ពលរដ្ឋស្នើ​ឲ្យ​សាងសង់​រូបសំណាក​នៅ​រង្វង់​មូលខ្លាស្ទុះ ខណៈ​ជា​អត្តសញ្ញាណ​ខេត្ត​ក្រចេះ

អាជ្ញាធរខេត្តក្រចេះ កំពុង​សិក្សា​លទ្ធភាព​ដើម្បី​ឈាន​ទៅ​សាងសង់រូបសំណាករង្វង់មូលខ្លាស្ទុះ រួម​ទាំង​រង្វង់​មូលក្បាលស្ពានឆ្លងទន្លេមេគង្គ ស្របពេលខេត្តក្រចេះកំពុងទទួលបានសមិទ្ធជាប្រវត្តិ​សាស្ត្រនូវស្ពានឆ្លងទន្លេមេគង្គ ផ្លូវបេតុង ផ្លូវក្រាលកៅស៊ូខ្វាត់ខ្វែងពីទីប្រជុំជនរហូតដល់ជនបទ។

កាលពីពេល​ថ្មីៗនេះ ពលរដ្ឋ​លើកឡើងអំពីរង្វង់មូលខ្លាស្ទុះ ដោយឃើញមាន​ការ​ចាប់អារម្មណ៍ទៅលើរូបសំណាក​ខ្លាមួយ​គូអមដោយសំណេរថា «រង្វង់មូលខ្លាស្ទុះខេត្តក្រចេះ បើរៀបចំដូចរូបនេះបងប្អូនមានយោបល់យ៉ាងម៉េចដែរ? គ្រាន់​តែ​ជ្រុងមួយនៃគំនិតទេ»។

លោក ឈឺន រិទ្ធ ចៅសង្កាត់អូរឬស្សី បានឱ្យដឹងថា ពាក់ព័ន្ធ​មានការ​លើកឡើងដើម្បី​សាងសង់រូបសំណាក​នៅរង្វង់មូលខ្លា​ស្ទុះ លោក​បាន​ឆ្លងយោបល់ទៅ​អភិបាលខេត្តរួច​ហើយ​ ខណៈ​លោក​អភិបាលខេត្តក៌បានឯកភាព ប៉ុន្តែឥឡូវ​នេះ​ថវិការបស់ខេត្តពុំទាន់មានលទ្ធភាព ពីព្រោះធម្មតារូបសំណាកក្នុងគម្រោងទាំងមូលគ្រោងចំណាយថវិកាសរុបប្រមាណជាង ២០ ម៉ឺនដុល្លារ។

រូបសំណាកខ្លាស្ទុះ​ដែលគ្រោងសាងសង់​មាន​កម្ពស់ ៧ ម៉ែត្រ។ សម្តេចតេជោ ហ៊ុន សែន​ ធ្លាប់បាន​រំលឹកអំពីរង្វង់មូលខ្លាស្ទុះ ពេលសម្តេចអញ្ជើញមកសម្ពោធផ្លូវជាតិលេខ ៧ ហើយប្រជាពលរដ្ឋអ្នកស្រុក​ក៏​ដូចជា​អ្នក​ធ្វើដំណើរឆ្លងកាត់ក៏​ស្គាល់រង្វង់មូលនេះច្បាស់​ជាអត្តសញ្ញាណ​របស់​ខេត្ត​ក្រចេះ។

បើតាម លោក ឈឺន រិទ្ធ ចៅសង្កាត់អូរឬស្សីបានបញ្ជាក់​ថា រង្វង់មូលខ្លាស្ទុះនេះពលរដ្ឋក្នុង​​ខេត្ត​ស្គាល់​ជា​ទូទៅ បើ​ទោះ​បីជា​ដាក់រូបសំណាកអ្វីក៏ដោយ ​ក៏នៅតែឈ្មោះរង្វង់មូលខ្លាស្ទុះដែរ។

លោក ម៉ែន វណ្ណា នាយករដ្ឋបាលខេត្តក្រចេះបានឱ្យដឹងថា ចំពោះរូបសំណាករង្វង់មូលខ្លាស្ទុះ ថ្នាក់ដឹកនាំខេត្តបានគិតគូរ ប៉ុន្តែមិនទាន់សម្រេចថាដាក់រូបអ្វីឱ្យត្រូវទីតាំងហ្នឹងទេ ប៉ុន្តែមុននិងក្រោយគឺត្រូវតែដាក់៕

អត្ថបទ៖ ប្រុញ វិធិន