លក់តែតាមចិញ្ចើមផ្លូវ ក្នុងមួយថ្ងៃបុរសម្នាក់អាចលក់ផ្លែទន្លាប់អស់ ២០០គីឡូក្រាម

ផ្លែទន្លាប់ដែលនាំចូលពីបរទេសដោយគ្មានជាតិចត់ មានតែរសជាតិផ្អែម ធ្វើឱ្យបុរសម្នាក់ទទួលយកមកលក់បន្តក្នុងមួយថ្ងៃអាចលក់អស់ជាង ២០០គីឡូក្រាម ដោយសារតែគាត់ដាក់លក់តាមដងផ្លូវ ហើយមានតម្លៃថោកជាងនៅទីផ្សារ។

លោក សោម វីរៈ ជាអ្នករស់នៅក្រុងបាត់ដំបង បានរៀបរាប់ថា លោកជាអ្នករកស៊ីលក់ផ្លែឈើជាយូរមកហើយ បើដល់រដូវផ្លែទុរេន គឺលោកលើកយកផ្លែទុរេនតាមចំការសំឡូតមកដឹកលក់តាមរថយន្តរបស់លោកនៅតាមផ្លូវក្បែរមាត់ស្ទឹងសង្កែ គឺលក់នៅពេលថ្ងៃរសៀលដល់យប់ ដែលសម្បូរមនុស្សម្នាទិញយកទៅពិសា។ ប៉ុន្តែក្រោយពីផុតរដូវផ្លែទុរេន លោកក៏បានទិញផ្លែឈើប្រភេទផ្សេងៗ យកមកលក់តាមរថយន្តដដែល ដូចជាសាវម៉ាវ ផ្លែក្រូចចិន និងផ្លែទន្លាប់ជាដើម ហើយទីតាំងគឺលោកលក់តាមដងផ្លូវដូចពីមុន ដែលភ្ញៀវធ្វើដំណើរឆ្លងកាត់ឃើញក៏អាចជួយទិញយកទៅពិសាផងដែរ។

លោកវីរៈ បានបញ្ជាក់បន្ថែមថា សម្រាប់ផ្លែទន្លាប់ ដែលលោកលើកពីគេយកមកលក់នេះ គឺគេបានបញ្ជាក់ថាការនាំចូលគឺមកពីប្រទេសចិន ព្រោះប្រទេសសៀមយើងលេងទិញយកមកលក់ហើយ ដោយសារតែបញ្ហាព្រំដែន ហើយសម្រាប់ផ្លែទម្លាប់នេះ គឺលោកលក់ក្នុងតម្លៃទាបជាងទីផ្សារ។

លោកក៏បានសង្កត់ធ្ងន់ថា ដោយសារផ្លែឈើទាំងនេះលោកបានលើកផ្ទាល់ពីឈ្មួញនាំចូល ដូច្នេះផ្លែទន្លាប់លោកលក់ត្រឹមតែ ៥.០០០ រៀលក្នុងមួយគីឡូក្រាម ដោយឡែកចំពោះទីផ្សារគឺតម្លៃចាប់ពី ៦.០០០ រៀល ទៅ ៧.០០០រៀលក្នុងមួយគីឡូក្រាម ហើយម្យ៉ាងទៀតលោកលក់យកចំណេញតិចតែឲ្យសម្បូរអ្នកទិញច្រើន វាប្រសើរជាងលក់យកចំណេញច្រើនទីបំផុតបាត់ម៉ូយអស់។ ដូច្នេះនៅក្នុងមួយថ្ងៃលោកលក់បានជាង ២០០ គីឡូក្រាមក៏លោកអាចរកប្រាក់ចំណូលបានសម្រាប់ទ្រទ្រង់ក្នុងជីវភាពគ្រួសារផងដែរ ដែលពីមុនលោកធ្លាប់លក់បានក្នុងមួយថ្ងៃជិត ៥០០ គីឡូក្រាមឯណោះ ប៉ុន្តែក្រោយពីមានសង្គ្រាមព្រំដែនកម្ពុជាថៃទើបលោកលក់បានថយបែបនេះ តែទោះបីជាយ៉ាងណាក៏លោកដាច់ខាតមិនយកផ្លែឈើពីប្រទេសសៀមមកលក់ទៀតឡើយ៕

អត្ថបទ៖ សោ និយមរ័ត្ន