិក ដើម្បីតាមដានអាការ ក្រោយចាក់វ៉ាក់សាំង។ ពួកគេបានរកឃើញថា មនុស្សដែលធ្លាប់ឆ្លងមេរោគកូវីដ-១៩ មានប្រតិកម្ម ៤.៥ ដង លើសមនុស្សទូទៅ ក្រោយចាក់លើកដំបូង។ ទោះយ៉ាងណា អ្នកជាសះស្បើយពីកូវីដ-១៩ ហាក់ដូចជាមិនសូវមានប្រតិកម្មធ្ងន់ធ្ងរចំពោះការចាក់វ៉ាក់សាំងលើកទី២នោះទេ។ ចំណែកការចាក់ដូសទី៣ ក៏ពុំមានផលរំខានអ្វី ខ្លាំងជាងលើកមុនៗឡើយ។

បន្ថែម​ពី​លើនោះ អ្នក​ដែល​​ធ្លាប់​មាន​ជំងឺ​​កូវីដ-១៩ ទំនង​ជា​មាន​ប្រតិកម្ម​រយៈពេលយូរ​ចំពោះ​វ៉ាក់សាំង ​ដោយអាចមាន​ប្រតិកម្ម​រហូតដល់ ៧ថ្ងៃ​ បើ​ប្រៀបធៀប​ទៅ​នឹង អ្នក​ដែល​មិន​ធ្លាប់ឆ្លង​ជំងឺ​កូវីដ គឺពួកគេមានផលរំខានតែពីរបីថ្ងៃប៉ុណ្ណោះ។

គួរឱ្យកត់សម្គាល់ផងដែរថា ទោះបីជាបុគ្គលនោះធ្លាប់វិជ្ជមានកូវីដក៏ដោយ រាងកាយពួកគេសុទ្ធតែអាចបង្កើតការឆ្លើយតបអង់ទីគ័រខ្លាំងក្លាចំពោះវ៉ាក់សាំង ក្រោយពេលចាក់ពេញលេញ៕

អត្ថបទ៖ សន្យា

ចុចអាន៖ ក្រោយក្រសួងប្រកាស តើអ្នកមានជំងឺប្រចាំកាយអ្វីខ្លះ អាចចាក់វ៉ាក់សាំងបាន?

ចុចអាន៖ នេះមូលហេតុ អ្នកចាក់វ៉ាក់សាំងកូវីដដូសជំរុញហើយ មានផលរំខានខុសៗគ្នា