ទេសរដ្ឋមន្រ្តី លី ធុជ ជួបប្រជុំទ្វេភាគីជាមួយ អគ្គលេខាធិការរងអង្គការសហប្រជាជាតិ

នៅទីក្រុងបាងកក ប្រទេសថៃ នារសៀលថ្ងៃទី១៥ ខែឧសភា ឆ្នាំ២០២៥ ក្នុងនាមរាជរដ្ឋាភិបាលកម្ពុជា ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងប្រធានគណៈកម្មាធិការជាតិអេស្កាប់ បានជួបពិភាក្សាទ្វេភាគីជាមួយ លោកស្រី Armida Salsiah Alisjahbana អគ្គលេខាធិការរងអង្គការសហប្រជាជាតិ និងជាប្រធាន UN ESCAP ដើម្បីសម្តែងការគួរសម និងពង្រឹងពង្រីកកិច្ចសហប្រតិបត្តិការ ជាពិសេសទៅលើវិស័យសកម្មភាពមីនដែលជាគោលដៅទី១៨ “កម្ពុជាគ្មានគ្រាប់មីន និងសំណល់ជាតិផ្ទុះពីសង្រ្គាម” នៃក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ២០១៦-២០៣០។

ក្នុងជំនួបនេះ ទេសរដ្ឋមន្រ្តី បានផ្តាំសាកសួរសុខទុក្ខពី សម្តេចតេជោនាយករដ្ឋមន្រ្តី នៃព្រះរាជាណាចក្រកម្ពុជា ផ្ញើជូនលោកស្រី Armida Salsiah Alisjahbana ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការ និងភាពជាដៃគូរវាងរាជរដ្ឋាភិបាលកម្ពុជា និង UN ESCAP។

ជាមួយគ្នានោះ ទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅជូនចំពោះ UN ESCAP ដែលតែងតែផ្តល់ការគាំទ្រដល់សកម្មភាពមីននៅកម្ពុជា និងធ្វើជាសហប្រធានដឹកនាំព្រឹត្តិការណ៍អមស្តីពី ការបោសសម្អាតមីនដើម្បីការអភិវឌ្ឍប្រកបដោយចីរភាព ក្នុងអង្គសន្និបាតប្រចាំឆ្នាំលើកទី៧៩ របស់ UN ESCAP ដែលក្នុងវិស័យមីននេះ កម្ពុជា និង UN ESCAP បានប្តេជ្ញាចិត្តរួមគ្នាថា នឹងមិនឱ្យនៅសេសសល់ដីដែលមានការគម្រាមដោយសារមីន និងសំណល់ជាតិផ្ទុះពីសង្រ្គាមដទៃទៀតទេ៕