សុខភាព

អ្នកមានសុខភាពខ្សោយ អាចចេញសញ្ញាទាំង ៧នេះ

បានផុស

៥ years មុន

នៅ

ថ្ងៃអង្គារ ២៣ វិច្ឆិកា ២០២១

ដោយ

អាការសាមញ្ញមួយចំនួន ដូចជាអស់កម្លាំងរ៉ាំរ៉ៃ ឬការប្រែប្រួលអារម្មណ៍ជាប់រហូត សុទ្ធតែអាចបញ្ជាក់ពីបញ្ហាសុខភាពធ្ងន់ធ្ងរ។ ហេតុនេះហើយ គ្នាយើងគប្បីយកចិត្តទុកដាក់ នៅពេលដែលមានការប្រែប្រួលណាមួយកើតឡើងភ្លាមៗចំពោះរាងកាយ។
សញ្ញាព្រមានដែលបញ្ជាក់ថា រាងកាយយើងមានសុខភាពទន់ខ្សោយ រួមមាន៖

១. ស្រកទម្ងន់យ៉ាងឆាប់រហ័ស

ការស្រកទម្ងន់លើសពី ១០%នៃទម្ងន់ខ្លួនក្នុងរយៈពេល៦ខែ គឺជារឿងដ៏គួរឲ្យបារម្ភមួយ និងអាចជាលទ្ធផលនៃបញ្ហាសុខភាពធ្ងន់ធ្ងរ ដូចជាជំងឺទឹកនោមផ្អែម ដុំសាច់ ឬការឆ្លងមេរោគរ៉ាំរ៉ៃជាដើម។

២. ការប្រែប្រួលអារម្មណ៍

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរ ការប្រែប្រួលអារម្មណ៍ក៏អាចបង្ហាញពីបញ្ហាសុខភាពផ្លូវចិត្តធ្ងន់ធ្ងរដូចជាជំងឺបាយប៉ូឡា និងការបាក់ទឹកចិត្តរ៉ាំរ៉ៃជាដើម។

៣. ឈឺក្បាល

អាការៈឈឺក្បាលប្រកាំង ឬឈឺក្បាលរយៈពេលវែងកើតឡើងជាទូទៅ និងមិនមានភាពធ្ងន់ធ្ងរនោះទេ។ ប៉ុន្តែបើការឈឺក្បាលរយៈពេលខ្លី កាន់តែយ៉ាប់យ៉ឺននៅពេលយប់ ឬនៅពេលព្រឹកដោយមិនបាត់ទៅវិញ ទោះប្រើថ្នាំបំបាត់ការឈឺចាប់យ៉ាងណាក្ដីយើងអាចនឹងមានបញ្ហាសុខភាព។ ពិសេសបើអមមកជាមួយនឹងអាការៈគ្រុនក្ដៅ ព្រមទាំងដៃ និងជើងទន់ខ្សោយទៀត វាអាចជាសញ្ញានៃជំងឺធ្ងន់ធ្ងរដូចជាដុំសាច់ ឬរលាកស្រោមខួរក្បាល។

៤. អស់កម្លាំង

ក្នុងករណីដែលយើងនៅតែអស់កម្លាំង ទោះជាបានញ៉ាំរបបអាហារល្អៗ និងគេងបានគ្រប់គ្រាន់ហើយនោះ វាអាចជាសញ្ញានៃជំងឺអស់កម្លាំងរ៉ាំរ៉ៃ ។ ដូច្នេះហើយ ចូរណាត់ជួបជាមួយគ្រូពេទ្យ និងធ្វើរោគវិនិច្ឆ័យឲ្យបានឆាប់រហ័ស ទើបជាការប្រសើរ។

៥. ក្អកជាប់រហូត

ចំណែកឯអាការៈក្អកជាប្រចាំ និងអមដោយការស្រកទម្ងន់ គ្រុនក្ដៅកម្រិតស្រាល និងអស់កម្លាំង អាចជារោគសញ្ញានៃការឆ្លងមេរោគរ៉ាំរ៉ៃ ដូចជាជំងឺរបេង ឬដុំសាច់។

៦. ឈឺទ្រូង

ប្រសិនបើយើងមានអារម្មណ៍ថាមានណែនទ្រូង តឹង ឬបុកនៅក្រោមឆ្អឹងជំនី ហើយការឈឺចាប់រាលដាលដល់ថ្គាម ដៃឆ្វេង ឬខ្នង អមជាមួយនឹងការដកដង្ហើមហត់ និងចង្វាក់បេះដូងទាប វាអាចជាសញ្ញានៃការគាំងបេះដូង ដែលតម្រូវឲ្យយើងត្រូវប្រញាប់ទាក់ទងទៅកាន់គ្រូពេទ្យជាបន្ទាន់។

៧. ជាសះស្បើយយឺត

ជំងឺទឹកនោមផ្អែមអាចពន្យឺតដំណើរការនៃការបង្កើតកោសិកាឡើងវិញ ដែលជាហេតុនាំឲ្យដំណើរការនៃការជាសះស្បើយពីរបួសមានភាពយឺតយ៉ាវ៕

អត្ថបទផ្ដល់ដោយ៖ Hello Krupet

ចុចអាន៖តើចំណុចខ្មៅលើខ្ទឹមស ជាផ្សិត? បើហូបទៅ មានហានិភ័យ នៃជំងឺមហារីកទេ?

ចុចអាន៖ឈឺបំពង់ ក ប្រភេទណា ដែលអាចប្រើថ្នាំអង់ទីប៊ីយ៉ូទីកបាន?