ផ្ទះល្វែង​ជាច្រើន ប្រកាស​ដាក់ស្លាកលក់​បន្ត​បន្ទាប់ នៅតំប​ន់​ជន់លិច​ក្នុង​ខណ្ឌដង្កោ

ទឹកជំនន់ស្ទឹងព្រែកត្នោតឆ្នាំ​មុន​ បានវាយលុកខណ្ឌដង្កោ ដែលមានផ្ទះជិត ៥ ពាន់ខ្នងរងការជន់លិច។ បន្ទាប់ពីការលិចទឹក និងជំងឺកូវីដ១៩ គេសង្កេតឃើញមានផ្ទះជាច្រើនខ្នង បានប្រកាសដាក់លក់ជាបន្តបន្ទាប់ដូចជាផ្ទះ​នៅ​តំបន់​ស្ពាន​ព្រែក​ជ្រៃ និង​តំបន់​គួរស្រូវជាដើម។

មានការ​លើកឡើងថា អាច​ដោយ​សារ​ម្ចាស់​​ផ្ទះ​​បារម្ភ​ពីការជន​លិច​នៅ​ឆ្នាំ​ក្រោយ​ៗ​ទៀត​។ យ៉ាងណាមិញ​អ្នក​ជំនាញ​​ផ្នែក​អចល​​នទ្រព្យ​ និងអាជ្ញាធរយល់ខុសពីនេះ។

លោក ច្រឹក សុខនីម ​ប្រធាន​សមាគម​អ្នកវាយតម្លៃ និ​ងភ្នាក់ងារ​អចលនទ្រព្យកម្ពុជា បានប្រាប់​កម្ពុជាថ្មីនៅថ្ងៃសុក្រនេះថា សមាគម​មិនមាន​តួលេខ​​នោះទេ ខណៈ​វិស័យ​​អចលនទ្រព្យ ការទិញលក់ គឺធ្វើឡើងធម្មតា មិនពាក់ព័ន្ធនឹង​តំបន់​លិចទឹកនោះទេ។

លោកថា “ធម្មតា អចលនទ្រព្យ គេទិញលក់ៗ នៅកន្លែងណាក៏គេ​ដាក់លក់មិនមែន​ជារឿងចម្លែកនោះទេ ការទិញ​លក់ជារឿងធម្មតា”។

លោកស្រី គឹម ញឹប អភិបាលខណ្ឌដង្កោ​មិន​ធ្វើការ​អត្ថាធិប្បាយ​លំអិត​ដែរ​ និង​ថា ការដាក់លក់ផ្ទះរបស់ប្រជាពលរដ្ឋ​គឺជារឿងរបស់ម្ចាស់​ផ្ទះក្នុងគ្រួសារបុគ្គលនីមួយៗ ។

លោកស្រីប្រាប់ថា “អាហ្នឹង បុគ្គលរបស់គាត់​ហើយឲ្យខ្ញុំនិយាយពីស្ថាន​ភាពទូទៅដោយសារកត្តាប៉ះពាល់នេះ ប៉ះពាល់នោះខ្ញុំម៉េចដឹងម្ចាស់ផ្ទះគេមួយៗ”។

លោកស្រីប្រាប់កម្ពុជាថ្មីឲ្យដឹងថា ចំពោះគម្រោងកែសម្រួលហេដ្ឋារចនាសម្ព័ន្ធ ដើម្បីបញ្ចៀស ឬការពាគ្រោះទឹកជំនន់លោក ស្រីបញ្ជាក់ថា ជាដែនសមត្ថកិច្ចរបស់អន្តរក្រសួងថ្នាក់ជាតិ ដែលមានផែនការធ្វើផ្លូវធំៗ ហើយរដ្ឋបាលសង្កាត់ ឬខណ្ឌគឺធ្វើផ្លូវតូចៗតែប៉ុណ្ណោះ ក្រសួងសារធារណការ ក្រសួងធនធានទឹក និងក្រសួងអភិវឌ្ឍជនបទ ជាអ្នកចេញ​ផែនការអភិវឌ្ឍន៍ហេដ្ឋារចនាសម្ព័ន្ធធំៗ។

សូមរំឮកថា ទឹកជំនន់​ដែល​បង្ក​ដោយសារ​ភ្លៀង​ធ្លាក់​ជាប់ៗ​គ្នា​ជាច្រើន​ថ្ងៃ​ និងបាក់​ទំនប់​សណ្ដ​ស្ទឹង​ព្រែក​ត្នោត កាលពីខែកញ្ញា ឆ្នាំ ២០២០ បាន​ជន់លិចលំនៅឋានប្រជាពលរដ្ឋរាប់ពាន់ខ្នង ក្នុងនោះមានផ្ទះ បុរី ឃ្លាំង និងរោចក្រផ្សេងៗ។

ទឹកជំនន់ស្ទឹងព្រែកត្នោតបានវាយលុក ខណ្ឌដង្កោ ក្នុងនោះមានសង្កាត់ចំនួន ១១ រងការជនលិច និងផ្ទះជិត ៥ ពាន់ខ្នង នឹងប៉ះពាល់ដល់ប្រជាពលរដ្ឋជាង ៥ ពាន់គ្រួសារ៕

អត្ថបទ៖ ឡេង ដេត