អ្នកជំនាញអូស្ត្រាលី និងអាមេរិក ផ្លាស់ប្តូរបច្ចេកទេសប្រើប្រាស់ សុនខល្បាត នៅកម្ពុជា

អ្នកជំនាញមកពីប្រទេសអូស្ត្រាលី និងសហរដ្ឋអាមេរិក បានមកផ្លាស់ប្តូរបទពិសោធន៍លើជំនាញបច្ចេកទេសហ្វឹកហ្វឺន និងប្រើប្រាស់សុនខល្បាតដល់គ្រូហ្វឹកហ្វឺនបច្ចេកទេសសុនខរបស់ស៊ីម៉ាក់ និងមន្ត្រីជំនាញបច្ចេកទេសសុនខរបស់កងកម្លាំងសមត្ថកិច្ច នៃស្ថាប័នពាក់ព័ន្ធរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកវគ្គហ្វឹកហ្វឺនជំនាញបច្ចេកទេសសុនខល្បាត នៅថ្ងៃទី៦ ខែកុម្ភៈ ឆ្នាំ២០២៣នេះ នៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង លោក ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានមានប្រសាសន៍ថា វគ្គហ្វឹកហ្វឺននេះ មានគោលបំណងពង្រឹងសមត្ថភាព និងផ្លាស់ប្តូរបទពិសោធន៍លើជំនាញបច្ចេកទេសហ្វឹកហ្វឺន និងប្រើប្រាស់សុនខល្បាត ជូនដល់សិក្ខាកាមដែលជាគ្រូហ្វឹកហ្វឺនបច្ចេកទេសសុនខរបស់ស៊ីម៉ាក់ និងមន្ត្រីជំនាញបច្ចេកទេសសុនខរបស់កងកម្លាំងសមត្ថកិច្ច នៃស្ថាប័នពាកព័ន្ធ។ ជាមួយគ្នានេះ វគ្គហ្វឹកហ្វឺននេះក៏មានគ្រូឧទ្ទេសជំនាញសុនខល្បាតមកពីប្រទេសអូស្ត្រាលី​ និងសហរដ្ឋអាមេរិក​​ ដើម្បីផ្លាស់ប្តូរបទពិសោធន៍លើជំនាញបច្ចេកទេសជាក់ស្តែង។

លោក ហេង រតនា បានបន្តទៀតថា ក្នុងភាពជាម្ចាស់ និងភាពជាដៃគូជាមួយដៃគូអភិវឌ្ឍន៍មួយចំនួន ជាពិសេសអង្គការ NPA ស៊ីម៉ាក់ បានខិតខំប្រឹងប្រែងពង្រឹងសមត្ថភាព និងគុណភាពមន្ត្រីបុគ្គលិកជំនាញបច្ចេកទេសសុនខរបស់ខ្លួន និងធ្វើការស្រាវជាវ និងអភិវឌ្ឍន៍បច្ចេកទេសសុនខ ដើម្បីពន្លឿនកិច្ចប្រតិបត្តិការបោសសម្អាតមីននិងគ្រាប់ និងប្រតិបត្តការផ្សេងៗទៀត រួមមាន បច្ចេកទេសសុនខហិតមីនខ្សែវែង (LLD) សុនខហិតគ្រាប់យុទ្ឋភណ្ឌមិនទាន់ផ្ទុះ (EDD) សុនខហិតរកគ្រាប់ ជាតិផ្ទុះកែច្នៃ (IED) សុនខស្រាវជ្រាវបច្ចេកទេស (STD) និងសុនខស្រាវជ្រាវបច្ចេកទេស និងបោស​សម្អាត​គ្រាប់បែកចង្កោម (CTD) ជាដើម។ ថ្មីៗកន្លងទៅនេះ ដោយសហការជាមួយសាកលវិទ្យាល័យវិទ្យាសាស្ត្រសុខាភិបាល មណ្ឌលសុនខបានទទួលជោគជ័យគួរជាទីមោទនៈ ក្នុងការស្រាវជ្រាវ និងអភិវឌ្ឍបច្ចេកទេស សុនខហិតរកអ្នកផ្ទុកវីរុសជំងឺកូវីដ-១៩ ផងដែរ។

គួរបញ្ជាក់ថា វគ្គហ្វឹកហ្វឺនជំនាញបច្ចេកទេសសុនខល្បាតនេះ មានរយៈពេល ១សប្តាហ៍ ចាប់ពីថ្ងៃទី៦ ដល់ថ្ងៃទី១១ ខែកុម្ភៈ ឆ្នាំ២០២៣ ដោយមានសិក្ខាកាមចូលរួមចំនួន ៣៥ នាក់ មកពីនាយកដ្ឋាននគរបាលអន្តរាគមន៍ពិសេស បញ្ជាការដ្ឋានកងរាជអាវុធហត្ថលើផ្ទៃប្រទេស បញ្ជារការដ្ឋានជាតិកម្លាំងពិសេសប្រឆាំងភេរវកម្ម និងបញ្ជាការដ្ឋានទ័ពពិសេស៕

អត្ថបទ៖ សំអឿន​