ព័ត៌មានជាតិ

មនុស្យ១២៦នាក់ សង្ស័យវិជ្ជមានកូវីដ១៩ នេះបើតាមការយកសំណាកតាម Rapid Test

បានផុស

៥ years មុន

នៅ

ថ្ងៃអាទិត្យ ២៥ មេសា ២០២១

ដោយ

យ៉ាងហោចណាស់ នៅក្នុងក្រុងប៉ោយប៉ែត ខេត្តបន្ទាយមានជ័យ មានមនុស្សដល់ទៅ១២៦នាក់ កំពុងជាប់សង្ស័យមានជំងឺកូវីដ១៩ នេះបើតាមការយកសំណាកដោយ Rapid Test ក្រោយជាប់ពាក់ព័ន្ធជាមួយបុរសជនជាតិឥណ្ឌូនេស៊ីម្នាក់ ផ្ទុកជំងឺកូវីដ១៩ តែទោះជាយ៉ាងណា ត្រូវមានការធ្វើតេស្តម្ដងទៀតនៅវិទ្យាស្ថានប៉ាស្ទ័រភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថាមនុស្សទាំង១២៦នាក់នេះ មិនទាន់ទទួលស្គាល់ពីវិទ្យាស្ថានប៉ាស្ទ័រភ្នំពេញនៅឡើយទេ នៅរង់ចាំការប្រកាសជាផ្លូវការសិន ព្រោះថាការយកសំណាកតាម Rapid Test នៅមិនទាន់បញ្ជាក់ច្បាស់ថា អ្នកទាំង១២៦នាក់នោះឆ្លងកូវីដ១៩នោះទេ។ ក្រោយមានការផ្ទុះនិងសង្ស័យឆ្លងដោយផ្ទាល់និងដោយប្រយោលពីបុរសជនជាតិឥណ្ឌូនេស៊ីម្នាក់ ផ្ទុកជំងឺកូវីដ១៩ អាជ្ញាធរខេត្តបន្ទាយមានជ័យ លោក អ៊ុំ រាត្រី សម្រេចដាក់តំបន់បីក្នុងការបិទខ្ទប់មិនឲ្យចេញចូលជាបណ្ដោះអាសន្ន ក្នុងរយៈពេល១៤ថ្ងៃ។ ដោយកាលពីថ្ងៃទី២៣ ខែមេសា ឆ្នាំ២០២១ អភិបាលខេត្តបន្ទាយមានជ័យ បានដាក់តំបន់៣ជាតំបន់ក្រហម មានដូចជា៖

បរិវេណទីតាំងបុរីដួងច័ន្ទទាំងមូល សិ្ថតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុង ប៉ោយប៉ែត
ជុំវិញអគារស្នាក់នៅម៉ាវង្សា សិ្ថតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុង ប៉ោយប៉ែត ប៉ែកខាងត្បូងចាប់ពីចំណុចផ្លូវវត្តស្រះត្រាច កែងផ្លូវខាងត្បូងកាស៊ីណូ Golden Planet ដល់ផ្លូវទំនប់ក៥ និងប៉ែកខាងជើង ចាប់ពីកែងផ្លូវវត្តស្រះត្រាចចំណុចប្រសព្វរវាងភូមិសាមគ្គីមានជ័យ និងភូមិព្រៃព្រិច ដល់ផ្លូវទំនប់ក៥។
ជុំវិញបរិវេណកាស៊ីណូ និងសណ្ឋាគារប៉ោយប៉ែតផ្លាស សិ្ថតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ប៉ែកខាងជើង ចាប់ពីចំណុចកែងរវាងផ្លូវស្រះត្រាច និងផ្លូវដើមពុទ្រា ដល់ផ្លូវវត្តបាលិលេយ្យ និងប៉ែកខាងត្បូង ចាប់ពីចំណុចកែងរវាងផ្លូវស្រះត្រាច និងផ្លូវក្រោយផ្ទះសំណាក់ អ៊ូរីណា ដល់ផ្លូវវត្តបាលិលេយ្យ។

សូមរំលឹកថា ករណីផ្ទុះជំងឺកូវីដនៅក្រុងប៉ោយប៉ែត ជាប់ព្រំដែនថៃខាងលើនេះ បានកើតមានឡើងដោយសារមានបុរសជនជាតិឥណ្ឌូនេស៊ីម្នាក់ បានស្នាក់នៅក្នុងបុរីដួងច័ន្ទ ផ្ទះលេខ១៣៤B ស្ថិតនៅក្នុង ភូមិសាមគ្គីមានជ័យ សង្កាត់/ក្រុង ប៉ោយប៉ែត ត្រូវបានរកឃើញវិជ្ជមានកូវីដ១៩៕

អត្ថបទ៖ សន ផានិត

សូមចុចអាន៖ ខេត្តបន្ទាយមានជ័យ ដាក់ភូមិចំនួនពីរ ក្នុងសង្កាត់ប៉ោយប៉ែតជាតំបន់ក្រហម