ជប៉ុន គ្រោងផ្តល់ជំនួយជិត១៧លានដុល្លារ​ដល់ស៊ីម៉ាក់បោសសម្អាតមីន​រយៈពេល៤ឆ្នាំ

រាជរដ្ឋាភិបាលជប៉ុន គ្រោងនឹងផ្តល់ជំនួយប្រមាណជិយ១៧លានដុល្លារអាមេរិកសម្រាប់គាំទ្រដល់គម្រោង​សមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី២មានរយៈពេល៤ឆ្នាំ​ចាប់ពីឆ្នាំ២០២២ ដល់២០២៥។

ក្នុងកិច្ចប្រជុំលើកទី១ របស់គណៈកម្មការប្រឹក្សាយោបល់នៃគម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី២ តាមប្រព័ន្ធ ZOOMកាលពីថ្ងៃទី២២មេសា លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានមានប្រសាសន៍ថាកិច្ចប្រជុំនេះមានការចូលរួមពីមន្រ្តីស្ថានទូតជប៉ុនប្រចាំកម្ពុជា និងមន្រ្តីក្រុមហ៊ុនប្រឹក្សាយោបល់ជប៉ុន CA នៅទីក្រុងតូក្យូ ដើម្បីពិនិត្យ និងសម្រេចលើផែនការសកម្មភាពការងារដែលនឹងត្រូវអនុវត្តក្នុងគម្រោង។​

លោកអគ្គនាយកស៊ីម៉ាក់បានបន្តថា គម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីនដំណាក់កាលទី២ នេះមានថវិកាចំនួន២០០០លានយ៉េន​ស្មើនឹងប្រមាណជិត១៧លានដុល្លារអាមេរិក មានរយ:ពេល៤ឆ្នាំចាប់ពីឆ្នាំ២០២២-២០២៥សម្រាប់បម្រើគោលដៅសំខាន់ៗចំនួន៣គឺទី​ ១.​ រំដោះផ្ទៃដីរងផលប៉ះពាល់ដោយសារគ្រាប់មីននៅខេត្តបាត់ដំបងចំនួន៩​.៤៥៤ហិចតា​។ ទី ២.​ ទិញគ្រឿងចក្រកំទេចមីននិងគ្រឿងបន្លាស់​ និងទី​ ៣.​ ជួយសង្គ្រោះជនរងគ្រោះដោយសារមីនតាមរយ:ការធ្វើសមារណកម្មសេដ្ឋកិច្ចសង្គម៕ សំអឿន