ព័ត៌មានជាតិ

អាជ្ញាធរខេត្តកំពង់ធំ បញ្ជាក់ថា បញ្ហាទឹកល្អក់នៅតំបន់អូរផ្អាវ និងតំបន់ស្រែព្រីង មិនប៉ះពាល់សុខភាពពលរដ្ឋទេ

បានផុស

៣ years មុន

នៅ

ថ្ងៃព្រហស្បតិ៍ ១៧ សីហា ២០២៣

ដោយ

កាលពីថ្ងៃទី ១៦ ខែសីហា ឆ្នាំ ២០២៣ លោក ងួន រាសី អភិបាលរងខេត្តកំពង់ធំ បានដឹកនាំកម្លាំងគណៈបញ្ជាការឯកភាពខេត្ត ចុះពិនិត្យស្ថានភាពទឹកអូរល្អក់ នៅតំបន់អូរផ្អាវ និងតំបន់ស្រែព្រីង ដោយពលរដ្ឋសង្ស័យថា មានសារធាតុគីមី។

ប្រតិបត្តិការនេះដែរ លោក ណឹម ចាន់ថា ប្រធានមន្ទីរឧស្សាហកម្មរ៉ែ និងថាមពលខេត្តកំពង់ធំ បញ្ជាក់ផងដែរថា កាលពីពេលថ្មីៗនេះ ប្រជាពលរដ្ឋរស់នៅតំបន់ស្រែព្រីង ស្រុកសណ្តាន់ ខេត្តកំពង់ធំ រាយការណ៍ថា ទឹកអូរនៅតំបន់ស្នងអន និងតំបន់ស្រែព្រីង មានសភាពល្អក់ខុសធម្មតា ដែលធ្វើឲ្យពួកគាត់ព្រួយបារម្ភ មិនហ៊ានប្រើប្រាស់ ដោយខ្លាចមានសារធាតុគីមីហូរចេញពីក្រុមហ៊ុនអាជីវកម្មរ៉ែមាសនៅតំបន់ភ្នំជី។

ក្រោយពីទទួលបានដំណឹងនេះ អាជ្ញាធរខេត្តកំពង់ធំ រួមជាមួយមន្ទីរជំនាញពាក់ព័ន្ធ បានចុះទៅពិនិត្យជាក់ស្ដែង ជាលទ្ធផលឃើញថា បញ្ហាដែលធ្វើឲ្យទឹកអូរនៅតំបន់ផ្នែកខាងក្រោមមានសភាពល្អក់ ដោយសារប៉ុន្មានថ្ងៃមុននេះ ភ្លៀងធ្លាក់ខ្លាំងជួនពេលក្រុមជីកប្រឡាយក្រវាត់សម្រាប់ស្តុកយកទឹកប្រើប្រាស់នៅរដូវប្រាំង ជីកមិនទាន់រួចរាល់ ភ្លៀងធ្លាក់ខ្លាំងប៉ះលើដីដែលជីកថ្មីហូរនាំទៅតាមទឹកចូលក្នុងអូរផ្នែកទំនាប ធ្វើឲ្យទឹកនេះល្អក់ មានលំអងដីនៅជាមួយ។

លោកបញ្ជាក់ថា ទឹកនេះមិនមានធាតុណាមួយធ្វើឲ្យប៉ះពាល់ដល់សុខភាពប្រជាពលរដ្ឋដែលប្រើប្រាស់ទឹកក្នុងតំបន់នោះទេ។ បច្ចុប្បន្នទឹកចាប់ផ្ដើមថ្លាឡើងវិញហើយ ចំពោះអាចម៍ដីដែលហូរទៅតាមទឹកភ្លៀង ក៏ភាគីខាងក្រុមហ៊ុនបានទប់ស្កាត់រួចរាល់ មិនធ្វើឲ្យប៉ះពាល់ដល់ប្រជាពលរដ្ឋទៀតដែរ។

បើទោះបីជាយ៉ាងនេះក្ដី លោកប្រធានមន្ទីរឧស្សាហកម្មរ៉ែ និងថាមពលខេត្តកំពង់ធំ នៅតែបន្តតាមដាន និងពិនិត្យ ដើម្បីធានាបានថា ទឹកនៅតំបន់នោះមានសុវត្ថិភាពដល់សុខភាពប្រជាពលរដ្ឋប្រើប្រាស់ប្រចាំថ្ងៃ។ លោក ក៏បានអគុណដល់ប្រជាពលរដ្ឋដែលរាយការណ៍មកកាន់អាជ្ញាធរផងដែរ៕

អត្ថបទ ៖ ឈាង មករា