វិស័យធានារ៉ាប់រង មានសន្ទុះរីកចម្រើន ជួយសេដ្ឋកិច្ចជាតិ ១.១៧% នៃ GDP

វិស័យធានារ៉ាប់រងកម្ពុជាមានសន្ទុះរីកចម្រើនគួរឱ្យកត់សម្គាល់ ក្នុងរយៈពេល ជិតពីរទសវត្សរ៍កន្លងមកនេះ។ នៅក្នុងទីផ្សារធានារ៉ាប់រងកម្ពុជាបច្ចុប្បន្ន មានគ្រឹះស្ថានធានារ៉ាប់រងសរុបចំនួន៩៧ ដែលក្នុងនោះរួមមាន ក្រុមហ៊ុន​ធានារ៉ាប់រងទូទៅចំនួន១៨ ក្រុមហ៊ុនធានារ៉ាប់រង អាយុជីវិតចំនួន១៤ ក្រុមហ៊ុនធានារ៉ាប់រងខ្នាតតូចចំនួន៧ ក្រុមហ៊ុនធានារ៉ាប់រងបន្តចំនួន១ ក្រុមហ៊ុនជើង សាធានារ៉ាប់រងចំនួន២០ ក្រុមហ៊ុនភ្នាក់ងារធានារ៉ាប់រងចំនួន៣៤ និងក្រុមហ៊ុនវាយតម្លៃហានិភ័យធានារ៉ាប់រងចំនួន៣ កំពុងធ្វើប្រតិបត្តិការអាជីវកម្មធានារ៉ាប់រង។ ជាមួយនឹងកំណើន​គ្រឹះស្ថានធានារ៉ាប់រងនេះទំហំទីផ្សារធានារ៉ាប់រងកម្ពុជា បានកើនឡើងដល់ប្រមាណ ៣៣២ លានដុល្លារអាមេរិក ក្នុងឆ្នាំ២០២២ ដោយបានចូលរួមចំណែកក្នុងសេដ្ឋកិច្ចកម្ពុជាជាអត្រាប្រមាណ១,១៧% នៃផលិតផលក្នុងស្រុកសរុប GDP និងដង់ស៊ីតេធានារ៉ាប់រងចំនួន ២០,៥៣ ដុល្លារអាមេរិកក្នុងមួយនាក់។ នេះជាការបញ្ជាក់របស់លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា នៅក្នុង “ទិវាធានារ៉ាប់រង ២០២៣” នៅ ពហុកីឡដ្ឋានខេត្តកំពត នាពេលថ្មីៗនេះ។

បើតាមអគ្គនាយកនៃនិយ័តករធានារ៉ាប់រងកម្ពុជា ទិវាធានារ៉ាប់រងនេះបានរៀបចំឡើងក្នុងគោលបំណងសំខាន់ចំនួន ៣៖ ទី១)ជាការលើកកម្ពស់ ការយល់ដឹង និងជំរុញការផ្សព្វផ្សាយអំពីសេវាធានារ៉ាប់រងជូនសាធារណជន ទី២) ជាការបង្ហាញ​ពីការគាំទ្ររបស់រាជរដ្ឋាភិបាល ក្នុងការជំរុញឱ្យមានពិពិធកម្មផលិតផលហិរញ្ញវត្ថុនៅក្នុងវិស័យហិរញ្ញវត្ថុ ដូចមាន ចែង​នៅ​ក្នុងយុទ្ធសាស្ត្រចតុកោណដំណាក់កាលទី៤ ក្នុងអណត្តិទី៦របស់រាជរដ្ឋាភិបាល និងទី៣) ជាការ បង្ហាញដល់​សាធារណជន​ឱ្យបានជ្រាបថា វិស័យធានារ៉ាប់រងជាផ្នែកដ៏សំខាន់មួយនៅក្នុងវិស័យហិរញ្ញវត្ថុ ដែលមានតួនាទី​ក្នុងការ​ចូលរួម​ចំណែកកសាងសំណាញ់សុវត្ថិភាពសង្គម និងសេដ្ឋកិច្ចថ្នាក់ជាតិ។

ជាមួយគ្នានេះ លោក រស់ សីល រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអនុប្រធានក្រុមប្រឹក្សា អាជ្ញាធរសេវា​ហិរញ្ញវត្ថុមិនមែនធនាគារ បានឱ្យដឹងថា ទីផ្សារ ធានារ៉ាប់រងកម្ពុជានៅមានសក្តានុពលធំធេងសម្រាប់​ការរីកចម្រើន​នាពេល​ខាងមុខ ប៉ុន្តែទីផ្សារនេះ ក៏នៅមានបញ្ហាប្រឈមដោយកង្វះការយល់ដឹងរបស់សាធារណជនអំពី​អត្ថប្រយោជន៍​នៃការធានារ៉ាប់រង់ដែលកត្តានេះទាមទារឱ្យមានការផ្សព្វផ្សាយ និងអប់រំបញ្ជ្រាបសាធារណជន បន្ថែមទៀតអំពីខ្លឹមសារ និងអត្ថប្រយោជន៍នៃការធានារ៉ាប់រង។

ដោយមើលឃើញនូវសក្តានុពល និងបញ្ហាប្រឈមទាំងនេះ និយ័តករធានារ៉ាប់រងកម្ពុជា បានរៀបចំ ទិវាធានារ៉ាប់រងនេះ​ឡើង​ដោយសង្ឃឹមជឿជាក់ថា ទិវាធានារ៉ាប់រងនេះ នឹងរួមចំណែកជំរុញការអភិវឌ្ឍ សេដ្ឋកិច្ចសង្គមដល់ខេត្តកំពតផ្ទាល់ តាមរយៈការលើកកម្ពស់ការយល់ដឹងរបស់ប្រជាពលរដ្ឋក្នុងខេត្តអំពី អត្ថប្រយោជន៍នៃការធានារ៉ាប់រង និងការរុញសេវា​ធានារ៉ាប់រង​ឱ្យកៀកនឹងប្រជាពលរដ្ឋ។

សូមបញ្ជាក់ថា ទិវាធានារ៉ាប់រង ២០២៣ នេះ មានកម្មវិធីពិព័ណ៌របស់ក្រុមហ៊ុនធានារ៉ាប់រងទាំងអស់សម្រាប់​សាធារណ​ជន និងមានបន្ថែមកម្មវិធី “រត់ដើម្បីការពារសុខភាព” ក្នុងស្មារតីជួយដល់កាកបាទក្រហម ខេត្តកំពតផងដែរ៕