ឧត្តមសេនីយ៍ឯក ឌី វិជ្ជា សំណូមពរប្រជាពលរដ្ឋបង្កើនប្រុងប្រយ័ត្ន ខណៈ អូមីក្រុង កំពុងរាលដាល

លោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធានអនុគណៈកម្មការឆ្លើយតបបន្ទាន់ និងស្រាវជ្រាវរកបុគ្គលផ្ទុកមេរោគកូវីដ-១៩ នៅមុននេះបន្តិច ក្នុងល្ងាចថ្ងៃអាទិត្យ នេះ សំណូមពរប្រជាពលរដ្ឋបង្កើនប្រុងប្រយ័ត្ន ខណៈ អូមីក្រុង កំពុងរាលដាលខ្លាំងក្នុងសហគមន៍ នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ឯក ឌី វិជ្ជា ថ្លែងថា៖ “ក្នុងនាមខ្ញុំបាទ ជាប្រធានអនុគណៈកម្មការឆ្លើយតបបន្ទាន់ និងស្រាវជ្រាវរកបុគ្គលផ្ទុកមេរោគកូវីដ-១៩ សូមសំណូមពរដល់បងប្អូនប្រជាពលរដ្ឋ សូមមេត្តាបង្កើនការប្រុងប្រយ័ត្នខ្ពស់ ចំពោះវីរុសកូវីដ១៩ បំប្លែងខ្លួនថ្មី អូមីក្រុង ដែលកំពុងរីករាលដាលយ៉ាងឆាប់រហ័សនាពេលបច្ចុប្បន្ននេះ”។

លោកឧត្តមសេនីយ៍ឯក ឌី វិជ្ជា មានប្រសាសន៍បន្តថា៖ “សូមប្រជាពលរដដ្ឋបន្តចូលរួមអនុវត្តវិធានការ ៣កុំ និង៣ការពារ ឱ្យបានខ្ជាប់ខ្ជួន ពិសេសទទួលយកការចាក់វ៉ាក់សាំងដូសជំរុញឱ្យបានគ្រប់ៗគ្នា ដើម្បីបង្កើនភាពស៊ាំ និងកាត់ផ្តាច់ចរន្តឆ្លងរីករាលដាលនៃជំងឺកូវីដ-១៩ ក្នុងសហគមន៍ ក៏ដូចជាដើម្បីមនុស្សជាទីស្រឡាញ់របស់យើងទាំងអស់គ្នា”។

គួរបញ្ជាក់ថា ក្រសួងសុខាភិបាល នៅថ្ងៃទី២០ ខែកុម្ភៈ ឆ្នាំ២០២២នេះ បានចេញសេចក្តីប្រកាសព័ត៌មាន បញ្ជាក់ពីរកឃើញអ្នកឆ្លងកូវីដថ្មី ប្រភេទអូមីក្រុងចំនួន ៧៣៦ នាក់ ក្នុងនោះករណីនាំចូលចំនួន ៦នាក់ និងឆ្លងក្នុងសហគមន៍ ៧៣០នាក់។ ចំណែកអ្នកជំងឺជាសះស្បើយចំនួន២៩៧នាក់ និងអ្នកស្លាប់២នាក់។

គិតត្រឹមការប្រកាសរបស់ក្រសួងសុខាភិបាល នៅថ្ងៃនេះ កម្ពុជារកឃើញអ្នកឆ្លងជំងឺកូវីដ១៩ សរុបចំនួន ១២៦ ៤៨៩នាក់ អ្នកជាសះស្បើយសរុបចំនួន ១២០ ៤៦២ នាក់ ស្លាប់សរុបចំនួន ៣ ០១៧នាក់៕

អត្ថបទ៖ ច័ន្ទ វីរៈ