ចាប់ឃុំខ្លួនអ្នកលក់ផ្ទះខ្យល់ម្នាក់យកប្រាក់គេ១៦មុឺនដុល្លារ

ភ្នំពេញ៖ នគរបាលព្រហ្មទណ្ឌបានឱ្យដឹងថា កាលពីល្ងាចថ្ងៃទី២២ ខែកក្ដដា ឆ្នាំ២០២១ លោក យ៉ាន សុភាព ចៅក្រមសាលាដំបូងរាជជធានីភ្នំពេញ បានចេញដីកាសម្រេចឃុំខ្លួនជនត្រូវចោទម្នាក់ឈ្មោះ អួង សុភ័ក្រ ភេទប្រុស អាយុ៣៩ឆ្នាំ ដាក់ពន្ធនាគារបណ្ដោះអាសន្ន ក្រោមការចោទប្រកាន់ពីបទ “ឆបោក” ពាក់ព័ន្ធបទល្មើសលក់ផ្ទះខ្យល់យកប្រាក់គេអស់១៦ម៉ឺនដុល្លារ តែពុំមានផ្ទះអោយគេ។

ជនជាប់ចោទឈ្មោះ អួង សុភ័ក្រ មានស្រុកកំណើត នៅឃុំម្រោម ស្រុកអង្គរជ័យ ខេត្តកំពត និងមានទីលំនៅមុនពេលឃាត់ខ្លួនស្នាក់នៅផ្ទះលេខ១១បេ ផ្លូវលេខ៣១បេតេ ភូមិសន្សំកុសល២ ខណ្ឌមានជ័យ រាជធានីភ្នំពេញ។

តាមដីកាសម្រេចឃុំខ្លួន តុលាការបានដាក់ជនត្រូវចោទឱ្យស្ថិតក្រោមការចោទ​ប្រកាន់​ពីបទ​ឆបោក ប្រព្រឹត្តនៅ រាជធានីភ្នំពេញ កាលពីអំឡុងខែវិច្ឆិកា ឆ្នាំ២០១៧ តាមមាត្រា៣៧៧ ៣៧៨ នៃក្រមព្រហ្មទណ្ឌ ពាក់ព័ន្ធនឹងករណីលក់ផ្ទះខ្យល់មួយឱ្យអ្នកដទៃយកប្រាក់គេអស់១៦ម៉ឺនដុល្លារ តែមិនមានផ្ទះឱ្យគេទេ ទើបម្ចាស់ប្រាក់សម្រេចប្ដឹងមកសមត្ថកិច្ច និងតុលាការ។

នគរបាលបានបញ្ជាក់ឱ្យដឹងថា ជនជាប់ចោទត្រូវបានបញ្ជូនទៅឃុំខ្លួននៅពន្ធនាគារព្រៃសកាលពីព្រលប់ថ្ងៃទី២២ ខែកក្ដដានេះ តាមសេចក្ដីសម្រេចរបស់តុលាការ៕

អត្ថបទ៖ មករា