មុនសម្រេចចិត្តតចង្កា គួរដឹងប៉ុន្មានចំណុចនេះសិន

ការតចង្កាឱ្យមុខវែងស្រួចដើម្បីប្តូរទម្រង់មុខកំពុងពេញនិយមណាស់ដែរ​ ប៉ុន្តែរាល់ការវះកាត់ មិន​ថាការវះកាត់ធម្មតា ឬការវះកាត់កែសម្ផស្សទេសុទ្ធតែអាចមានផលវិបាក។ តើការតចង្កា​អាច​មាន​ផលវិបាកអ្វីខ្លះ?

ជាធម្មតាគ្រូពេទ្យវះកាត់កែសម្ផស្សនឹងចាក់ថ្នាំសណ្តំឱ្យយើងមុននឹងធ្វើការ​វះកាត់តចង្កា។ បន្ទាប់​មក​គ្រូពេទ្យនឹងធ្វើការវះបន្តិចនៅខាងក្នុងមាត់ ឬក្រោមចង្កា។ គ្រូពេទ្យអាចប្រើឆ្អឹងពិត ជាលិកាខ្លាញ់ ឬស៊ីលីកូនតភ្ជាប់ពី​មុខ​ឆ្អឹងចង្កាយើង រួចចាប់វ៉ីសឱ្យជាប់។ ជាចុងក្រោយគ្រូពេទ្យ​នឹងដេរភ្ជាប់​មុខ​របួស​វិញ។

បន្ទាប់ពីធ្វើការវះកាត់រួច យើងអាចត្រលប់ទៅផ្ទះវិញធម្មតា ប៉ុន្តែកន្លែងវះកាត់នឹងហើម។ យើងអាចត្រឡប់​ទៅធ្វើការ ឬប្រកបរបរចិញ្ចឹមជីវិតវិញក្នុង​រយៈពេលមួយ​សប្តាហ៍។

ការតចង្កាអាចមានផលវិបាកដូចជា៖

• ចង្កា តហើយអាចរំកិលចេញពីកន្លែងភ្ជាប់
• ចង្កា តមិនស៊ីមេទ្រី ឬសមនឹងទម្រង់មុខ
• អាចខូចសរសៃប្រសាទរំញោចធ្មេញខាងក្រោម ដែលនាំឱ្យបបូរមាត់​ខាង​ក្រោម​មិនអាចធ្វើចលនាបាន
• ខូចឫសធ្មេញមុខ​ផ្នែក​ខាងក្រោម អញ្ចាញធ្មេញ សរសៃប្រសាទធ្មេញខាងក្រោម ឬសរសៃប្រសាទចង្កា
• អាចមានស្នាមជាអចិន្ត្រៃយ៍
• របួសអាចជាសះស្បើយយឺត ឆ្លងមេរោគ ឬមានការហូរឈាមនៅខាងក្នុង​ដែលអាចត្រូវ​ធ្វើការ​វះកាត់​យកចង្កា តចេញ
• មានផ្នត់ខ្លាំងនៅចន្លោះបបូរមាត់ក្រោម និងចង្កា (មានចង្អូរជ្រៅនៅក្រោមបបូរមាត់ខាងក្រោម)

ដើម្បីកាត់បន្ថយផលវិបាកនៃការតចង្កា យើងត្រូវជ្រើសរើសគ្រូពេទ្យ​វះកាត់​កែសម្ផស្ស​ដែលមាន​ជំនាញ​ត្រឹមត្រូវ និងត្រូវពិភាក្សាជាមួយគ្រូពេទ្យពីតម្រូវការរបស់យើងឱ្យបានច្បាស់លាស់៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ នារីៗ​ចង់​វះកាត់​សុដន់​ឲ្យ​ធំ កុំ​ទាន់​សិន ស្វែង​យល់​គុណវិបត្តិ​ធំៗ​ទាំងនេះ ក៏​មិន​ទាន់​ហួស​ពេល​ដែរ

ចុចអាន៖ តរោមភ្នែកឃើញស្អាត តែលំបាក អ្នកមិនទាន់សាកអាចលែងចង់