២ ថ្ងៃជាប់គ្នា កម្ពុជា រកឃើញ ការឆ្លងកូវីដ-១៩ ក្នុងសហគមន៍ ឡើងវិញ

ក្រសួងសុខាភិបាល នៅថ្ងៃទី៣០ ខែមិថុនា ឆ្នាំ២០២២នេះ បានចេញសេចក្តីប្រកាសព័ត៌មានបញ្ជាក់ពីការរកឃើញអ្នកឆ្លងកូវីដ-១៩ ចំនួន ៧ នាក់ ខណៈម្សិលមិញរកឃើញ ១០នាក់ បន្ទាប់ពីមិនមានរកឃើញអ្នកឆ្លងចំនួន ៥២ថ្ងៃជាប់គ្នារួចមក។

អ្នកជំងឺថ្មី ឆ្លងជំងឺ កូវីដ-១៩ ទាំង ៧ ករណីនោះ ត្រូវបានរកឃើញ ដោយ PCR និងជាប្រភេទអូមីក្រុង ទាំងអស់។ អ្នកទាំង ៧ នាក់នោះ ជាករណីឆ្លងក្នុងសហគមន៍ ដឹងលទ្ធផលនៅពេលពួកគាត់សុំវិញ្ញាបនបត្រចេញទៅក្រៅប្រទេស។

គិតត្រឹមការប្រកាសរបស់ក្រសួងសុខាភិបាល នៅថ្ងៃនេះ កម្ពុជារកឃើញអ្នកឆ្លងជំងឺកូវីដ១៩៖ សរុបចំនួន ១៣៦ ២៧៩ នាក់, អ្នកជាសះស្បើយសរុបចំនួន ១៣៣ ២០៦ នាក់, ស្លាប់សរុបចំនួន ៣ ០៥៦ នាក់។

គួរបញ្ជាក់ថា តាមរយៈសេចក្តីជួនព័ត៌មានរបស់ក្រសួងសុខាភិបាល ចុះកាលពីយប់ថ្ងៃទី២៩ មិថុនានេះ លោកសាស្ត្រាចារ្យ ម៉ម ប៊ុនហេង  រដ្ឋមន្ត្រីក្រសួងសុខាភិបាល បានជំរុញឱ្យសមត្ថកិច្ចដែលឈរជើងតាមព្រំដែនត្រូវប្រកាន់ខ្ជាប់នូវវិធានការសុខាភិបាលឱ្យបានហ្មត់ចត់ចំពោះប្រជាជនខ្មែរ និងជនបរទេសដែលធ្វើដំណើរឆ្លងកាត់តាមព្រំដែន ដើម្បីទប់ស្កាត់ការឆ្លងជំងឺកូវីដ-១៩ ប្រភេទបំប្លែងខ្លួនថ្មីៗ ដែលបច្ចុប្បន្នមានឆ្លងនៅបណ្តាប្រទេសមួយចំនួនរួចហើយ។

គួររម្លឹកថា នា​យប់មិញ ​ថ្ងៃទី​២៨ ខែមិថុនា ឆ្នាំ​២០២២ នេះ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ចេញសារជាសំឡេង​បាន​បញ្ជាក់ថា ​កម្ពុជា​បាន​ពិនិត្យឃើញ​អំពី​ការឆ្លង ជំងឺ​កូ​វីដ​-១៩ នៅក្នុង​សហគម​ន៍​ឡើងវិញ​។ ជាមួយគ្នា​នោះ​សម្ដេច​បាន​អំពាវនាវ​ដល់​ប្រជាពលរដ្ឋ ឱ្យ​មានការ​ប្រុងប្រយ័ត្ន ក្នុងការ​ការពារ​សុខ​ភាព​ផ្ទាល់ខ្លួន នៅ​គ្រប់​ទីកន្លែង​ទាំងអស់ ហើយ​ត្រូវមាន​វិធានការ​ហ្មត់ចត់ ដើម្បី​បញ្ចៀស​នូវ​ការរីក​រាលដាល ចូលទៅក្នុង​សហគមន៍ និង​ចូលទៅក្នុង​គ្រួសារ៕

អត្ថបទ៖ ច័ន្ទ វីរៈ