WHO រកឃើញជំងឺអុតស្វានៅក្នុងប្រទេស បន្ថែមទៀតហើយ (មានវីដេអូ)

អង្គការសុខភាពពិភពលោក (WHO) បាននិយាយថា ជំងឺអុតស្វា អាចទប់ស្កាត់បាននៅក្នុងប្រទេសក្រៅទ្វីបអាហ្រ្វិក ខណៈបច្ចុប្បន្នប្រទេសដែលរាយការណ៍អំពីករណីនេះ បានកើនឡើងដល់១៦ហើយ ថ្វីបើ WHO មិនបញ្ជាក់ឈ្មោះក៏ដោយ។

ជាង ១០០ ករណីនៃមេរោគដែលបណ្តាលឲ្យឡើងកន្ទួល​ ពងបែកនិងគ្រុនក្តៅមួយនេះ ត្រូវបានបញ្ជាក់នៅអឺរ៉ុប អាមេរិកនិងអូស្ត្រាលី។

ចំនួន​នោះ​ត្រូវ​បាន​គេ​រំពឹង​ថា​នឹង​កើន​ឡើងបន្តទៀត ប៉ុន្តែ​អ្នក​ជំនាញ​និយាយ​ថា ​ហានិភ័យ​ជា​រួម​ចំពោះ​ប្រជាជន​គឺមាន​កម្រិត​ទាប​ខ្លាំង​ណាស់។

លោកស្រី Maria Van Kerkhove ទទួលបន្ទុកផ្នែកជំងឺដែលកំពុងកើតឡើង របស់ WHO បាននិយាយនៅក្នុងសន្និសីទសារព័ត៌មានកាលពីថ្ងៃចន្ទទី២៣ខែឧសភាថា “នេះគឺជាស្ថានភាពដែលអាចទប់ទល់បាន។ យើងចង់បញ្ឈប់ការឆ្លងពីមនុស្សទៅមនុស្ស”។

ទោះបីជាមានការផ្ទុះឡើងធំបំផុតនៅខាងក្រៅទ្វីបអាហ្រ្វិកក្នុងរយៈពេល ៥០ ឆ្នាំក៏ដោយ ក៏ជំងឺអុតស្វាយ មិនរីករាលដាលយ៉ាងងាយស្រួលរវាងមនុស្សនិងមនុស្សដែរ ហើយអ្នកជំនាញនិយាយថា ការគំរាមកំហែងនេះមិនអាចប្រៀបធៀបទៅនឹងជំងឺរាតត្បាតផ្សេងទៀតបានទេ។

មន្ត្រី WHO ម្នាក់ទៀតលើកឡើងថា មិនមានភ័ស្តុតាងណាមួយដែលថា មេរោគអុតស្វា អាចបំប្លែងខ្លួនបាននោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ថៃ ជំរុញប្រជាជន កុំទទួលទានសាច់សត្វព្រៃ ដើម្បីការពារជំងឺអុតស្វា