អគ្គនាយកពន្ធនាគារចុះពិនិត្យពន្ធនាគារខេត្តពោធិ៍សាត់ ខណៈប្រធានពន្ធនាគារត្រូវផ្លាស់ប្ដូរ

លោកឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ បានចុះពិនិត្យដំណើរការការងារ ហេដ្ឋារចនាសម្ព័ន្ធ និងជួបសំណេះសំណាលជាមួយមន្ត្រីពន្ធនាគារខេត្តពោធិ៍សាត់ ព្រមទាំងសួរសុខទុក្ខជនជាប់ឃុំ។

ការចុះពិនិត្យនេះ គឺធ្វើឡើងបន្ទាប់ពីពិធីប្រកាសចូលកាន់មុខតំណែងប្រធានពន្ធនាគារខេត្តពោធិ៍សាត់ កាលពីរសៀលថ្ងៃទី២៨ ខែមករា ឆ្នាំ២០២៦ ដោយលោកវរអគ្គានុរក្សថ្នាក់លេខ២ ស៊ិន សុផាន់ណូ ត្រូវបានចូលកាន់មុខតំណែងជាប្រធានពន្ធនាគារថ្មីខេត្តពោធិ៍សាត់ ជំនួសលោកឧត្តមអគ្គានុរក្សថ្នាក់លេខ២ អ៊ី សំអុល ដែលត្រូវដាក់ឱ្យចូលនិវត្តន៍។

ថ្លែងក្នុងពិធីខាងលើ លោក ឈន សាណាត បានផ្តាំផ្ញើដល់មន្ត្រីពន្ធនាគារខេត្តពោធិ៍សាត់ទាំងអស់ ត្រូវប្រមូលផ្តុំការយកចិត្តទុកដាក់ការគ្រប់គ្រងមន្ត្រី បន្តដឹកនាំ រក្សាឱ្យបានស្ថានភាពជាវិជ្ជមាន និងរក្សាឱ្យបាននូវប្រព័ន្ធគ្រប់គ្រងប្រកបដោយភាពសុខដុមបនីយកម្ម ជាពិសេសពង្រឹងសាមគ្គីភាពផ្ទៃក្នុង ដោយតម្កល់ប្រយោជន៍របស់អង្គភាពជាធំ លើកកម្ពស់ក្រមសីលធម៌វិជ្ជាជីវៈ ជមួយនឹងភាពម្ចាស់ការលើភារកិច្ចដែលខ្លួនទទួលខុសត្រូវ។

លោកអគ្គនាយកពន្ធនាគារ បានចង្អុលបង្ហាញដល់ពន្ធនាគារខេត្តពោធិ៍សាត់ឱ្យបន្តពង្រឹងការអនុវត្តច្បាប់ ភ្ជាប់ជាមួយនឹងការពង្រឹងកិច្ចការពារធានាសន្តិសុខ សុវត្ថិភាព បង្កើនការយកចិត្តទុកដាក់ត្រួតពិនិត្យ ឆែកឆេររកវត្ថុសម្ភារហាមឃាត់ ជាពិសេសសម្ភារៈបង្កហានិភ័យ គ្រឿងញៀន និងទូរស័ព្ទដៃ ដែលជាមធ្យោបាយទំនាក់ទំនងសកម្មភាពល្មើស ទាំងនៅក្នុង និងទៅខាងក្រៅពន្ធនាគារ។

បន្ថែមពីនេះ បន្តយកចិត្តទុកដាក់ថែរក្សាសុខភាព អនាម័យ ទាំងក្នុងអគារបន្ទប់ឃុំឃាំង និងនៅក្នុងបរិវេណពន្ធនាគារ ធ្វើយ៉ាងណាត្រូវធានាឱ្យមាននូវរបៀបរៀបរយ សណ្តាប់ធ្នាប់ និងបរិស្ថានល្អ៕