សុខភាព

ថៃ ព្រមានថា នំឆាខ្វៃជាមួយតែទឹកដោះគោពេលព្រឹក ជាអាហារគ្រោះថ្នាក់ខ្លាំង

បានផុស

២ ថ្ងៃ មុន

នៅ

ថ្ងៃអាទិត្យ ៥ មីនា ២០២៣

ដោយ

ក្រសួងសុខាភិបាលនៃប្រទេសថៃ បានចេញសេចក្តីប្រកាសព្រមានដល់សាធារណជនដោយជំរុញឲ្យបញ្ឈប់ការទទួលទានអាហារពេលព្រឹកដ៏ពេញនិយម នោះគឺនំឆាខ្វៃជាមួយតែទឹកដោះគោឬកាហ្វេ ព្រោះវាមិនល្អសម្រាប់សុខភាពឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Suwanchai Wattanayingcharoenchai អគ្គនាយកនៃក្រសួងសុខាភិបាល មានប្រសាសន៍ថា “ដើម្បីទទួលទានអាហារពេលព្រឹកដែលមានសុខភាពល្អ គួរចៀសវាងអាហាររហ័សដែលផ្ដល់ថាមពលខ្លាំងពេក ឬត្រូវចៀនច្រើនមុខដូចជាឆាខ្វៃជាមួយទឹកដោះគោខាប់ និងតែទឹកកកផ្អែមៗជាដើម”។ ជាពិសេសឆាខ្វៃគឺជាអាហារសម្រន់ដែលមានកាបូអ៊ីដ្រាតនិងខ្លាញ់ឆ្អែត ហើយផ្តល់ថាមពលខ្ពស់ ខណៈវាល្អសម្រាប់អ្នកដែលចង់បង្កើនថាមពល ប៉ុន្តែមិនស័ក្ដិសមសម្រាប់អ្នកមានក្រពេញទីរ៉ូអ៊ីតលើសទម្ងន់ និងលើសឈាមទេ។

លោកវេជ្ជបណ្ឌិត Suwanchai បានបង្ហាញថា ប្រេងឆាដែលប្រើសម្រាប់ចៀនបំពងឆាខ្វៃ ជារឿយៗត្រូវកែច្នៃឡើងវិញ ដែលវាអាចមានសារធាតុបង្កមហារីក។ ជាវិធានការបង្ការទុកជាមុន លោកបានផ្ដល់អនុសាសន៍ថា អ្នកប្រើប្រាស់កំណត់ការទទួលទានម្សៅចៀន មិនឲ្យលើសពីពីរគូក្នុងមួយថ្ងៃ។

ដោយឡែក អ្នកជំនាញសុខភាពក៏បានព្រមានអ្នកនិយមទទួលទានតែទឹកកកអំពីហានិភ័យសុខភាព ដែលអាចកើតដោយកត់សម្គាល់ថា ២០០មីលីលីត្រមានផ្ទុកកាបូអ៊ីដ្រាត ៦៩ ក្រាម ខ្លាញ់ ១៥ ក្រាម និងជាតិស្ករ ៥៣ ក្រាម ស្មើនឹងប្រមាណ ១៣ ស្លាបព្រា។ បរិមាណជាតិស្ករ និងកាឡូរីខ្ពស់នៃភេសជ្ជៈដ៏ពេញនិយមនេះ អាចនាំឲ្យមានផលវិបាកផ្សេងៗចំពោះសុខភាព ហើយបុគ្គលម្នាក់ៗត្រូវបានគេណែនាំឲ្យទទួលទានក្នុងកម្រិតមធ្យមប៉ុណ្ណោះ។ ការទទួលទានតែទឹកកកញឹកញាប់ អាចបណ្តាលឲ្យកើតជំងឺទឹកនោមផ្អែម មហារីក សំពាធឈាមខ្ពស់ ធាត់ និងជំងឺសរសៃឈាមបេះដូង និងសរសៃឈាមខួរក្បាលដោយមិនដឹងខ្លួន៕