រដ្ឋាភិបាលបង្កើតគណៈកម្មការអន្តរក្រសួង ដើម្បីជំរុញគម្រោងសាងសង់ផ្លូវល្បឿនលឿនភ្នំពេញ-ក្រុងបាវិត

រាជរដ្ឋាភិបាលបានសម្រេចបង្កើតគណៈកម្មការអន្តរក្រសួង ដើម្បីជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-បាវិត សម្រេចឱ្យបានជាស្ថាពរសំដៅរួមចំណែកពន្លឿនការអភិវឌ្ឍច្រករបៀងរាជធានីភ្នំពេញ ក្រុងបាវិត។

យោងតាមសេចក្តីសម្រេចរបស់រាជរដ្ឋាភិបាលដែលទើបផ្សព្វផ្សាយនៅថ្ងៃទី២៩កញ្ញា នេះ បានឱ្យដឹងថា រដ្ឋាភិបាលសម្រេចបង្កើតគណៈកម្មការអន្តរក្រសួងដើម្បីជំរុញការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត ដែលស្នើសុំវិនិយោគដោយក្រុមហ៊ុន china road and Bridge corperation(CBRC) ក្រោមក្របខណ្ឌសាងសង់អាជីវកម្មផ្ទេរដែលមានសមាសភាពចំនួន១៩រូប ក្នុងនោះលោក ស៊ុន ចាន់ថុល ទេសរដ្ឋមន្ត្រីរដ្ឋមន្ត្រីក្រសួងសាធារណការដឹកជញ្ជូនជាប្រធាន។

គណៈកម្មការនេះមានភារកិច្ចពិនិត្យផ្ដល់យោបល់អំពីនីតិវិធីក្របខណ្ឌគតិយុត្ត និងរូបភាពនៃកាវិនិយោគលើគម្រោង ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត។ ជំរុញគម្រោងហេដ្ឋារចនាសម្ព័ន្ធផ្លូវល្បឿន លឿនខាងលើឲ្យបានសម្រេចជាស្ថាពរដើម្បីរួមចំណែកពន្លឿនការអភិវឌ្ឍច្រករបៀងរាជធានីភ្នំពេញក្រុងបាវិត។ ធ្វើរបាយការណ៍ស្ដីពីលទ្ធផលការងារជួនប្រមុខរាជរដ្ឋាភិបាលតាមរយៈទីស្តីការគណៈរដ្ឋមន្ត្រី។

គណៈកម្មការនេះអាចបង្កើតអនុគណៈកម្មការមួយចំនួនតាមការចាំបាច់ ហើយអនុប្រធាន និងសមាជិកនៃគណៈកម្មការនេះត្រូវចូលរួមប្រជុំតាមការអញ្ជើញរបស់ប្រធាន។ ប្រធានគណៈកម្មការនេះមានសិទ្ធិអញ្ជើញតំណាងក្រសួងស្ថាប័ននានាឱ្យចូលរួមដើម្បីពិនិត្យ និងផ្ដល់យោបល់ក្នុងករណីចាំបាច់ពិសេស គណៈកម្មការនេះមានសិទ្ធិប្រើប្រាស់ត្រារបស់ក្រសួងសាធារណការនិងដឹកជញ្ជូន។

ចំពោះសេចក្តីសម្រេចលេខ៧៥សសរចុះថ្ងៃទី១៥ ខែកក្កដា ឆ្នាំ២០២០ស្តីពីការបង្កើតគណៈកម្មការអន្តរក្រសួងដើម្បីជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត និងបទប្បញ្ញត្តិទាំងឡាយណាដែលផ្ទុយនឹងសេចកីសម្រេចនេះត្រូវទុកជានិរាករណ៍៕

អត្ថបទ៖ សំអឿន