វិបត្តិសង្រ្គាមនៅអ៊ុយក្រែន មិនទាន់មានសញ្ញាណាមួយ ប៉ះពាល់ដល់វិស័យកាត់ដេរនៅកម្ពុជាទេ

មន្ត្រីជាន់ខ្ពស់ក្រសួងការងារ បានឲ្យដឹងថា មកដល់ពេលនេះ វិបត្តិសង្គ្រាមនៅអ៊ុយក្រែន មិនទាន់ធ្វើឲ្យប៉ះពាល់ដល់វិស័យកាត់ដេរនៅកម្ពុជានៅឡើយទេ តែបើសិនជាវិបត្តិនេះបន្តអូសបន្លាយទៀតនោះ អាចនឹងរងផលប៉ះពាល់ខ្លះ។

ចាប់តាំងពីមានវិបត្តិសង្រ្គាមនៅប្រទេសអ៊ុយក្រែន ក្រោមការវាយលុករបស់ប្រទេសរុស្ស៊ីមក បានធ្វើឲ្យប្រទេសនានានៅលើពិភពលោក មានការព្រួយបារម្ភចំពោះវិបត្តិសន្តិសុខស្បៀងអាហារ និងថាម​ពល ហើយក៏ព្រួយបារម្ភផងដែរចំពោះវិបត្តិសេដ្ឋកិច្ចសកល ដែលអាចនឹងកើតមាននាពេលខាងមុខ។

លោក ហេង សួរ រដ្ឋលេខាធិការ និង​ជា​អ្នក​នាំពាក្យ​ក្រសួងការងារ និង​បណ្តុះបណ្តាល​វិជ្ជាជីវៈ មានប្រសាសន៍ប្រាប់កម្ពុជាថ្មី នៅថ្ងៃទី ៩ ខែមិថុនានេះថា ចំពោះវិបត្តិសង្រ្គាមនៅអ៊ុយក្រែន មិនទាន់មានសញ្ញាណាមួយ ដែលប៉ះពាល់ដល់វិស័យកាត់ដេរនៅកម្ពុជា នៅឡើយ។ ប៉ុន្តែប្រសិនជាវិបត្តិនេះអូសបន្លាយយូរនោះ អាចនឹងមានផលប៉ះពាល់ខ្លះ។

លោកបញ្ជាក់ថា អាចនឹងមានផលប៉ះពាល់ ដោយ​សារ​តែសេដ្ឋកិច្ចពិភពលោកទាំងមូល ប្រឈមនឹងការកើនឡើងនៃតម្លៃម្ហូបអាហារ និងអតិផរណា ដែលជាហេតុនាំឲ្យកម្លាំងទិញពីកម្ពុជា នឹងមានការថយចុះ។

ចំណែកលោក ឡុង សុផាត ប្រធានសហភាពសហជីព យុវជនការពារសិទ្ធិកម្មករកម្ពុជា បានលើកឡើងដែរថា វិបត្តិសង្រ្គាមនៅអ៊ុយក្រែន បានជះឥទ្ធិពលដោយផ្ទាល់ និងដោយប្រយោលមួយចំនួន ទៅលើប្រទេសនានានៅលើពិភពលោក រួមទាំងប្រទេសកម្ពុជាផងដែរ។ តួយ៉ាង បញ្ហាការផ្គត់ផ្គង់វត្ថុធាតុដើម, បញ្ហាតម្លៃប្រេងឥន្ធនៈឡើងថ្លៃ ដែលនាំឲ្យប៉ះពាល់ទាំងនិយោជក និងនយោជិត។

មេសហជីពរូបនេះ បានបន្តថា ក្នុងករណីដែលវិបត្តិសង្រ្គាមនេះ នៅបន្តអូសបន្លាយនឹងអាចធ្វើឲ្យប៉ះពាល់ផ្នែកណាមួយ នៃវិស័យកាត់ដេរនៅក្នុងប្រទេសកម្ពុជា។ លោក ឡុង សុផាត បានលើកឡើងយ៉ាងដូច្នេះថា «ប្រសិនបើសង្រ្គាមហ្នឹង នៅតែបន្តអូសបន្លាយពេលយូរ ឬក៏រ៉ាំរ៉ៃនោះ យើងមិនទាន់អាចសន្និដ្ឋានបានថាតើ នឹងអាចមានរោងចក្រមួយចំនួនឈានដល់ការព្យួរការងារ ដោយបញ្ហាផ្សេងៗឬមួយក៏យ៉ាងណានោះទេ ប៉ុន្តែខ្ញុំជឿជាក់ថា បើផលប៉ះពាល់មួយផ្នែកណានោះ សម្រាប់វិស័យគឺប្រាកដជាប៉ះពាល់ហើយ តែយើងនឹងរង់ចាំមើលតទៅទៀតថាតើ ទំហំនៃការប៉ះពាល់ហ្នឹងវាមានទៅដល់កម្រិត​ណា ឬក៏វាឈានរហូតដល់អាចនឹងព្យួរកិច្ចសន្យាការងារកម្មករ ឬមួយក៏អាចមានរោងចក្រមួយចំនួន អាចឈានដល់ការបិទទ្វារ ឬក៏អត់ ចឹងយើងកំពុងបន្តតាមដានយ៉ាងយកចិត្តទុកដាក់ មែនទែនចំពោះបញ្ហានេះ»៕

អត្ថបទ៖ ឃួន សុភ័ក្រ