ព័ត៌មានជាតិ

គម្រោងស្តារពង្រីកផ្លូវជាតិលេខ ៣៣ សម្រេចបាន ១៩ ភាគរយ

បានផុស

១២ ខែ មុន

នៅ

ថ្ងៃចន្ទ ២៧ មីនា ២០២៣

ដោយ

គម្រោងស្តារពង្រីកផ្លូវជាតិលេខ ៣៣ ដែលបានបើកការដ្ឋានសាងសង់កាលពីថ្ងៃទី៣០ ខែធ្នូ ឆ្នាំ២០២២ បច្ចុប្បន្នសម្រេចបានលទ្ធផលប្រមាណ ១៩% គិតត្រឹមថ្ងៃទី០៣ ខែមីនា ឆ្នាំ២០២៣។

កាលពីថ្ងៃទី២៤ ខែមីនា ឆ្នាំ២០២៣ ក្រុមការងារនៃអង្គភាពអនុវត្តគម្រោងរបស់ក្រសួងសាធារណការ និងដឹកជញ្ជូន (PIU) បានចុះត្រួតពិនិត្យបច្ចេកទេសសាងសង់ និងវឌ្ឍនភាពការងារ នៃគម្រោងពង្រីក និងលើកកម្រិតគុណភាពផ្លូវជាតិលេខ៣៣ ពីទីរួមខេត្តកំពតដល់ច្រកលក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទេស តារារ័ត្ន អគ្គនាយករងនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដែលបានដឹកនាំប្រតិភូចុះត្រួតពិនិត្យការសាងសង់ផ្លូវជាតិលេខ ៣៣ បានណែនាំដល់ក្រុមបច្ចេកទេសក្រុមហ៊ុនសាជីវកម្មស្ពាននិងថ្នល់ចិន (CRBC) ដែលទទួលបន្ទុកការសាងសង់ ត្រូវបង្កើនការយកចិត្តទុកដាក់ឱ្យបានខ្ពស់លើការអនុវត្តការងារឱ្យបានត្រឹមត្រូវតាមលក្ខណៈបច្ចេកទេស ពិសេសក៏ត្រូវគិតគូរឱ្យបានហ្មត់ចត់ពីសុវត្ថិភាពនៅតាមការដ្ឋានសាងសង់ ដោយក្រុមហ៊ុនត្រូវពិនិត្យបន្ថែមលើការដាក់ផ្លាកសញ្ញាជូនដំណឹង ផ្លាកសញ្ញាបញ្ជៀសចរាចរណ៍ និងការស្រោចទឹកកាត់បន្ថយដីហុយ ដើម្បីជៀសវាងការរំខានដល់បងប្អូនប្រជាពលរដ្ឋ។

ផ្លូវជាតិលេខ៣៣ បានបើកការដ្ឋានសាងសង់កាលពីថ្ងៃទី៣០ ខែធ្នូ ឆ្នាំ២០២២ មានប្រវែងសរុបជិត ៥៣ គីឡូម៉ែត្រ ចាប់ពីក្រុងកំពត (ចំណុចប្រសព្វផ្លូវជាតិលេខ ៣) ដល់ច្រកលក (ព្រំដែនកម្ពុជា-វៀតណាម) រួមទាំងផ្លូវតភ្ជាប់ក្នុងក្រុងកំពត (ផ្លូវក្រុងលេខ ៧០៩)។

ផ្លូវនេះត្រូវស្ដារនិងលើកកម្រិតគុណភាពជាប្រភេទផ្លូវក្រាលបេតុងកៅស៊ូ (AC) មានកម្រាស់ ៥ សង់ទីម៉ែត្រ និងកម្រាស់ ៧ សង់ទីម៉ែត្រ ព្រមទាំងពង្រីកទទឹងតួផ្លូវរហូតដល់ ១២ ម៉ែត្រ និងមានកំណាត់ផ្លូវចំនួន ៤ ទីតាំងនឹងត្រូវពង្រីកជា ៤ គន្លង (២ គន្លងទៅ ២ គន្លងមក) ប្រវែងសរុប ១,៤៣១ម៉ែត្រ និង ១ ទីតាំងទៀត នឹងត្រូវពង្រីកជា ៦ គន្លង (៣ គន្លងទៅ ៣ គន្លងមក) ប្រវែង ៤៨០ម៉ែត្រ៕

Related Topics:ហេដ្ឋារចនាសម្ព័ន្ធ