រដ្ឋបាលព្រៃឈើខេត្តព្រះវិហារបង្ក្រាបរថយន្តដឹកឈើ១គ្រឿងដែលដឹកចេញពីតំបន់ព្រៃព្រះរកា

បន្ទាប់ពីទទួលបានសេចក្តីរាយការណ៍ពីប្រជាពលរដ្ឋ កម្លាំងជំនាញនៃរដ្ឋបាលព្រៃឈើខេត្តព្រះវិហារ បានចុះបង្ក្រាបរថយន្តសាំយ៉ុងដឹកឈើ១គ្រឿងរបស់ឈ្មោះ ខេង ដែលដឹកចេញពីតំបន់ព្រៃឈើព្រះរកា ក្នុងស្រុកជាំក្សាន្ត តាមផ្លូវជាតិលេខ៦២ឆ្ពោះទៅរាជធានីភ្នំពេញ។

សមត្ថកិច្ចជំនាញនៃខេត្តព្រះវិហារបានឲ្យដឹងថា នៅយប់ថ្ងៃទី៨ ខែកុម្ភៈ ឆ្នាំ២០២៦ កម្លាំងសមត្ថកិច្ចបានធ្វើការឃាត់រថយន្តសាំយុងមួយគ្រឿង នៅចំណុចភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ។ រថយន្តខាងលើពាក់ស្លាកលេខ បាត់ដំបង 2B-2271 ដែលគេដឹងថា ជារបស់ឈ្មួញឈ្មោះ លោក ខេង កំពុងដឹកផលអនុផលព្រៃឈើ។ ឈើដែលដឹកជញ្ជូននៅលើរថយន្តនោះមានចំនួន ៩ផ្លាន ដែលសង្ស័យថាត្រូវបានកាប់យកពីព្រៃធម្មជាតិ ដោយគ្មានលិខិតអនុញ្ញាតត្រឹមត្រូវតាមច្បាប់។

បច្ចុប្បន្ន រថយន្ត និងវត្ថុតាងផលអនុផលព្រៃឈើទាំងអស់ ត្រូវបានកម្លាំងជំនាញនាំយកទៅរក្សាទុកនៅទីស្នាក់ការផ្នែករដ្ឋបាលព្រៃឈើនៃខេត្តព្រះវិហារ ដើម្បីរៀបចំសំណុំរឿង និងអនុវត្តនីតិវិធីតាមច្បាប់។

សូមជម្រាបផងដែរថា បទល្មើសកាប់បំផ្លាញធនធានធម្មជាតិ ក្នុងខេត្តព្រះវិហារ នៅតែបន្តកើតមានឡើងយ៉ាងក្តៅគគុក ទោះបីជាសមត្ថកិច្ចបានរឹតបន្តឹងការត្រួតពិនិត្យជាបន្តបន្ទាប់ក៏ដោយ៕

អត្ថបទ៖ ជុន កុសល