អាមេរិក ផ្តល់ជំនួយជាង ៦លានដុល្លារ សម្រាប់បោសសម្អាតគ្រាប់បែកចង្កោមនៅកម្ពុជា

រដ្ឋាភិបាលសហរដ្ឋអាមេរិក បានផ្តល់ជំនួយហិរញ្ញប្បទានឥតសំណងប្រមាណជាង ៦លានដុល្លារអាមេរិក ដល់មជ្ឈមណ្ឌលសកម្មភាពកម្ចាត់មីនកម្ពុជា​(ស៊ីម៉ាក់) សម្រាប់ធ្វើការបោសសំអាតគ្រាប់បែកចង្កោមនៅតាមបណ្តាខេត្តចំនួន ៧នៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយនេះ ត្រូវបានផ្តល់តាមរយៈអង្គការ NPA ដែលបានចុះហត្ថលេខារវាងលោក Rune Dale Andresen ប្រធានអង្គការ NPA ប្រចាំកម្ពុជានិងលោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) នៅថ្ងៃទី០៩ ខែមីនាឆ្នាំ២០២២។

តាមរយៈទំព័រហ្វេប៊ុកផ្លូវការនៅថ្ងៃនេះ លោក ហេង រតនា បានសរសេរថា ជំនួយហិរញ្ញប្បទានឥតសំណងរបស់រដ្ឋាភិបាលសហរដ្ឋអាមេរិកចំនួន ៦,៣៥៥,៧២០ដុល្លារ តាមរយៈអង្គការ NPA គាំទ្រអង្គភាពស៊ីម៉ាក់ សម្រាប់បោសសំអាតតំបន់រងផលប៉ះពាល់ គ្រាប់បែកចង្កោម នៅខេត្តស្វាយរៀង ព្រៃវែង កំពង់ចាម ត្បូងឃ្មុំ ក្រចេះ រតនៈគីរី និងខេត្តមណ្ឌលគីរីរយៈពេល៤៥ខែ ចាប់ពីថ្ងៃទី០១មីនា ២០២២ដល់ថ្ងៃទិ៣០ខែខែវិច្ឆិកា ២០២៥។

លោក  ហេង រតនា បានសរសេរបន្តថា បរិមាណជំនួយនេះ មានបរិមាណដូចបណ្តាឆ្នាំកន្លងមកដែរ គ្រាន់តែជំនួយលើកនេះ មានរយៈពេលវែងរហូតដល់៤៥ខែ ដែលកន្លងមកផ្តល់រយៈពេលមួយឆ្នាំម្តងប៉ុណ្ណោះហើយជំនួយនេះអាចផ្តល់លទ្ធភាពឲ្យអង្គភាពស៊ីម៉ាក់ អាចពង្រាយកម្លាំងប្រតិបត្តិការចំនួនជាង២០០នាក់ និងអាចរំដោះផ្ទៃដី តំបន់គ្រាប់បែកចង្កោមជាង១៣,២០០ហិកតា។

លោក ហេង រតនា បានសរសេរបន្តទៀតថា ជាមួយនេះដែរក្រសួងការបរទេស Norway ក៏បានសំរេចផ្តល់ថវិកាខ្នាតតូចចំនួន២គំរោង គឺគំរោងរំដោះខេត្តគ្មានគ្រាប់មីន ដែលកំពុងប្រតិបត្តិការ និងគំរោងបោសសំអាតមីនតំបន់ព្រំដែនកម្ពុជា-ថៃ ដែលគំរោងទាំង២ មានថវិកាចំនួន៨៩,០៧៧ដុល្លាររយៈពេល៣ខែ។

យោងតាមផែនការយុទ្ធសាស្ត្រជាតិសកម្មភាពមីន ឆ្នាំ២០១៨- ២០២៥បានឲ្យដឹងថានៅកម្ពុជាមានផ្ទៃដីសង្ស័យមានផលប៉ះពាល់​ដោយសារមីនគ្រាប់បែកចង្កោមនិងសំណល់ជាតិផ្ទុះពីសង្គ្រាមប្រមាណជាង​១៩៧០គីឡូម៉ែត្រការ៉េក្នុងនោះប្រមាណ៨៧៧គីឡូម៉ែត្រការ៉េជាដីមានផលប៉ះពាល់ខ្ពស់​ដោយសារមីន៤៩៩គីឡូម៉ែតការ៉េជាដីប៉ះពាល់ដោយគ្រាប់បែកចង្កោមនិង៣៣គីឡូ ម៉ែត្រការ៉េជាដីមានផលប៉ះពាល់ដោយសារសំណល់ជាតិផ្ទុះពីសង្រ្គាម៕

សំអឿន