ព័ត៌មានជាតិ

រដ្ឋមន្ត្រីអប់រំ ៖ ការគាំពារ និងអភិវឌ្ឍន៍កុមារតូច ដើរតួនាទីយ៉ាងសំខាន់ ក្នុងការអភិវឌ្ឍធនធានមនុស្ស

បានផុស

១១ ខែ មុន

នៅ

ថ្ងៃសុក្រ ៩ មិថុនា ២០២៣

ដោយ

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា ការគាំពារ និងការអភិវឌ្ឍកុមារតូច បានដើរតួនាទីយ៉ាងសំខាន់ក្នុងការផ្ដល់នូវមូលដ្ឋានគ្រឹះដ៏រឹងមាំ ក្នុងការអភិវឌ្ឍធនធានមនុស្សនៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកសិក្ខាសាលាផ្សព្វផ្សាយដាក់ឲ្យអនុវត្តកញ្ចប់អប់រំមាតាបិតាស្ដីពីការចិញ្ចឹមបីបាច់កុមារតូច កាលពីថ្ងៃទី ៨ មិថុនា លោករដ្ឋមន្ត្រី បានបន្តថា ដើម្បីសម្រេចនូវចក្ខុវិស័យរបស់រាជរដ្ឋាភិបាលកម្ពុជា សម្រាប់ការគាំពារ និងអភិវឌ្ឍន៍កុមារតូច ដែលបានកំណត់ចក្ខុវិស័យថា ៖ “កុមារតូចទាំងអស់ ចាប់តាំងពីកំណើតរហូតដល់អាយុក្រោម ៦ ឆ្នាំ ត្រូវទទួលបានសេវាគាំពារ និងអភិវឌ្ឍន៍ ជាពិសេសកុមារតូចរងគ្រោះ កុមារតូចងាយរងគ្រោះ និងក្រខ្សត់ ស្របតាមរដ្ឋធម្មនុញ្ញ នៃ ព្រះរាជាណាចក្រកម្ពុជា”។

លោករដ្ឋមន្ត្រី បានបន្តទៀតថា ស្ថិតក្នុងបរិបទនេះ ការគាំពារ និងអភិវឌ្ឍន៍កុមារតូច បានដើរតួនាទីយ៉ាងសំខាន់ក្នុងការផ្ដល់នូវមូលដ្ឋានគ្រឹះដ៏រឹងមាំ ក្នុងការអភិវឌ្ឍធនធានមនុស្ស ដោយផ្ដើមចេញពីការគាំទ្រការអនុវត្តតាមបែបពហុវិស័យបញ្ចូលគ្នា។

លោករដ្ឋមន្ត្រី បានបន្ថែមថា ក្នុងរយៈពេល ១០ ឆ្នាំ ចុងក្រោយនេះ ថ្នាក់មត្តេយ្យសិក្សាគ្រប់រូបភាពមានការកើនឡើងពី ៨ ៩១១ ថ្នាក់ នៅឆ្នាំសិក្សា ២០១៣-២០១៤ ដល់ ១៤ ៩៥៦ ថ្នាក់ នៅឆ្នាំសិក្សា ២០២២-២០២៣។ ក្នុងនោះឆ្នាំសិក្សា ២០២២-២០២៣ ថ្នាក់មត្តេយ្យសិក្សារដ្ឋមាន ៨ ៤៥២ ថ្នាក់មត្តេយ្យសិក្សាសហគមន៍មាន ៣ ៤៥៩ (ក្នុងនោះមត្តេយ្យសិក្សាសហគមន៍មានលក្ខណៈស្តង់ដារមាន ១ ៣០៥ ថ្នាក់) និងថ្នាក់មត្តេយ្យសិក្សាឯកជនមាន ៣ ០៤៥។ ចំពោះកុមារអាយុ ៥ ឆ្នាំ ទទួលបានសេវាអប់រំកុមារតូចគ្រប់រូបភាព ៦៤.៨% រីឯកុមារ ៣៦% ផ្សេងទៀត ដែលមិនទាន់ទទួលបានអត្ថប្រយោជន៍ នៃការអភិវឌ្ឍ ចាំបាច់ត្រូវរួមគ្នាវិនិយោគបែបពហុវិស័យ ដើម្បីពួកគេមានលទ្ធភាពទទួលបានការអប់រំបានទាន់ពេលវេលា ដែលជាមូលដ្ឋានគ្រឹះមិនអាចខ្វះបាននាំឲ្យមានការផ្លាស់ប្ដូរនៅក្នុងជីវិត នៃការសិក្សា។

លោករដ្ឋមន្ត្រី បានបញ្ជាក់ថា «យើងក៏លើកទឹកចិត្តមាតាបិតា ឲ្យដើរតួនាទីយ៉ាងសកម្មក្នុងការជួយដល់កុមារតូចបានទទួលការសិក្សាពីដំបូង តាមរយៈការទទួលចំណេះដឹងពីគ្រូមត្តេយ្យសិក្សា និងអ្នកជំនាញផ្សេងទៀត ដើម្បីជួយពួកគេឲ្យយល់ដឹងពីសារៈសំខាន់ នៃការគាំពារ និងអភិវឌ្ឍន៍កុមារតូច»៕

អត្ថបទ ៖ សំអឿន