គណៈកម្មាធិការជាតិរៀបចំបុណ្យជាតិ ប្រាប់ឲ្យស្ថាប័ន​ពាក់ព័ន្ធចូលរួមកាន់មរណទុក្ខ​លោក ស៊ីនហ្សូ អាបេ

គណៈកម្មាធិការជាតិរៀបចំបុណ្យជាតិ- អន្តរជាតិ នៅថ្ងៃទី០៩ ខែកក្កដា ឆ្នាំ ២០២២នេះ បានចេញសេចក្តីជូន​ដំណឹងមួយ ស្ដីពីការចូលរួមកាន់មរណទុក្ខ ចំពោះមរណភាពលោក អាប ស៊ីនហ្សូ អតីតនាយករដ្ឋមន្ត្រីជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីជូនដំណឹង យោងតាមប្រសាសន៍ដ៏ខ្ពង់ខ្ពស់បំផុតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គណៈកម្មាធិការជាតិរៀបចំបុណ្យជាតិ-អន្តរជាតិ បានស្នើឲ្យប្រធានស្ថាប័នជាតិ និងថ្នាក់ក្រោមជាតិទាំងអស់ចូលរួមកាន់មរណទុក្ខចំពោះមរណភាព លោក អាប ស៊ីនហ្សូ អតីតនាយករដ្ឋ មន្ត្រីជប៉ុន ដោយបង្ហូតទង់ជាតិពាក់កណ្ដាលដងរយៈពេល១ថ្ងៃ គឺនៅថ្ងៃទី១០ ខែកក្កដា ឆ្នាំ២០២២។

សូមបញ្ជាក់ថា កាលពីថ្ងៃទី០៨ ខែកក្កដា ឆ្នាំ២០២២ លោក ស៊ីនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន ត្រូវបានឃាតករបាញ់ប្រហារនៅអំឡុងពេលធ្វើយុទ្ធនាការឃោសនាបោះ ឆ្នោតថ្នាក់ជាតិ នៅភាគខាងលិចទីក្រុង Nara ប្រទេសជប៉ុន ហើយលោកបានស្លាប់ក្រោយពីបញ្ជូនដល់មន្ទីរពេទ្យ។

ក្រោយមរណភាពរបស់លោក Shinzo Abe អតីតនាយករដ្ឋមន្ត្រីជប៉ុនរូបនេះ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានចេញសារំលែកទក្ខ និងសម្រេចយកថ្ងៃអាទិត្យ ទី១០ ខែកក្កដា ដើម្បីកាន់ទុក្ខ មរណភាពរបស់ឯកឧត្តម Shinzo Abe ៕ កោះកែវ