ពលរដ្ឋសាទរ អាជ្ញាធរខណ្ឌពោធិ៍សែនជ័យ ស្តារប្រព័ន្ធលូ កាយយកកាកសំណល់ចេញពីក្នុងប្រឡាយមេសំខាន់ៗ

ប្រឡាយមេសំខាន់ៗ ក្នុងមូលដ្ឋានខណ្ឌពោធិ៍សែនជ័យ ត្រូវបានស្តារ និងកាយកាកសំណល់ចេញធើ្វឲ្យលំហូរទឹកហូរបានល្អប្រសើរជាងមុន និង ជួយរំដោះទឹកបានពីការលិចលង់កម្រិតខ្ពស់ ក្នុងមូលដ្ឋាន ពលរដ្ឋសាទរ និង សប្បាយចិត្ត សម្ដែងការអរគុណ ដល់អាជ្ញាធរខណ្ឌបានយកចិត្តទុកដាក់ពីការលំបាករបស់ពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ាង លីដា អភិបាលរងខណ្ឌពោធិ៍សែនជ័យ ទទួលបន្ទុកការងារសណ្តាប់ធ្នាប់ និងសាធារណការ បានឲ្យដឹងថា ដោយមានការជំរុញពីថ្នាក់ដឹកនាំ ក្រសួងពាក់ព័ន្ធក៏ដូចជា រដ្ឋបាលរាជធានីភ្នំពេញ កិច្ចការងារកាយ ស្តារប្រព័ន្ធលូ និង ប្រឡាយបង្ហូរទឹកនេះ គឺទាមទារឲ្យមានការចូលរួមសហការល្អពីគ្រប់មជ្ឈដ្ឋានពាក់ព័ន្ធទាំងអស់ ពិសេសប្រជាពលរដ្ឋដែលរស់នៅជាន់ទីតាំងប្រឡាយផ្ទាល់តែម្ដង។

លោកបន្ថែមថា បច្ចុប្បន្នប្រឡាយមេសំខាន់ៗជាច្រើន ត្រូវបានកាយបានធំដើម្បីបើកមុខទឹក និងកាយជម្រៅទៅក្រោមឲ្យបានជ្រៅ ដើម្បីទទួលទឹកក្នុងបរិមាណច្រើន អាចហូរបានលឿនផងដែរ។

លោក អឿន ម៉ៅ ជាប្រជាពលរដ្ឋបង្ហាញក្តីរីករាយ ក្រោយឃើញប្រឡាយធំ និងកាយបានស្អាតល្អ និងគាំទ្រចំពោះសកម្មភាពយកចិត្តទុកដាក់របស់អាជ្ញាធរមូលដ្ឋាន ដែលតែងគិតគូរលើការងារប្រព័ន្ធលូបង្ហូរទឹកនេះ។ លោកសង្ឃឹមជឿជាក់ថា នឹងលែងមានការជន់លិចដូចសព្វមួយដង ដែលពេលភ្លៀងកន្លងមកគឺជន់លិចហូរកាត់ផ្លូវ។

គួរបញ្ជាក់ថា ក្នុងរាជរដ្ឋាភិបាលអាណត្តិទី៧នេះ រដ្ឋាភិបាលបានដាក់ចេញនូវគោលបំណងប្រកបដោយការប្ដេជ្ញាចិត្តខ្ពស់សំដៅក្នុងការឈានបញ្ចប់បញ្ហាទឹកជន់លិច រាជធានីភ្នំពេញក្នុងរយៈពេល៥ឆ្នាំ គិតចាប់ពីឆ្នាំ២០២៣ ដល់ឆ្នាំ២០២៧ខាងមុខ៕ អត្ថបទ៖ សុភា