បេក្ខជនពិការភ្នែក គថ្លង់​ ប្រឡង​បាក់ឌុបខុស​ពី​​បេក្ខជន​ធម្មតា​ម៉េច​ខ្លះ?

អ្នកនាំពាក្យក្រសួងអប់រំយុវជននិងកីឡាបានបង្ហាញពីដំណើរការប្រឡងបាក់ឌុបរបស់បេក្ខជនពិការភ្នែក និងគថ្លង់ខណៈឆ្នាំនេះមានបេក្ខជនពិការភ្នែក និងគថ្លង់ចូលរួមប្រឡងចំនួន៣០នាក់នៅទូទាំងប្រទេស។

បើ​តាម​លោករស់ សុវាចា អ្នកនាំពាក្យក្រសួងអប់រំយុវជននិងកីឡា​បាន​បង្ហាញ​ពី​ការរៀបចំ​​ប្រឡង​បេក្ខជនពិការភ្នែក និងគថ្លង់ថា បេក្ខជនពិការភ្នែក និងគថ្លង់ គ្រប់មណ្ឌលទាំងអស់ ត្រូវ​ដាក់នៅបន្ទប់ក្រោយគេដោយប្រធានមណ្ឌលត្រូវចាត់តាំងអនុរក្ស២នាក់ ដែលដាក់អគតដ្ឋានថា វិទ្យាស្ថានអប់រំពិសេសនៅក្នុងលិខិតឧទ្ទេសនាម ឱ្យធ្វើជាអនុរក្សនៅបន្ទប់នោះគ្រប់មុខវិជ្ជា ក្នុងរយៈពេលប្រឡងទាំង ២ថ្ងៃ។ អនុរក្សហៅប្រធានវិញ្ញាសាឱ្យបេក្ខជនកត់ ដោយអនុញ្ញាតពន្យារពេលប៉ុន្តែមិនឱ្យប៉ះពាល់វិញ្ញាសាដទៃឡើយ ព្រោះបេក្ខជនពិការភ្នែកពួកគាត់សរសេរសន្លឹកកិច្ចការប្រឡងដោយអក្សរស្ទាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា អនុរក្សត្រូវជូនក្រដាសប្រឡងគ្រប់មុខវិជ្ជា តាមតម្រូវការជាក់ស្តែងរបស់បេក្ខជន ប៉ុន្តែត្រូវខ្ទាស់​តាមមុខវិជ្ជាឱ្យបានត្រឹមត្រូវ ព្រោះជាធម្មតាបេក្ខជនពិការភ្នែកប្រើក្រដាសប្រឡងច្រើនសន្លឹកណាស់។ ប្រធានមណ្ឌលត្រូវប្រមូលកិច្ចការបេក្ខជនពិការភ្នែក និងគថ្លង់ច្រកដាក់ស្រោម ដោយសរសេរស្លាកមុខវិជ្ជា លេខបន្ទប់ដាក់ឈ្មោះមណ្ឌល និងដាក់ចំណងជើងស្រោមធំថា “ សន្លឹកកិច្ចការរបេក្ខជនពីការភ្នែក គថ្លង់ នៅរាជធានី ខេត្ត. រួចបិទ Sceller ឱ្យបានត្រឹមត្រូវ។

លោក រស់ សុវាចា បានបន្ថែមថា សន្លឹកកិច្ចការបេក្ខជនពិការភ្នែក មិនចាំបាច់ដាក់ក្នុងហឹបជាមួយសន្លឹកកិច្ចការ បេក្ខជនធម្មតាទេគឺទុកខាងក្រៅហ៊ឹប។ នៅពេលដឹក​ហឹបប្រធានវិញ្ញាសាមកផ្ញើនៅវិទ្យាល័យព្រះស៊ីសុវត្ថិ ត្រូវបញ្ជាក់ប្រាប់អ្នកទទួលថា កិច្ចការបេក្ខជនពិការភ្នែក និងគថ្លង់។ នៅព្រឹកថ្ងៃទី៣០ ខែធ្នូ ឆ្នាំ២០២១ ជាថ្ងៃប្រគល់ដុំកិច្ចការ អប្បមាទទូទាំងប្រទេសប្រចាំមណ្ឌលសំណេរ ត្រូវប្រគល់សន្លឹកកិច្ចការបេក្ខជនពិការភ្នែកទៅប្រធានមណ្ឌលកំណែវិទ្យាល័យព្រះស៊ីសុវត្ថិ ដើម្បីរក្សាទុកប្រគល់ឱ្យគ្រូមកពីសាលាពិការភ្នែក គថ្លង់ គ្រប់មុខវិជ្ជានៅទីនោះដោយនាយកដ្ឋានជំនាញ និងជូនលិខិតឧទ្ទេសនាមអ្នកកែកិច្ចការរបស់បេក្ខជនពិការ ដល់ប្រធានមណ្ឌលកំណែតាមក្រោយ។

លោករស់ សុវាចាបានបញ្ជាក់ថា ចំពោះពិន្ទុជាប់របស់បេក្ខជនពិការគថ្លង់និងពិការភ្នែកគឺ២៣៧នៃពិន្ទុសរុប៥០០ ដូចបេក្ខជនប្រឡងទាំងអស់ដែរ។

ក្រសួងអប់រំយុវជននិងកីឡាបានណែនាំឲ្យមានការយកចិត្តទុកដាក់ខ្ពស់ចំពោះបេក្ខជនពិការដោយគ្មានការរើសអើងឡើយមិនថាពួកគាត់ពិការភ្នែក គថ្លង់ ពិការដៃឬជើង ក៏ដោយ។ មិនត្រឹមតែប៉ុណ្ណោះពួកគេនឹងទទួលបានការយកចិត្តទុកដាក់ជាពិសេសពីក្រុមការងារប្រឡងនិងការកែវិញ្ញាសារជាលក្ខណៈពិសេសផងដែរ។

បេក្ខជនពិការភ្នែកនិងគថ្លង់ចូលរួមប្រឡងចំនួន៣០នាក់ ក្នុង​នោះមានពិការភ្នែកចំនួន១៨នាក់ស្រី៧នាក់និងគថ្លង់ចំនួន១២នាក់ស្រី៧នាក់។ ក្នុងចំណោមបេក្ខជនពិការភ្នែកនិងគថ្លង់៣០នាក់ប្រឡងនៅមណ្ឌលរាជធានីភ្នំពេញចំនួន១០នាក់ស្រី៣នាក់ ក្នុងនោះមានបេក្ខជនគថ្លង់ចំនួន ៣ នាក់ស្រី ១ នាក់និងបេក្ខជនពិការភ្នែក៧នាក់ស្រី២នាក់ ។

ខេត្តកំពង់ចាមមានចំនួន១២នាក់ស្រី៧នាក់ ក្នុងនោះមានពិការភ្នែកចំនួន៩នាក់ស្រី៤នាក់ និងគថ្លង់ចំនួន៣នាក់ស្រីទាំង៣នាក់។ ខេត្តបាត់ដំបមាន៤នាក់ ស្រី២នាក់ ក្នុងនោះមានបេក្ខជនគថ្លង់២នាក់ស្រី១នាក់ និងបេក្ខជនពិការភ្នែក​២​នាក់ស្រី១នាក់ និងខេត្តសៀមរាបមាន៤នាក់ស្រី២នាក់ជាបេក្ខជនគថ្លង់ទាំងអស់។

សម្រាប់ការប្រឡងបាក់ឌុបឆ្នាំនេះមានបេក្ខជនចុះឈ្មោះមានបេក្ខជនចុះឈ្មោះប្រឡងសរុប ១១៤ ១៨៣នាក់ ស្រី៦០ ៣៩៧នាក់មានមណ្ឌលសំណេរចំនួនសរុប ២០៤ មណ្ឌល ត្រូវជា ៤ ៦១៦បន្ទប់។បេក្ខជនត្រូវបានរៀបចំចំនួន២៥នាក់ ក្នុងមួយបន្ទប់លើកលែងតែបន្ទប់ចុងក្រោយនិងបន្ទប់ដែលមានបេក្ខជនមកពីវិទ្យាល័យអប់រំពិសេស៕

អត្ថបទ៖ សំអឿន