កុមារី២នាក់ចុះងូតទឹកក្នុងប្រឡាយ​លង់ស្លាប់

កុមាររី២នាក់ ម្នាក់អាយុ ៧ ឆ្នាំ និងម្នាក់ទៀតអាយុ៦ឆ្នាំ បានលង់ទឹកស្លាប់ក្នុងទឹកប្រឡាយ ខណៈដែលបានសុំយាយនិងតាត្រឡប់មកពីវាលស្រែមុន ហើយនាំគ្នាងូតទឹកប្រឡាយ ក៏លង់ស្លាប់ទាំងពីរនាក់ នៅចំណុចប្រឡាយទឹកវាលក្បាល​គោ ចម្ងាយ ២.៥០០ម៉ែត្រពីភូមិគោកព្រិច ឃុំសូភី ស្រុកអូរជ្រៅ ខេត្តបន្ទាយមានជ័យ កាលពីវេលាម៉ោង ២ និង៤០នាទី ថ្ងៃទី ១៩ ខែមិថុនា។

នគរបាលប៉ុស្តិ៍រដ្ឋបាលឃុំសូភី បានឱ្យដឹងថាកុមារីរងគ្រោះទាំង២នាក់១ឈ្មោះវឿត យ៉ុង អាយុ៧ឆ្នាំ ទី២ឈ្មោះ សៅ លីយ៉ាន អាយុ ៦ឆ្នាំ ទាំង២នាក់នេះជាបងប្អូនជីដូនមួយនឹងគ្នា ហើយឪពុកម្តាយទៅធ្វើការនៅប្រទេសថៃទាំងអស់គ្នាទុកកូនឲ្យនៅជាមួយដីដូន ឈ្មោះ អៀន រ៉េត អាយុ៥២ឆ្នាំ នៅភូមិគោកព្រិច ឃុំសូភី ស្រុកអូរជ្រៅ ខេត្តបន្ទាយមានជ័យ។

នគរបាលបានបញ្ជាក់ឲ្យដឹងបន្តថានៅមុនពេលកើតហេតុ ក្មេងៗចំនួន៥នាក់ បានទៅតាមឈ្មោះ អៀនរ៉េត ដែលត្រូវជាជីដូនគាត់ទៅមើលស្រែ បន្ទាប់មកក្មេង៣នាក់ក្នុងនោះមានក្មេងរងគ្រោះ២នាក់ផងបានប្រាប់ជីដូនថាសុំមកផ្ទះមុន ពេលដើរមកឆ្ងាយបន្តិចក្មេងរងគ្រោះទាំង២នាក់បានចុះងូតទឹកប្រឡាយលេងដែលមានជម្រៅប្រហែលជា២ម៉ែត្រនិង១​នាក់​ឈរមើលលើគោក។

ពេលឃើញក្មេងស្រីរងគ្រោះទាំង២នាក់លង់ទឹក ក្មេង១នាក់ដែលឈរមើលនោះបានរត់ទៅហៅជីដូននៅឯស្រែ ពេលមកដល់ចុះស្រង់យកក្មេងទាំ២នាក់នោះ ក៏បាននាំទៅសង្រ្គោះនៅមន្ទីរពេទ្យបង្អែកស្រុកអូរជ្រៅ ពេលទៅដល់គ្រូពេទ្យបានប្រាប់ថា ក្មេងទាំង២នាក់បានបាត់បង់ជីវិតទៅហើយ។សពក្មេងស្រីទាំង២នាក់ក្រុមគ្រូពេទ្យប្រគល់ទៅឲ្យគ្រួសារ ដឹកយកមកផ្ទះរៀបចំធ្វើបុណ្យតាមប្រពៃ ណីដោយសោកសៅជាទីបំផុត៕អត្ថបទ៖ វ៉ាន់ ណាង