សរុប​ករណី​​​គ្រោះថ្នាក់លើ​ផ្លូវ​ល្បឿនលឿន​ ក្រោយ​​ដាក់​ឲ្យ​បើកបរ​សាកល្បង​ពេញមួយខែ

ក្នុងរយៈពេល ៣១ ថ្ងៃ នៃការអនុញ្ញាតិ​ឲ្យ​បើកបរ​សាកល្បងដោយឥតគិតថ្លៃលើ​ផ្លូវ​ល្បឿនលឿន​ភ្នំពេញ-ខេត្តព្រះសីហនុ មានយានយន្តចំនួន ៤៣៧ ៣៨១គ្រឿង បានធ្វើចរាចរណ៍ចេញចូលតាមស្ថានីយទាំង ៨ ទីតាំង។

ក្នុងចំណោមយានយន្តចំនួនជិត ៤៤ម៉ឺនគ្រឿង ដែលបានចរាចរណ៍ពេញមួយខែនេះ ករណីគ្រោះថ្នាក់មានចំនួន ១៩ ករណី (ស្មើនឹង ០,០០៤% បើធៀបទៅនឹងទំហំចរាចរណ៍ដែលបានកត់ត្រា) និង​មានករណីប្រឹក្សាយោបល់សាកសួរព័ត៌មាន និងស្វែងរកជំនួយសង្គ្រោះសរុបចំនួន ១២៩១ខ្សែ។

ការធ្វើដំណើរ​តាម​​ផ្លូវល្បឿនលឿន ភ្នំពេញ-ក្រុងព្រះសីហនុ បាន​ចាប់ផ្តើមគិតថ្លៃ​​សេវា​ចាប់ថ្ងៃទី០១ ខែវិច្ឆិកា ឆ្នាំ​២០២២។ ចំពោះថ្លៃ​ធ្វើដំណើរ ត្រូវគណនាតាមចម្ងាយជាក់ស្តែងនៃការបើកបរ និងតាមប្រភេទយានយន្ត។

ក្នុង​មួយ​ឆ្នាំដំបូង ក្រុមហ៊ុនបានបញ្ចុះតម្លៃសេវាចំនួន ២០% ជូនដល់បងប្អូនអ្នកធ្វើដំណើរចាប់ពីថ្ងៃទី០១ ខែវិច្ឆិកា ឆ្នាំ​២០២២ រហូតដល់ថ្ងៃទី៣១ ខែតុលា ឆ្នាំ២០២៣៕