ព័ត៌មានជាតិ

ទេសរដ្ឋមន្ត្រី គន់ គីម ជំរុញឱ្យប៉ុស្តិ៍ សង្កាត់យកចិត្តទុកដាក់ដល់អតីតយុទ្ធជននិងវិវត្តជន ដើម្បីជួយពួកគាត់ទាន់ពេល

បានផុស

៨ ខែ មុន

នៅ

ថ្ងៃសុក្រ ២១ វិច្ឆិកា ២០២៥

ដោយ

លោកនាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និង ជាអគ្គលេខាធិការ សមាគមអតីតយុទ្ធជន និងនិវត្តជនកម្ពុជា អ.ន.ក. បានជំរុញឱ្យប៉ុស្តិ៍និងសង្កាត់ យកចិត្តទុកដាក់ដល់អតីតយុទ្ធជននិងវិវត្តជនកម្ពុជានៅក្នុងរាជធានីភ្នំពេញ ដើម្បីទទួលបាននូវព័ត៌មានពិតច្បាស់លាស់ នៅពេលមានបញ្ហាអ្វីមួយយើងអាចទាក់ទងជួយពួកគាត់បានភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញរបស់លោក នាយឧត្តមសេនីយ៍ កិត្តិសង្គហបណ្ឌិត បានធ្វើឡើងនារសៀលថ្ងៃទី២១ ខែវិច្ឆិកា ឆ្នាំ២០២៥នេះ ក្នុងពិធីប្រកាសសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជា រាជធានីភ្នំពេញ នៅសាលារាជធានីភ្នំពេញ។

លោក នាយឧត្តមសេនីយ៍ កិត្តិសង្គហបណ្ឌិត បានមានប្រសាសន៍ថា អតីតយុទ្ធជននិងនិវត្តជនពួកគាត់ពិតជាបានលះបង់ធំធេងណាស់ សម្រាប់ជាតិមាតុភូមិ ដូច្នេះហើយ ទើបសម្ដេចអគ្គមហាសេនាបតីតេជោហ៊ុនសែន បង្កើតឱ្យមានសមាគមន៍នេះឡើង គឺដើម្បីឱ្យយើងជួយមើលថែចិញ្ចឹម ពួកគាត់។ បន្ថែមពីនេះ លោកបានណែនាំឱ្យប៉ុស្តិ៍ សង្កាត់ បើមានអតីតយុទ្ធជន និងនិវត្តជនណាម្នាក់ស្លាប់នៅក្នុងមូលដ្ឋានរបស់ខ្លួន ត្រូវចូលរួមបុណ្យសពរបស់គាត់ដល់ខ្នងផ្ទះ។

លោកបានបន្តថា រាជធានីភ្នំពេញមានទំហំធំណាស់ ដូច្នេះការងារពាក់ព័ន្ធនឹងអតីតយុទ្ធជននិងវិវត្តជន ក៏មានទំហំការងារធំណាស់ដែរ ដោយនៅរាជធានីភ្នំពេញមានអតីតយុទ្ធជននិងនិវត្តជន រហូតទៅដល់ជិត៤ម៉ឺននាក់ ហើយកិច្ចការងារនេះគឺសម្ដេចព្រឹទ្ធបណ្ឌិតប៊ុនរ៉ានី ហ៊ុនសែនបានយកចិត្តទុកដាក់ខ្លាំងណាស់។

លោកកិត្តិសង្គហបណ្ឌិតបានបញ្ជាក់ថា ការរៀបចំពិធីប្រកាសសមាសភាព គណៈកម្មាធិការរាជធានី គឺជាការ ជំរុញបន្ថែមទៀតនូវការសម្របសម្រួល និង ការយកចិត្តទុកដាក់ពី សំណាក់ថ្នាក់ដឹកនាំសមាគមរាជធានីជូន អតីយុទ្ធជននិងនិវត្តជនក្នុង មូលដ្ឋានរបស់ខ្លួន។

លោក កិត្តិសង្គហ បណ្ឌិត គន់ គីម បានបន្តថា៖សម្តេច អគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែតតែងតែយកចិត្តទុកដាក់គិតគូរចំពោះ ជីវភាពរស់នៅរបស់អតីតយុទ្ធជន ដែលមានគុណបំណាច់ដ៏ធំធេងមិនអាចកាត់ថ្លៃបានក្នុងការលះបង់ ដើម្បី បុព្វហេតុរំដោះជាតិនាំមកនូវសុខសន្តិភាពនិងការ អភិវឌ្ឍរីកចម្រើនរហូតដល់សព្វថ្ងៃ។

លោក ឃួង ស្រេង អភិបាល នៃគណៈអភិបាលរាជធានី ភ្នំពេញ និងជាប្រធានគណៈកម្មាធិការ អ.ន.ក.រាជធានីភ្នំពេញ ដែលទើបទទួលបានការតែងតាំងថ្មី ក្នុងឱកាសនោះបានសម្ដែងនូវការអរគុណចំពោះសម្ដេចអគ្គមហាសេនាបតីតេជោហ៊ុន សែនដែលបានផ្ដល់ទំនុកចិត្តតែងតាំងលោកបានធ្វើជាប្រធានគណៈកម្មាធិការ អ.ន.ក.រាជធានីភ្នំពេញ។

ដើម្បីឆ្លើយតបទៅនឹងទំនុកចិត្តរបស់សម្ដេចតេជោហ៊ុនសែន លោក សូមប្តេជ្ញាចិត្តគោរពតាម ការសម្រេចចិត្តរបស់គណៈកម្មាធិការសមាគមអតីតយុទ្ធជន និងនិវត្តជនកម្ពុជា ពង្រឹងសាមគ្គីភាពផ្ទៃក្នុង ដើម្បីបន្តដឹកនាំសមាគមន៍ឲ្យរីកចម្រើនបន្ថែមទៀត។ ប្ដេជ្ញាចិត្តគោរពនិងប្រតិបត្តិយ៉ាងខ្ជាប់ខ្ជួននូវ លក្ខន្តិកៈរបស់សមាគម ,យកចិត្តទុក ដាក់ខ្ពស់ចំពោះសុខុមាលភាពនិងជីវភាពរបស់សមាជិក ផ្តល់ការគាំទ្រចំពោះសមាជិក ដែលជួបការខ្វះខាតកំពុងមានជំងឺ ផ្តល់ការឧបត្ថម្ភដល់ គ្រួសារសមាជិកដែលបានទទួល មរណភាពឲ្យទាន់ពេលវេលា សំដៅរួមចំណែកសម្រាលទុក្ខលំបាករបស់ពួកគាត់។

គួរបញ្ជាក់ថា ពិធីនេះត្រូវបានប្រកាសឱ្យលោក ឃួង ស្រេង អភិបាល នៃគណៈអភិបាលរាជធានី ភ្នំពេញ ជាប្រធានគណៈកម្មាធិការ អ.ន.ក.រាជធានីភ្នំពេញ លោក ម៉ប់ សារិន ប្រធានក្រុមប្រឹក្សារាជធានី ជាអនុប្រធានកិត្តិយសគណៈកម្មាធិការ អ.ន.ក.រាជធានី,លោកស្រី តិមា វិច្ឆិកាល អភិបាលរង នៃគណៈអភិបាលរាជធានីភ្នំពេញ,លោក ឧត្តមសេនីយ៍ទោ ជួន ណារិន្ទ ស្នងការនរគបាលរាជធានី និងលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ ជាអនុប្រធាន ជាមួយនិងការប្រកាសជាសមាជិកជាច្រើនរូបទៀត។

ក្នុងឱកាសនោះលោកនាយឧត្តមសេនីយ៍ កិត្តិសង្គហបណ្ឌិត គន់ គីមបានផ្ដល់សម្ភារបរិក្ខាមួយចំនួនដល់គណៈកម្មាធិការសមាគមអតីតយុទ្ធជន និងនិវត្តជនកម្ពុជា រាជធានីភ្នំពេញ សម្រាប់បម្រើការងារហើយលោក ឃួង ស្រេង អភិបាល នៃគណៈអភិបាលរាជធានី ភ្នំពេញក៏បានឧបត្ថម្ភថវិកាដល់អតីតយុទ្ធជននិងវិវត្តជននៅរាជធានីភ្នំពេញក្នុងម្នាក់១០ម៉ឺនរៀល៕

ដោយ ៖ ស្រីរ័ត្ន