ព័ត៌មានជាតិ

កម្ពុជា និងទីម័រឡេស ប្តេជ្ញាពង្រឹងកិច្ចសហប្រតិបត្តិការលើវិស័យទេសចរណ៍ប្រទេសទាំងពីរឡើងវិញ

បានផុស

៤ years មុន

នៅ

ថ្ងៃអង្គារ ១០ ឧសភា ២០២២

ដោយ

កម្ពុជា និងទីម័រឡេស បានប្តេជ្ញាចិត្តរួមគ្នាពង្រឹងកិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរឡើងវិញ បន្ទាប់ពីស្ថានភាពការឆ្លងរាលដាលជំងឺកូវីដ១៩មានភាពធូរស្រាល។

ការប្តេជ្ញានេះ បានធ្វើឡើងក្នុងជំនួបរវាងលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងលោក Agio Pereira ទេសរដ្ឋមន្ត្រីនៃរដ្ឋាភិបាលប្រទេស Timor-Leste នៅទីស្តីការក្រសួង នៅថ្ងៃថ្ងៃទី៩ ខែឧសភា ឆ្នាំ២០២២នេះ។

លោក ទ្រី ឈីវ ទីប្រឹក្សាក្រសួងទេសចរណ៍ បានឱ្យដឹងថា កម្ពុជា និងទីម័រឡេស បានរៀបចំសេចក្តីព្រាងខ្លឹមសារអនុសារណៈនៃការយោគយល់គ្នាលើកិច្ចសហប្រតិបត្តិការក្នុងវិស័យទេសចរណ៍នៃប្រទេសទាំងពីររួចហើយ ។

លោកបានបន្តថា «យើងក៏កំពុងបានរកឱកាសដើម្បីចុះហត្ថលេខាលើខ្លឹមសារអនុស្សារណៈនេះ ដើម្បីបើកឱកាស
និងបើកផ្លូវពង្រីកកិច្ចសហប្រតិបត្តិការជំរុញការអភិវឌ្ឍវិស័យទេសចរណ៍ និងជំរុញចលនាទេសចរណ៍រវាងប្រទេសទាំងពីរឱ្យល្អប្រសើរឡើងវិញ»។

លោកបានបន្តទៀតថា ទន្ទឹមការជំរុញចលនាទេសចរណ៍ផ្ទៃក្នុងអាស៊ាន និងទីម័រនេះ មកដល់ពេលនេះ កម្ពុជា ក៏បានបង្កើតនូវគោលដៅទេសចរណ៍ថ្មីៗ និងបង្កើតផលិតផលទេសចរណ៍ថ្មីជាច្រើនកន្លែងដែលមានប្រព័ន្ធហេដ្ឋារចនាសម្ព័ន្ធល្អប្រសើរជាងមុនជាពិសេសនៅគោលដៅទេសចរណ៍ខេត្តសៀមរាប និងខេត្តព្រះសីហនុជាដើម។ នៅក្នុងជំនួបនេះលោក ទ្រី ឈីវ បានបញ្ជាក់ថា លោកAgio Pereira បានគាំទ្រដំណើរកិច្ចសហប្រតិបត្តិការអភិវឌ្ឍវិស័យទេសចរណ៍
និងជំរុញចលនាទេសចរណ៍នៃប្រទេសទាំងពីរកម្ពុជា-ទីម័រ ហើយជាពិសេសឯកឧត្តមក៏បានថ្លែងអំណរគុណប្រមុខថ្នាក់ដឹកនាំរាជរដ្ឋាភិបាលកម្ពុជា ដែលបានគាំទ្រប្រទេសទីម័រអោយចូលជាសមាជិកអាស៊ាននៅក្នុងអាណត្តិដែលកម្ពុជាកំពុងធ្វើប្រធានអាស៊ាន៕

អត្ថបទ៖ សំអឿន