គម្រោង​កែលម្អ​ លើកកម្ពស់​បរិស្ថាន​​ ​និង​សោភណភាព​ក្នុង​ក្រុង​ក្រចេះ​ សម្រេច​បាន​​លទ្ធផល​​​បន្ត​បន្ទាប់

ក្រសួងសាធារណការ និងអាជ្ញាធរខេត្តក្រចេះ បាន​បើកកិច្ចប្រជុំត្រួតពិនិត្យការអនុវត្តគម្រោងអភិវឌ្ឍន៍​ក្រុងរបៀង ៤ ដើម្បី​ឲ្យ​គម្រោងដំណើរការទាន់ពេលវេលា និងប្រកបដោយគុណភាព។

គណៈប្រតិភូក្រសួងសាធារណការ និងដឹកជញ្ជូន ធនាគារអភិវឌ្ឍន៍អាស៊ី ADB និងរដ្ឋបាលខេត្តក្រចេះ  កាលពីពេលថ្មីៗនេះ បានចុះត្រួតពិនិត្យវឌ្ឍនភាព អនុគម្រោងក្រុងរបៀង៤ ក្នុងក្រុងក្រចះរួមមាន៖ ១-អនុគម្រោងទីលានទុកដាក់សំរាម  ២-អនុគម្រោងការសាងសង់បណ្តាញលូរំដោះទឹកភ្លៀងនិងស្ថានីយ​បូមទឹក ៣-អនុគម្រោងលម្អរសោភណ្ឌភាពក្រុង  ៤-អនុគម្រោងកែលម្អទីលានចាក់សំរាមចាស់ ។

ក្រោយពីបានចុះត្រួតពិនិត្យរួចមក ក្រុមការងារបានរៀបចំកិច្ចប្រជុំនៅសាលប្រជុំរបស់រដ្ឋបាលខេត្ត ដើម្បីពិភាក្សា និងផ្លាស់ប្តូរយោបល់ក្នុងគោលបំណងដើម្បី​ឲ្យ​គម្រោងបានដំណើរការទាន់ពេលវេលា និងប្រកបដោយគុណភាព។

តាម​ការ​វាយតម្លៃ មន្ត្រីជំនាញក៏បានធ្វើបទបង្ហាញអំពីវឌ្ឍនភាពនៃគម្រោងទាំង ៤ ដែលបានកំពុង​តែ​ដំណើរការសាងសង់ ក្នុងនោះគម្រោងទីលានចាក់សំរាមបានបញ្ចប់តាំងពីអំឡុងខែសីហា ឆ្នាំ2023។

ការដឹកជញ្ជូនសំរាមនៅ​ក្រុងក្រចេះក្នុងមួយថ្ងៃមានចាប់ពីចន្លោះ ២០ ទៅ ២៥ តោន ក្នុងនោះក្រុមប្រឹក្សា​បច្ចេកទេសក៏បានផ្ដល់វគ្គសិក្សាខ្លីៗនៅក្នុងការគ្រប់គ្រងថវិកា និងគ្រប់គ្រងគម្រោងតាមរយៈក្រុមប្រឹក្សាបច្ចេកទេស ក្នុងនោះក៏មានគម្រោងនៃការគ្រប់គ្រងទឹកកខ្វក់ផងដែរ។

គម្រោងទី២ ដែលជាគម្រោងគ្រប់គ្រងប្រព័ន្ធរំដោះទឹកភ្លៀង ក៏បានអនុម័តនៅក្នុងការសាងសង់រយៈពេល ១៧ ខែ ចាប់ផ្ដើមសាងសង់ចាប់ពីថ្ងៃទី ១០ ខែកុម្ភៈ ឆ្នាំ២០២៥ ហើយគ្រោងបញ្ចប់ ១០០% នៅថ្ងៃទី៣០ ខែមិថុនា ឆ្នាំ២០២៦ ហើយបើគិតត្រឹមចុងខែកុម្ភៈ ឆ្នាំ២០២៦ ក្រុមហ៊ុនបានដំណើរការ​សាង​សង់​សម្រេចបាន ៨៤.៨២% ។

ដោយឡែក​គម្រោងកែលម្អក្រុងក្រចេះ ចាប់ផ្ដើមដំណើរការតាំងពីថ្ងៃទី៣ ខែកក្កដា ឆ្នាំ២០២៥ ដោយប្រើរយៈពេល ១២ ខែ ហើយក្រុមប្រឹក្សាបច្ចេកទេសក៏បានត្រួតពិនិត្យនិងអនុម័តដំណើរការសាងសង់ចាប់ពីថ្ងៃទី៨ ខែកញ្ញា ឆ្នាំ២០២៥ ហើយគ្រោងនឹងបញ្ចប់ការសាងសង់ នៅថ្ងៃទី៨ ខែកញ្ញា ឆ្នាំ២០២៦។ 

គម្រោងកែលម្អក្រុងក្រចេះ គឺមានការកែលម្អទីតាំងរង្វង់មូលព្រាបស .ទីតាំងសម្រាប់ហាត់ប្រាណ និងកន្លែង​សម្រាប់កុមារលេង និងការបំពាក់សូឡា​នៅតាមមាត់ទន្លេប្រវែង ២.៦ គីឡូម៉ែត្រ និងការកែលម្អរង្វង់​មូលនាគបាញ់ទឹក ឱ្យមានសោភ័ណ្ឌភាពស្អាត រហូតមកដល់ពេលនេះក្រុមហ៊ុនសម្រេចបាន ៧៥.៩១​%៕

អត្ថបទ៖ ប្រុញ វិធិន