ជំងឺមហារីកនៅ វៀតណាម សម្លាប់មនុស្សច្រើនជាងគ្រោះថ្នាក់ចរាចរណ៍ ១៨ ដង

បើយោងតាមក្រសួងសុខាភិបាលវៀតណាមបានឲ្យដឹងថា ចំនួនអ្នកកើតជំងឺមហារីកនៅក្នុងប្រទេសវៀតណាម បានកើនឡើងច្រើនពីអតីតកាល ហើយការស្លាប់ដោយសារជំងឺមួយនេះ ក៏ច្រើនជាងករណីដែលបង្កឡើងដោយគ្រោះថ្នាក់ចរាចរណ៍ផងដែរ ។

តាមរយៈមន្ត្រីសុខាភិបាល ជនជាតិវៀតណាមប្រហែល ៣៥៤,០០០ នាក់កំពុងសម្រាកព្យាបាលជំងឺមហារីក ហើយភាគច្រើនគឺស្ថិតក្នុងដំណាក់កាលចុងក្រោយទៅហើយ ។

ទន្ទឹមនោះ អនុរដ្ឋមន្ត្រីក្រសួងសុខាភិបាលលោក Tran Van Thuan បាននិយាយថា ជារៀងរាល់ឆ្នាំ វៀតណាមកត់ត្រាករណីថ្មីនៃជំងឺមហារីកចំនួន ១៨២,០០០ ករណី ខណៈមនុស្សចំនួន ១២២,០០០ នាក់បានស្លាប់ ដោយសារជំងឺមួយនេះ ហើយវាជាអត្រាខ្ពស់ជាងការស្លាប់ដោយគ្រោះថ្នាក់ចរាចរណ៍ដល់ទៅ ១៨ ដង ខណៈក្នុងចំណោមជនជាតិវៀតណាម ១០ ម៉ឺននាក់ មាន ១៥៩ នាក់ទៅហើយត្រូវបានធ្វើរោគវិនិច្ឆ័យថាមានជំងឺមហារីក ហើយមាន ១០៦ នាក់បានស្លាប់ ។

លោក Thuan បានបន្ថែមទៀតថា ចំនួនអ្នកជំងឺមហារីកនៅវៀតណាម បានបន្តកើនឡើងកាន់តែខ្ពស់ បើប្រៀបធៀបទៅនឹង ៣០ ឆ្នាំមុន ។ ដោយនៅក្នុងនោះ មានអ្នកជំងឺមហារីកដូចជា មហារីកថ្លើម សួត សុដន់ ក្រពះ ពោះវៀនធំ ចុងពោះវៀនធំ ឬរន្ធគូទ ជំងឺមហារីកឈាម ក្រពេញប្រូស្តាត ច្រមុះ និងក្រពេញទីរ៉ូអ៊ីតជាដើម ។

បើយោងតាមអង្គការសុខភាពពិភពលោក (WHO) បានឲ្យដឹងថា ជារៀងរាល់ឆ្នាំ មានករណីមហារីកថ្មីៗជិត ២០ លានករណីនៅទូទាំងពិភពលោក ហើយជាង ១០ លាននាក់ បានស្លាប់ដោយសារជំងឺនេះ​ ដែល ២ ភាគ ៣ នៃអ្នកជំងឺស្ថិតនៅក្នុងប្រទេសកំពុងអភិវឌ្ឍន៍ ៕

ប្រែសម្រួលដោយ ៖ នាង រតនៈ

ប្រភព ៖ VN Express

ចុចអាន ៖ បុរសថៃ ដួលស្លាប់នៅមុខហាងលក់មឈូសដោយសារក្តៅខ្លាំងពេក