ហេតុអ្វីតារាកូរ៉េល្បីៗ រៀបការបែបឯកជនខ្លាំង និងតែងតែលាក់រូបថតអាពាហ៍ពិពាហ៍?

ឧស្សាហកម្មកម្សាន្តកូរ៉េ ជាកន្លែងដ៏ពេញនិយមពាសពេញអាស៊ី និងបានសាយភាយដល់បច្ចឹមប្រទេសផងដែរ។ ដោយសារមូលហេតុនេះ បានជាសិល្បករ-ការិនីកូរ៉េល្បីៗតែងតែទទួលបានការចាប់អារម្មណ៍ពីទស្សនិកជនគ្រប់ទីកន្លែង ជាពិសេសអំពីជីវិតឯកជនរបស់ពួកគេ។

ទន្ទឹមនឹងការចង់ដឹងចង់ឃើញរបស់ទស្សនិកជនរាប់សិបលាននាក់ តារាប្រុសស្រីល្បីល្បាញមួយចំនួន បែរជាជ្រើសរើសរៀបចំពិធីមង្គលការប្រកបដោយភាពស្ងប់ស្ងាត់ ពោលគឺបែបឯកជនខ្លាំង រហូតបណ្ដាញសារព័ត៌មានមិនមានរូបថតរបស់ពួកគេចុះផ្សាយ ហើយប្រើតែរូបថតដដែ​លៗ។ ដោយសារភាពឯកជនខ្លាំង សូម្បីតែរូបថតក៏មិនសូវបែកធ្លាយចេញក្រៅ ទើបបានជាអ្នកនិយមលេងអ៊ីនធឺណេត មានការងឿងឆ្ងល់សឹងតែគ្រប់គ្នា។

មូលហេតុមួយក្នុងចំណោមមូលហេតុផ្សេងទៀត គឺដោយសារគូស្នេហ៍មិនចង់អួតអាងពីភាពអ៊ឹកអាធឹកនៃពិធី ដូចនេះមង្គលការតែងប្រារព្ធឡើងតាមរបៀបសាមញ្ញ ហើយរូបភាពក្នុងពិធីមង្គលការក៏មិនសូវបង្ហាញជាសាធារណៈ។

ជាក់ស្ដែងកាលពីពេលថ្មីៗនេះ ពិធីមង្គលការរបស់កំពូលតារាសម្ដែងកូរ៉េ Hyun Bin និង Son Ye Jin បានប្រព្រឹត្តទៅក្រោមការទន្ទឹងរង់ចាំរបស់អ្នកគាំទ្រ ប៉ុន្តែរូបថតដែលទស្សនិកជនបានឃើញមានតែប៉ុន្មានសន្លឹកប៉ុណ្ណោះ។ គូស្នេហ៍​នេះ ​សម្រេច​ចិត្ត​អញ្ជើញ​ភ្ញៀវ​តែ ២០០នាក់​ទេ ហើយ​ថែមទាំង​រឹត​បន្តឹង​សន្តិសុខ​យ៉ាងហ្មត់ចត់ទៀតផង។

ភ្ញៀវដែលចូលរួមក្នុងពិធីមង្គលការរបស់ Hyun Bin – Son Ye Jin មិនអនុញ្ញាតឱ្យបង្ហាញព័ត៌មាន និងរូបភាពដែលទាក់ទងនឹងភាពសប្បាយរីករាយទៅខាងក្រៅឡើយ។ ពួកគេ​ក៏​មិន​ទទួល​យក​សំណើ​សម្ភាសន៍​ពី​អ្នក​សារព័ត៌មាន​ដែរ។ គ្រប់ទីកន្លែងនៃអាពាហ៍ពិពាហ៍ Bin – Jin មានក្រុមការពារសុវត្ថិភាព និងមានអ្នកគ្រប់គ្រងចំនួនមនុស្សចូល/ចេញក្នុងពិធីយ៉ាងតឹងរ៉ឹង។

មិនត្រឹមតែអាពាហ៍របស់ Bin – Jin ប៉ុណ្ណោះទេ ដែលមានលក្ខណៈឯកជន កាលពីឆ្នាំ ២០១៣ អ្នកប្រើប្រាស់អ៊ិនធឺណិតក៏ប្រទះឃើញពិធីមង្គលការឯកជន របស់តារាលំដាប់ A គឺរាជិនីសិចស៊ី Lee Hyori និងលោក Lee Sang Soon ផងដែរ ដែល​ធ្លាប់​​ចូល​រោងការ​ដោយ​សម្ងាត់​ដោយ​គ្មាន​ចេតនា​បង្អួត​អ្វី​ទាំង​អស់នៃពិធីរបស់ពួកគេ។

ដោយឡែក កាលពីឆ្នាំ ២០១៧ តារារៀមច្បងលោក Bi Rain និងនាង Kim Tae Hee ក៏បានរៀបចំពិធីមង្គលការឯកជនបំផុត នៅព្រះវិហារ។ ពួកគេ​មិន​ខ្វល់​ថាមាន​ភ្ញៀវ​ប៉ុន្មាន​ត្រូវ​ចូលរួមឡើយ ឬបារម្ភនឹងត្រូវចំណាយឱ្យកប់ពពកដើម្បីបង្អួតនោះទេ ពួកគេពេញចិត្តរបៀបសាមញ្ញៗ សំខាន់​បំផុតឱ្យតែមានក្ដីសុខ។

នៅឆ្នាំ ២០១៦ គូស្នេហ៍ Goo Hye Sun និង Ahn Jae Hyun ក៏បង្កភាពភ្ញាក់ផ្អើល និងសរសើរផងដែរ ដោយសារតែពួកគេមិនបានរៀបចំពិធីមង្គលការឱ្យធំដុំឡើយ ប៉ុន្តែពួកគេបានយកប្រាក់បណ្ណាការទៅឧបត្ថម្ភសកម្មភាពសប្បុរសធម៌ទៅវិញ។ នេះ​ជា​ទង្វើ​ដ៏មហិមារ និង​មាន​អត្ថន័យ​ដែល​គូស្នេហ៍​មួយគូនេះបានរួម​ចំណែក​ជួយ​សង្គម ​ហើយវាបាន​ធ្វើ​ឱ្យ​គ្រប់​គ្នា​ចាប់​អារម្មណ៍ និងស្ញប់ស្ញែងបំផុត។

ចំណែកហេតុផលសំខាន់មួយទៀតដែលតារាកូរ៉េអ្នកមានៗតែងតែរៀបអាពាហ៍ពិពាហ៍បែបឯកជន ព្រោះតែប្រវត្តិសាស្ត្រជាង ២ទសវត្សរ៍មុន។

ប្រជាពលរដ្ឋកូរ៉េ​​មិនអាច​បំភ្លេច​បាន​ទេនូវ​ពិធី​រៀបការ​បើកចំហរនៅឯព្រះវិហា​របស់​គូស្នេហ៍ Kim Tae Wook – Chae Shi Ra កាលពី​ជាង ​២០​ឆ្នាំមុន​។ គេ​ដឹង​ថា​នៅ​ក្នុង​ពិធី​មង្គលការ​គូស្នេហ៍​មួយ​គូ​នេះ ​ត្រូវ​ទទួល​ភ្ញៀវ​មិន​បាន​អញ្ជើញ​រាប់សិបនាក់។ ទស្សនិកជន​ អ្ន​កគាំទ្រ និងអ្នកសារព័ត៌មាន បាន​សម្រុក​ទៅ​រោងការយ៉ាងកុះករ ព្រោះ​ចង់​ឃើញ​ទិដ្ឋភាព​នៃពិធីទាំងមូល។ ដូច្នេះហើយ ទាំងកូនក្រមុំ កូនកំលោះ ទាំងសាច់ញាតិ មានការភ្ញាក់ផ្អើលជាខ្លាំង ដោយសារវត្តមានរបស់មនុស្សបុកចូលពិធីណែនតាន់តាប់ ធ្វើឱ្យមង្គលការនេះសឹងក្លាយទៅជាកន្លែងបញ្ចាំងកុនហ្វ្រី។ មូលហេតុនេះហើយ ទើបបានជាគូស្នេហ៍មួយចំនួនខ្លាចរអាក្នុងការបើកបង្ហាញអាពាហ៍ពិពាហ៍របស់ខ្លួននៅកន្លែងសាធារណៈ។

ប្រិយមិត្តយល់យ៉ាងណាដែរ?

ប្រែសម្រួល៖ សន្យា

ចុចអាន៖ អាពាហ៍ពិពាហ៍តួឯកក្នុងរឿង “ Crash Landing on You “ មាន ៤ ចំណុចដែលគេចាប់អារម្មណ៍ខ្លាំងបំផុត

ចុចអាន៖ រ៉ូបកូនក្រមុំ ៣ឈុត របស់ Son Ye Jin តម្លៃជិត ១០ម៉ឺនដុល្លារ