ព័ត៌មានជាតិ

ក្មេងស្រីម្នាក់ ជួយប្អូនស្រីឲ្យរួចជីវិត តែលង់ទឹកខ្លួនឯងវិញ មានស្ថានភាពធ្ងន់ធ្ងរ ត្រូវមន្ទីរពេទ្យគន្ធបុប្ផាភ្នំពេញសង្គ្រោះជីវិត

បានផុស

១ year មុន

នៅ

ថ្ងៃចន្ទ ១៦ តុលា ២០២៣

ដោយ

ក្មេងស្រី អាយុ ១៤ ឆ្នាំ ម្នាក់ ដែលលោតចុះទឹកជួយប្អូនស្រីតូចរបស់ខ្លួនឲ្យរួចជីវិត ហើយលង់ទឹកខ្លួនឯងវិញ មានស្ថានភាពធ្ងន់ធ្ងរ សន្លប់បាត់ស្មារតី ខ្វះអុកស៊ីសែនក្នុងខួរក្បាល និងទឹកចូលសួតពេញទាំងសងខាង ត្រូវបានមន្ទីរពេទ្យគន្ធបុប្ផាភ្នំពេញ សង្គ្រោះរហូតមានជីវិតរស់ឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី ១៦ ខែតុលា ឆ្នាំ ២០២៣ នេះ តាមរយៈផេកហ្វេសប៊ុកផ្លូវការ Dr. Beat Richner បានឲ្យដឹងថា «ទឹកចិត្តបងស្រី @បងស្រីខ្ញុំ» ក្មេងស្រីជំទង់ អាយុ ១៤ ឆ្នាំ ម្នាក់ ពិតជាវីរនារីពិតមែន ដែលបានលោតចុះក្នុងទឹក ដើម្បីជួយសង្គ្រោះជីវិតប្អូនស្រីតូចរបស់ខ្លួនឲ្យរួចជីវិត តែជាអកុសល ខ្លួននាងផ្ទាល់ ត្រូវបានលង់ទឹកដោយខ្លួនឯងទៅវិញ។

ផេកហ្វេសប៊ុកដដែល បន្ថែមថា ក្មេងស្រីជំទង់ខាងលើ ត្រូវមណ្ឌលសុខភាពមួយនៅខេត្តកំពង់ធំ បញ្ជូនមកកាន់មន្ទីរពេទ្យគន្ធបុប្ផាភ្នំពេញ ដោយមានស្ថានភាពធ្ងន់ធ្ងរ សន្លប់បាត់ស្មារតី ខ្វះអុកស៊ីសែនក្នុងខួរក្បាល និងទឹកចូលសួតពេញទាំងសងខាង នាងត្រូវបានជួយសង្គ្រោះជីវិត ក្រោយព្យាបាលថែទាំអស់ ៩ ថ្ងៃ ក្នុងបន្ទប់សង្គ្រោះបន្ទាន់។ ហើយ ថ្ងៃនេះ ក្មេងស្រីរូបនេះ មានជីវិតរស់ឡើងវិញ ដោយស្នាមញញឹម។

គួរជម្រាបថា រាល់ការព្យាបាលជំងឺទាំងអស់ គឺឥតគិតថ្លៃសម្រាប់គ្រប់ៗ គ្នា ដោយគ្មានការរើសអើងចំពោះជនណាម្នាក់ឡើយ៕

អត្ថបទ ៖ ពិសី