KPT+

មេរៀនជម្នះឧបសគ្គគ្រាលំបាកមិនបោះបង់ពីស្ថាបនិកមាន់បំពង KFC មុនជួបជោគជ័យ

បានផុស

១ ខែ មុន

នៅ

ថ្ងៃចន្ទ ១៩ កុម្ភៈ ២០២៤

ដោយ

ប្រិយមិត្តប្រាកដជាធ្លាប់បានដឹងខ្លះមកហើយអំពីប្រវត្តិជីវិតរបស់ស្ថាបនិកមាន់បំពង KFC (Kentucky Fried Chicken) គឺលោក Colonel Sanders ។ មុននឹងឈានដល់ជោគជ័យសម្រាប់បណ្តាញភោជនីយដ្ឋានប្រភេទអាហារ FastFood នេះឡើង សហគ្រិនជនជាតិអាមេរិក ដែលជានិមិត្តរូបនៃប្រេន KFC នេះបានឆ្លងកាត់បទពិសោធលំបាកៗជាច្រើន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណ៍ទាំងនេះហើយដែលបានផ្តល់ជាមេរៀនគំរូដល់សហគ្រិនជំនាន់ក្រោយៗជាច្រើន ពិសេសការជម្នះនឹងឧបសគ្គមិនរាថយ ទោះបីលោកមានវ័យច្រើន បើធៀបនឹងកម្លាំងសកម្មក្នុងកិច្ចការសហគ្រិននោះក៏ដោយ ហើយនេះជាចំណុច ៤ យ៉ាងដែលយើងអាចយកមករៀនសូត្របាន៖

១. ដួលហើយងើបវិញ

បរាជ័យកើតមានលើមនុស្សគ្រប់គ្នាមិនប្រកាន់មុខឬឋានៈ ដែលអាចចៀសផុតឡើយ។ ប្រសិនបើមិនធ្លាប់ជួបបរាជ័យ មានន័យថាគឺពុំធ្លាប់បានព្យាយាមសាកល្បងអ្វីថ្មីសោះឡើយ។ ត្រឡប់មករឿង លោក Colonel Sanders វិញ គឺលោកធ្លាប់បើកភោជនីយដ្ឋានដ៏ជោគជ័យមួយប៉ុន្តែកាលនោះអ្វីដែលមិនអាចរំពឹងទុកបានកើតឡើង ដោយសារអាជ្ញាធរត្រូវលើកផ្លូវហាយវ៉េដែលនៅទល់មុខភោជនីយដ្ឋានរបស់គាត់ទៅដាក់ទីតាំងថ្មី ដែលធ្វើឲ្យភ្ញៀវរបស់គាត់ខើចទៅៗរហូតដល់ពេលមួយដែលគាត់ត្រូវដាច់ចិត្តលក់ភោជនីយដ្ឋាន ហើយនៅពេលនោះគឺលោកមានអាយុ ៦៦ ឆ្នាំទៅហើយ ។

គ្រប់គ្នាអាចគិតថាអស់សង្ឃឹមនឹងស្ថានភាពមួយនោះ ប៉ុន្តែលោក Sanders បែរជាមិនរអ៊ូរបន្ទោសសំណាងអាក្រក់ ឬនរណាមួយនោះទេ ជំនួសវិញលោកបែរជាផ្តោតលើវិធីអ្វីដែលលោកអាចជម្នះ និងស្តារស្ថានភាពនោះឡើងវិញ។ ហេតុនេះបានជាគេច្រើនហៅលោកថា មនុស្សដួលហើយ ក្រោកឡើងវិញ។

២. ធ្វើអ្វីឲ្យសម្រេចបានជាសមិទ្ធិផលពីអ្វីដែលអ្នកមាន

ភាគច្រើនពេលជួបស្ថានភាពមិនល្អមនុស្សជាច្រើនអាចបន្ទោស ហើយផ្តោតលើអ្វីដែលពួកគេគ្មាន។ ប៉ុន្តែជាការពិតពួកគេមើលរំលងលើអ្វីដែលគេកំពុងមានក្នុងដៃ ហើយនេះជាអ្វីដែលលោក Sanders មិនមើលរំលង ។ ក្រោយពេលភោជនីយដ្ឋានលោកជួបបញ្ហា លោកសឹងបាត់បង់អ្វីៗគ្រប់យ៉ាងក្នុងកិច្ចការរកស៊ី ប៉ុន្តែលោកនៅមានអ្វីមួយ នោះគឺរូបមន្តពិសេសនៃមាន់បំពងរបស់លោក ។ ដូចនេះសហគ្រិនអាមេរិករូបនេះក៏បង្កើតប្រភពចំណូលពីរូបមន្តដែលលោកមាន .លោកក៏បានសម្រេចលក់ផ្គត់ផ្គង់មាន់បំពងទៅដល់ភោជនីយដ្ឋាននានា ហើយចំណុចនេះក៏បង្ហាញជាមេរៀនថាសហគ្រិនចេះបង្កើតឱកាសពីអ្វីដែលពួកគេមាននៅក្នុងដៃជាមូលដ្ឋានដើម្បីផ្លាស់ប្តូរស្ថានភាពដែលជួបបញ្ហា។

៣. គ្មានលេស

គួរសម្គាល់ដែរថាដើម្បីលក់មាន់បំពងរបស់គាត់ សហគ្រិន Sanders ត្រូវចុះដល់កន្លែងភោជនីយដ្ឋាននានាដោយផ្ទាល់ដើម្បីលក់ ។ មានពេលច្រើនដងណាស់ដែលលោកត្រូវសម្រាកនៅក្នុងឡាន ហើយអ្វីដែលគួរស្ញើចសរសើរនោះគឺលោកមានវ័យ ៦៦ ឆ្នាំទៅហើយ ។ ក្នុងស្ថានភាពនេះ លោកអាចមានលេសដូចជា “ខ្ញុំចាស់ពេកហើយសម្រាប់់រឿងនេះ” ឬ “ខ្ញុំមិនអាចហត់ហើយសម្រាកក្នុងឡាននោះទេ” ។ ប៉ុន្តែផ្ទុយមកវិញនេះមិនមែនជាលេសក្នុងកិច្ចការរកស៊ីសម្រាប់សហគ្រិនដែលមានដើមកំណើតនៅរដ្ឋ Indiana សហរដ្ឋអាមេរិករូបនេះនោះឡើយ។ ជាមេរៀនដែលអ្នកគ្រប់គ្នាអាចរៀនសូត្រពីលោក គឺភាពជោគជ័យស្រលាញ់ពេញចិត្តអ្នកដែលព្យាយាមមិនប្រកាន់ខ្លួន ហើយលោក Sanders ជាប្រភេទមនុស្សដែលពុំបង្កើតលេសសម្រាប់ភាពជោគជ័យ។

៤. មិនបោះបង់ងាយៗដរាបណានៅតែមានឱកាស

វាពុំមែនជារឿងងាយស្រួលពេកទេក្នុងរបៀបដែលអតីតម្ចាស់ហាងអាហារត្រូវចុះលក់ ដូចលោក Sanders ជាឧទាហរណ៍។ ប្រាកដណាស់ លោកក៏ត្រូវជួបនឹងការបដិសេធមិនទិញផងដែរ។ ប៉ុន្តែការណ៍នេះមិនបានបញ្ឈប់លោកពីការលក់នោះទេ ។ លោកនៅតែបន្តចុះលក់ រហូតដល់ពេលដែលគេហៅលោកថាជាមនុស្សមិនចុះចាញ់ងាយៗឡើយ បើលោកនៅតែមានឱកាស ។ ហើយដោយសារតែភាពមិនចុះចាញ់ងាយៗទើបធ្វើឲ្យលោកមានហាងជាច្រើនទទួលទិញ ហើយដោយសារតែភាពព្យាយាមនេះ ទើបធ្វើឲ្យ KFC របស់លោកទទួលភាពជោគជ័យមកទល់ពេលនេះ ។

ទន្ទឹមនោះ មេរៀនពីក្នុងចំណុចទាំងប៉ុន្មាននេះក៏បានបង្រៀនដែរថា ដរាបណានៅតែមានឱកាសសម្រាប់កែខៃស្ថានភាពមិនល្អ គឺអ្នកនៅតែអាចធ្វើបាន បើអ្នកមានឆន្ទៈពិតប្រាកដសម្រាប់ជម្នះរឿងលំបាកៗទាំងនោះ ដើម្បីឈានជើងទៅដល់កន្លែងអ្នកដែលចង់បាន ៕

ដោយ៖ មាន រតនា