ព័ត៌មានជាតិ

រដ្ឋមន្ត្រីអប់រំ៖ ការងារអប់រំ គឺជាការងាររបស់យើងទាំងអស់គ្នា ដើម្បីកែប្រែជោគវាសនាកុមារ

បានផុស

៤ years មុន

នៅ

ថ្ងៃអាទិត្យ ៣១ កក្កដា ២០២២

ដោយ

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ការងារអប់រំគឺជាការងាររបស់យើងទាំងអស់គ្នា ដើម្បីការអប់រំរួម សាមគ្គីគ្នាដើម្បីអនាគតកុមារ កែប្រែជោគវាសនា និងក្តីសុបិន្តកុមារឱ្យក្លាយជាការពិត តាមរយៈការអប់រំ និងធានាថាគ្មានកុមារណាម្នាក់ត្រូវស្ថិតនៅក្រៅប្រព័ន្ធអប់រំ ក្រៅសាលារៀន ឬបោះបង់ចោលសិក្សាឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និបាត និងសិក្ខាសាលាអប់រំស្តីពី “អភិបាលកិច្ចនិងភាព ជាអ្នកដឹកនាំអប់រំក្នុងយុគសម័យទំនើប” នៅថ្ងៃទី ៣០ ខែកក្កដា លោករដ្ឋមន្ត្រី មានប្រសាសន៍បន្តថា យើងត្រូវចូលរួមបណ្ដុះបណ្ដាលអភិវឌ្ឍន៍គុណសម្បទាសិស្សានុសិស្សនូវចំណេះដឹងជំនាញទេពកោសល្យច្នៃប្រឌិត បំណិនសតវត្សទី២១ គុណសម្បទាពលរដ្ឋសាកល និងក្រមសីលធម៌ប្រកបដោយមនសិការស្នេហាជាតិ ដើម្បីក្លាយជាអ្នកដឹកនាំសម្រាប់អភិវឌ្ឍប្រទេសជាតិនាពេលអនាគត។

លោករដ្ឋមន្ត្រីបានបន្តទៀតថា ការការអភិវឌ្ឍន៍ធនធានមនុស្សគឺជាការវិនិយោគរយៈពេលវែងរបស់សង្គមជាតិនឹងត្រូវការចូលរួមជាចាំបាច់នូវការការពារថែទាំ និងជ្រោមជ្រែងពីគ្រប់មជ្ឈដ្ឋានដើម្បីធានាថា ធនធានមនុស្សដែលផលិតយើងផលិតបានឆ្លើយតបទៅនឹងតម្រូវការនៃការអភិវឌ្ឍសង្គមសេដ្ឋកិច្ច និងការប្រកួតប្រជែងនៅក្នុងតំបន់ និងសាកលលោក។

នៅក្នុងឱកាសនោះ លោក រដ្ឋមន្ត្រីសូមលើកទឹកចិត្តឱ្យសហព័ន្ធសេវាអប់រំនៅកម្ពុជា និងសមាជិកទាំងអស់បន្តចូលរួមអភិវឌ្ឍវិស័យអប់រំជាមួយរាជរដ្ឋាភិបាល និងក្រសួង អប់រំ យុវជន និងកីឡានៅកាន់តែសកម្មថែមទៀតតាមរយៈការបង្កើតការវិនិយោគលើការអប់រំឱ្យកាន់តែច្រើន និងធ្វើជាដៃគូសន្ទនាលើបញ្ហាប្រឈមនឹងលើនវានវត្តន៍ក្នុងវិស័យអប់រំ ដើម្បីកសាងប្រព័ន្ធអប់រំមួយដែលមានសមធម៌ គុណធម៌ ភាពធន់ភាពឆ្លើយតបទៅនឹងតម្រូវការ នៃការអភិវឌ្ឍសង្គមសេដ្ឋកិច្ចកម្ពុជាតំបន់ និងសាកលលោក។

ឧកញ៉ា ប៉ិច បូឡែន ប្រធានសហព័ន្ធសេវាអប់រំនៅកម្ពុជា បានលើកឡើងថា សហព័ន្ធសេវាអប់រំនៅកម្ពុជា ដែលមានអាយុកាលជាង ២ឆ្នាំនេះមានការទទួលស្គាល់ពីក្រសួងមហាផ្ទៃ និងកំពុងធ្វើការជិតស្និទ្ធជាមួយក្រសួងអបរំ យុវជន និងកីឡា និងក្រសួងការងារបណ្តុះបណ្តាលនិងវិជ្ជាជីវៈ។

លោកបានបន្តថា សហព័ន្ធសេវាអប់រំនៅកម្ពុជា បានធ្វើការងារជាច្រើនដើម្បីជួយដល់បណ្តាសមាជិក ដែលរួមមានសាលាចំណេះទូទៅកម្រិតមត្តេយ្យ បឋម និងមធ្យម សាលាភាសា សាលាបណ្តុះបណ្តាលវិជ្ជាជីវៈ ក៏ដូចជាគ្រឹះស្ថានបណ្តុះបណ្តាល និងក្រុមហ៊ុនបច្ចេកវិទ្យាផងដែរ។ សកម្មភាពទាំងនោះរួមមាន ការសម្របសម្រួលការចាក់វ៉ាក់សាំងជូនដល់គ្រូ សិស្សានុសិស្ស ការរកប្រភពហិរញ្ញប្បទាន បច្ចេកវិទ្យាក្នុងការបង្រៀនតាមអនឡាញដើម្បីឱ្យមានបំនណិនឌីជីថល ការបង្កើតការផ្លាស់ប្តូរទស្សនកិច្ចសាលាទៅវិញទៅមកដើម្បីរៀនសូត្រពីគ្នា ចែករម្លែកគោលនយោបាយ បទពិសោធន៍ និងវិធីសាស្ត្របណ្តុះបណ្តាល។

លោកបានបញ្ជាក់ថា បេសកកម្មរបស់សហព័ន្ធសេវាអប់រំនៅកម្ពុជាគឺលើកកម្ពស់គុណភាពវិស័យអប់រំ ជាពិសេសវិស័យឯកជនឱ្យកាន់តែប្រសើរឡើងឱ្យស្របតាមគោលនយោបាយយុទ្ធសាស្ត្រអភិវឌ្ឍធនធានមនុស្សរបស់រាជរដ្ឋាភិបាល។ទិសដៅបន្ទាប់របស់សហព័ន្ធគឺការកសាងសមត្ថភាពអភិវឌ្ឍសាលារៀនធ្វើយ៉ាងម៉េចឱ្យគ្រឹះស្ថានឯកជនទាំងអស់ ផ្តល់សេវាអប់រំកាន់តែមានគុណភាព៕

អត្ថបទ៖ សំអឿន