ផ្លូវមហាវិថី​ពីរង្វង់មូលព្រាបស ដល់រង្វង់មូលខ្លាស្ទុះ​​ក្រុង​ក្រចេះ ចាប់ផ្ដើមរៀបចំក្រាលការ៉ូឡា​លម្អ​បន្ថែម

កំណាត់ផ្លូវខេត្តលេខ ៣៧៧ ឬផ្លូវមហាវិថីសម្ដេចតេជោ ហ៊ុន សែន ចាប់ពីរង្វង់មូលព្រាបស រហូតដល់រង្វង់មូលខ្លាស្ទុះ ស្ថិត​នៅ​ក្នុងសង្កាត់អូរឫស្សី និងសង្កាត់ក្រចេះ ក្នុងក្រុងក្រចេះ ខេត្តក្រចេះ បានចាប់ផ្ដើមរៀបចំក្រាលការ៉ូឡាសួនច្បារ និងត្រៀមរៀបចំអ៊ុតក្រាលកៅស៊ូម្តងទៀត។

រចនាបថសួនច្បារនេះ មានទំហំទទឹង ២ ម៉ែត្រ កម្រាស់​ ១តឹក ដោយអមទាំងសងខាងបណ្តោយដងផ្លូវមហាវិថីសម្ដេច​តេជោ ហ៊ុន សែន ដែលសម្រួលដល់ពលរដ្ឋធ្វើដំណើរថ្មើរជើង និងរត់ហាត់ប្រាណនាពេលព្រឹកនិងពេលរសៀល និងជាការលើកកម្ពស់សោភណ្ឌភាពផ្លូវក្នុងក្រុងឱ្យកាន់តែប្រសើរឡើង។

កម្មកររៀបសួនម្នាក់បានឱ្យដឹងថា តាមគម្រោងសួននេះត្រូវរៀបចំពីរង្វង់មូលខ្លាស្ទុះ រហូតដល់តារាបាល់ទាល់ខេត្ត​។

ពាក់ព័ន្ធ​ដុំការ៉ូឡារៀប កម្មករ​ដដែល​បាន​បញ្ជាក់ថា​ធ្វើឡើងដោយក្រុមការងារស្ថាបនាផ្លូវតែម្តង ហើយក្នុងមួយថ្ងៃធ្វើការទទួលបានប្រាក់ឈ្នួលពី ១២ ដុល្លា ទៅ ១៣ ដុល្លាក្នុងម្នាក់ៗ។

ផ្លូវមហាវិថីសម្ដេចតេជោ ហ៊ុន សែន (រង្វង់មូលព្រាបស – រង្វង់មូលខ្លាស្ទុះ) ត្រូវបានពង្រីកពី ២ គន្លង ទៅជា ៤ គន្លងទៅមក និងមានរៀបចំជាសួនពុះចែកទ្រូងផ្លូវ និងការរៀបចំឃឿនចិញ្ចើមផ្លូវសងខាង បច្ចុប្បន្ន កំណាត់ផ្លូវភ្លោះមួយខ្សែនេះ ក៏ត្រៀមនឹងចាក់ក្រាលកៅស៊ូជាលើកទី២ផងដែរ៕

អត្ថបទ៖ ប្រុញ វិធិន