ខ្លះៗពីទិវាកុហក ១ មេសា ឬ April Fools’ Day

“April Fools’ Day” ឬខ្មែរហៅថា ជាថ្ងៃ​នៃការកុហក គឺកំពុងពេញនិយមខ្លាំងមែនទែនសម្រាប់ប្រទេសលោកខាងលិច ។ ទិវាកុហកនេះ​មានតែមួយថ្ងៃប៉ុណ្ណោះ គឺថ្ងៃទី១ ខែមេសានេះឯង ដូច្នេះមនុស្សដែលចូលចិត្ត​និយាយកុហក ក៏ដូចជាលេងសើចខ្លាំងបានចាត់ទុកថ្ងៃនេះជាឱកាសពិសេសរបស់ពួកគេ ។ នេះបើយោងតាមរបាយការណ៍ពីគេហទំព័រ History ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិវានេះ ត្រូវបានប្រារព្ធអស់រយៈពេលជាច្រើនសតវត្សមកហើយដោយវប្បធម៌ផ្សេងៗគ្នា ទោះបីជាប្រភពដើមពិតប្រាកដនៃទិវាមួយនេះនៅតែជាអាថ៌កំបាំងក៏ដោយ ។ វាប្រហាក់ប្រហែលទៅនឹងពិធីបុណ្យ Holi នៅក្នុងប្រទេសឥណ្ឌា ក៏ដូចជា ពិធី Hilaria នៃទីក្រុងរ៉ូមបុរាណដែលប្រារព្ធឡើងនៅថ្ងៃទី២៥ ខែមីនា ។

ទោះយ៉ាងណា ប្រវតិ្តសាស្រ្តខ្លះសន្មត់ថា April Fools’ Day គឺមានអាយុកាលតាំងពីឆ្នាំ ១៥៨២ មកម្ល៉េះ នៅពេលដែលប្រទេសបារាំងបានប្តូរពីប្រតិទិនជូលៀនទៅជាប្រតិទិន Gregorian ។ នៅក្នុងប្រតិទិនជូលៀន វាដូចនៅក្នុងប្រតិទិនហិណ្ឌូផងដែរ ពោលឆ្នាំថ្មីបានចាប់ផ្តើមជាមួយនិទាឃរដូវនៅថ្ងៃទី១ ខែមេសា ។

ចំណែកនោចក្រភពអង់គ្លេស ទិវា April Fools’ Day បានរីកសាយភាយពាសពេញផ្ទៃប្រទេស ក្នុងអំឡុងសតវត្សទី ១៨ ខណៈនៅស្កុតឡេន ចាត់ទុកថ្ងៃទី១ ខែមេសាគឺជាថ្ងៃ Gowkie ដែលជានិមិត្តសញ្ញានៃមនុស្សល្ងីល្ងើ និងអ្នកមានសាហាយស្មន់ ។

ដោយឡែក សម័យទំនើបវិញ ការលេងសើចបែបនេះ គឺមានស្ទើរគ្រប់ប្រទេសទូទាំងពិភពលោកទៅហើយ មិនថាតែនៅអាស៊ី អឺរ៉ុប​ អាមេរិកនោះឡើយ ប៉ុន្តែ​វាមានការពេញនិយមខ្លាំងនៅប្រទេសប៉ែកអឺរ៉ុប និងអាមេរិក​ ដូចជា សហរដ្ឋអាមេរិក អង់គ្លេស បារំាង ស្កុតឡេន អ៊ីតាលី អេស្ប៉ាញ ព័រទុយហ្គាល់ ស៊ុយអែត អាល្លឺម៉ង់ ន័រវែសជាដើម ខណៈនៅអាស៊ីវិញ ការលេងសើចបែបនេះក៏មានការពេញនិយមដូចគ្នា ។

ទោះបីវាជាការលេងសើចក៏ដោយ ប៉ុន្តែ​មិនមែនរាល់គ្រប់គ្នាសុទ្ធតែចូលចិត្ត​នូវទង្វើនេះឡើយ ​។ ការលេងសើចបែបនេះ ពេលខ្លះបានធ្វើឲ្យប៉ះពាល់ផ្លូវអារម្មណ៍អ្នកដទៃក៏មាន ដូច្នេះសូមយកថ្ងៃ April Fools’ Day ជាថ្ងៃដ៏ល្អវិសេស និងថ្ងៃដែលយើងគ្រប់គ្នាប្រារព្ធលេងសើចសប្បាយ តែមិនប៉ះធ្ងន់ដល់អារម្មណ៍អ្នកជុំវិញខ្លួន ៕

ចុចអាន ៖ កម្លាំងទ័ពជើងទឹក មីយ៉ាន់ម៉ា ប្រើនាវាចម្បាំងបាញ់ផ្លោងដាក់អ្នកភូមិ