ព័ត៌មានជាតិ

គិតត្រឹមចុងខែសីហានេះ មន្ត្រីជំនាញ ស្រង់គ្រាប់មិនទាន់ផ្ទុះចេញពីបាតទន្លេ ជិត ២ ម៉ឺនគ្រាប់ និងបំណែកនាវាជាង ២០០ តោន

បានផុស

២ years មុន

នៅ

ថ្ងៃពុធ ៣០ សីហា ២០២៣

ដោយ

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ លើកឡើងថា គិតត្រឹមចុងខែសីហានេះ ក្រុមប្រតិបត្តិការសម្អាតគ្រាប់យុទ្ធភណ្ឌមិនទាន់ផ្ទុះ និងស្រង់នាវាលិចក្នុងទន្លេ បានស្រង់គ្រាប់មិនទាន់ផ្ទុះជាង ១៧.០០០ គ្រាប់ និងបំណែកនាវាជាង ២០០ តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំពិនិត្យវឌ្ឍនភាពប្រតិបត្តិការស្រង់គ្រាប់មិនទាន់ផ្ទុះ និងនាវាលិចនៅបាតទន្លេ កាលពីថ្ងៃទី ២៩ សីហា នៅទីស្ដីការក្រសួងសេដ្ឋកិច្ច និងហិរញ្ញវត្ថុ លោក ហេង រតនា បន្តថា ការបោសសម្អាតស្រង់គ្រាប់មិនទាន់ផ្ទុះ និងបំបែកនាវាលិចបាតទន្លេនេះ បានប្រព្រឹត្តិទៅជាមួយលទ្ធផលគួរឲ្យកត់សម្គាល់ ដោយមានការគាំទ្រពេញទំហឹងពីក្រសួងការពារជាតិ ក្រសួងមហាផ្ទៃ និងក្រសួងរ៉ែ និងថាមពល ជាពិសេសការគាំទ្រពីក្រសួងសេដ្ឋកិច្ច និងហិរញ្ញវត្ថុ។ គ្រាប់យុទ្ធភណ្ឌមិនទាន់ផ្ទុះ និងបំណែកនាវាស្រង់ចេញពីបាតទន្លេ ស្ថិតក្នុងភូមិសាស្ត្រស្រុកពាមជ័រ ខេត្តព្រៃវែង ដែលបានអនុវត្តនៅដើមឆ្នាំ ២០២២ កន្លងទៅ ដោយប្រើរយៈពេល ១៨ ខែ។

បើតាម លោក ហេង រតនា តាមផែនការស្រាវជ្រាវដំបូងបានរាវរកទិន្នន័យនៅបាតទន្លេជាង ២៥០០ ចំណុច ដែលមានគ្រាប់យុទ្ធភណ្ឌមិនទាន់ផ្ទុះ ហើយវាយតម្លៃការបោសសម្អាតមានរយៈពេល ១៨ ខែ។ ប៉ុន្តែការអនុវត្តជាក់ស្ដែងមិនសម្រេចតាមផែនការនោះទេ ដោយសារនាវាដែលលិចក្នុងទន្លេនេះមានផ្ទុកគ្រាប់យុទ្ធភណ្ឌមិនទាន់ផ្ទុះប្រមាណជា ៣ ពាន់តោន ទៅ ៣ ពាន់ ៥ រយតោន ឯណោះ។

លោកអគ្គនាយកស៊ីម៉ាក់ បានបញ្ជាក់ថា ការបោសសម្អាតយុទ្ធភណ្ឌមិនទាន់ផ្ទុះ និងស្រង់នាវាលិចក្នុងទន្លេ នៅការដ្ឋានកោះពាមរាំង ត្រូវបានក្រុមជំនាញ នៃក្រុមការងារអន្តរក្រសួង កំណត់នូវទំហំប្រមាណជិត ៣០០ ហិកតា ដែលចែកចេញជាបីផ្នែក រួមមាន ៖ ទី១.តំបន់ដីគោក ,ទី២.តំបន់មានហានិភ័យទាប ,និងទី៣.ជាតំបន់មានហានិភ័យខ្ពស់៕

អត្ថបទ ៖ សំអឿន