ក្រសួងសង្គមកិច្ច ស្នើឲ្យសមត្ថកិច្ចមានវិធានការមិនលើកលែងលើករណីធ្វើទារុណកម្ម​ព្រៃផ្សៃ​លើក​ក្មេងស្រី២នាក់នៅក្រុងក្រចេះ​

ក្នុងនាម​ក្រសួង​សង្គមកិច្ច អតីតយុទ្ធជន និង​យុវនីតិសម្បទា និង​អគ្គលេខាធិការដ្ឋាន​ក្រុមប្រឹក្សា​កម្ពុជា​ដើម្បី​កុមារ លោក ​តូច ចាន់នី អគ្គនាយក​បច្ចេកទេស​បានស្នើ​សុំ​ឲ្យ​សមត្ថកិច្ច​មាន​វិធានការ​លើ​ជន​ប្រព្រឹត្ត​បទល្មើស​ទៅតាម​នីតិវិធី​ផ្លូវច្បាប់​មិន​លើកលែង ​ក្នុងករណី​ធ្វើ​ទារុណកម្ម​ព្រៃផ្សៃ​មិន​ធ្លាប់​មាន​ទៅ​ក្មេងស្រី​២​នាក់​នៅ​ខេត្តក្រចេះ​ ពី​សំណាក់​ជនបង្ក​ជា​មេ​អាវុធហត្ថ​ក្រុងក្រចេះ​ ខេត្តក្រចេះ​ដែល​បង្ក​ភ្ញាក់ផ្អើល​ពេញ​ផ្ទៃ​ប្រទេស​នាពេល​ថ្មីៗ​កន្លងមកនេះ​។

ការ​សំណូម​ពរនេះ​បានធ្វើឡើង​នា​ថ្ងៃអាទិត្យទី​៣១ ខែតុលា ឆ្នាំ​២០២១ ខណៈពេល​លោក ​តូច ចាន់នី អគ្គនាយក​បច្ចេកទេស នៃ​ក្រសួង​សង្គមកិច្ច អតីតយុទ្ធជន និង​យុវនីតិសម្បទា និង​ក្រុមការងារ​ដោយមាន​ការចូលរួម​ពី​មន្ត្រី​តំណាង​អគ្គលេខាធិការដ្ឋាន​ក្រុមប្រឹក្សា​ជាតិ​កម្ពុជា​ដើម្បី​កុមារ និង​ប្រធាន​នាយកដ្ឋាន​សុខុមាលភាព​កុមារ បាន​សហការ​ជាមួយ​មន្ទីរ​សង្គមកិច្ច អតីតយុទ្ធជន និង​យុវនីតិសម្បទា ខេត្តក្រចេះ បាន​អញ្ជើញ​ចុះសួរសុខទុក្ខ កុមារី​រងគ្រោះ​ដោយ​អំពើ​ធ្វើ​ទារុណកម្ម​យ៉ាងធ្ងន់ធ្ងរ​។​

រឿងរ៉ាវ​ដ៏សាហាវព្រៃផ្សៃ​ទៅ​ក្មេងស្រី​២​នាក់​នៅ​ក្រុង​ក្រចេះ​ដែល​ធ្វើអោយ​ភ្ញាក់ផ្អើល​ពេញ​ផ្ទៃ​ប្រទេស​ពី​សំណាក់​មេបញ្ជាការ​កងរាជអាវុធហត្ថ​ក្រុង​ក្រចេះ​នោះ​ត្រូវ​លោក តូច ចាន់នី ក៏ដូច​មហាជន​ចាត់ទុកថា ជា​អំពើ​ឃោរឃៅ ពីព្រោះ​ទង្វើ​របស់​មេ​អាវុធហត្ថ​រូបនោះ ជាកា​រធ្វើ​ទារុណកម្ម​យុងឃ្នង​ពុំ​ធ្លាប់​មាន​លើ​ប្រវត្តិ​សាស្ត្រ​ដោយបង្ខំ​ឲ្យ​ក្មេងស្រី​រងគ្រោះ​ទាំងពីរ​នាក់​ស៊ី​អាចម៍​ឆ្កែ​ដេក​អោប​ឆ្កែ​នោះ​ គឺជា​អំពើ​អមនុស្ស​បំផុត ករណីនេះ​មិនអាច​ទទួលយក​បានឡើយ​។​

ជាមួយគ្នានេះ ​ក្នុងនាម​ក្រសួង​សង្គមកិច្ច អតីតយុទ្ធជន និង​យុវនីតិសម្បទា និង​អគ្គលេខាធិការដ្ឋាន​ក្រុម​ប្រឹក្សា​កម្ពុជា​ដើម្បី​កុមារ សូម​ឲ្យ​សមត្ថកិច្ច​ពាក់ព័ន្ធ​ទាំងអស់​មាន​វិធានការ​លើ​ជន​ប្រព្រឹត្ត​បទល្មើស​ទៅតាម​នីតិវិធី​ផ្លូវច្បាប់​ដោយ​មិន​លើកលែង​។ ក្នុងនោះ​ផង​ដែល​លោក​ តូច ចាន់នី បាន​ពាំ​នាំយក​អំណោយ និង​ការ​ផ្តាំផ្ញើ​សួរសុខទុក្ខ​ពី​សំណាក​លោក ​វង សូត រដ្ឋមន្ត្រីក្រសួង​សង្គមកិច្ច អតីតយុទ្ធជន និង​យុវនីតិសម្បទា សូម​ឲ្យ​អាណាព្យាបាល​បន្ត​ពង្រឹង​ការយកចិត្តទុកដាក់​មើលថែទាំ​កូនៗ​ឲ្យ​បានល្អ និង​ត្រូវអនុវត្ត​វិធានការ ៣​កុំ ៣​ការពារ​ផងដែរ​៕

អត្ថបទ៖ វិមាន​