គ្រូពេទ្យជប៉ុនផ្តល់គន្លឹះសំខាន់ៗចំនួនពីរដើម្បីអភិវឌ្ឍន៍វិស័យសុខាភិបាលនៅកម្ពុជាឱ្យកាន់តែរីកចម្រើន

គ្រូពេទ្យជប៉ុនដែលបានមកធ្វើការនៅកម្ពុជារយៈពេល៧ឆ្នាំបានបង្ហាញនូវគន្លឹះសំខាន់ៗចំនួនពីរដើម្បីចូលរួមអភិវឌ្ឍន៍វិស័យសុខាភិបាលនៅកម្ពុជាឱ្យកាន់តែរីកចម្រើនបន្ថែមទៀត។

ថ្លែងក្នុងឱកាសរំលឹកខួប៧ឆ្នាំនៃការបង្កើតមន្ទីរពេទ្យជប៉ុន សាន់រ៉ាយស៍ភ្នំពេញ កាលពីថ្ងៃទី២៩តុលា លោកវេជ្ជបណ្ឌិត ម៉ាណាប៊ុ អូកាណាវ៉ា ប្រធានមន្ទីរពេទ្យជប៉ុនសាន់រ៉ាយស៍ភ្នំពេញបានមានប្រសាសន៍ថា គន្លឹះចំនួន២ដែលជំរុញឱ្យវិស័យសុខាភិបាលកាន់តែរីកចម្រើន គឺទី១ ទាក់ទងទៅនឹងចំណេះដឹងក្រុមគ្រូពេទ្យ វេជ្ជបណ្ឌិត និងបុគ្គលិកសុខភិបាលទាំងអស់ត្រូវពង្រឹងសមត្ថភាពបច្ចេកទេស ឬចំណេះដឹងបន្ថែមទៀតទៅលើវិស័យសុខាភិបាល និងជំងឺថ្មីៗ និងទី២ទាក់
ទិននឹងផ្តល់សេវាកម្ម គឺត្រូវចេះទំនាក់ទំនងអ្នកជំងឺ និងក្រុមគ្រួសារអ្នកជំងឺឱ្យបានល្អពោលគឺចាត់ទុកពួកគាត់ជាក្រុមគ្រួសារតែមួយដើម្បីឱ្យពួកគាត់មានភាពកក់ក្តៅទាំងពេលមកមន្ទីរពេទ្យនិងពេលកំពុងព្យាបាលជំងឺនៅផ្ទះហើយការងារនេះនៅមន្ទីរពេទ្យជប៉ុនសាន់រាយបានធ្វើរួចហើយ។

យ៉ាងណាក៏ដោយលោកវេជ្ជបណ្ឌិតបានបន្តថា ៧ឆ្នាំមកនេះវិស័យសុខាភិបាលកម្ពុជាមានការរីកចម្រើនពិសេសបុគ្គលិកសុខាភិបាលមានការផ្លាស់ប្តូរនិងជំរុញខ្លួនឯងស្របទៅតាមបច្ចេកវិទ្យាថ្មីៗនៃការវិវត្តន៍របស់ជំងឺនិងការព្យាបាលរួមទាំងមានការបំពាក់សម្ភារទំនើបៗជាច្រើននៅតាមមន្ទីរពេទ្យនានា។

លោក ខេយ៉ា កាម៉ាតៈ នាយកប្រតិបត្តិ នៃមន្ទីរពេទ្យជប៉ុនសាន់រ៉ាយភ្នំពេញបានប្តេជ្ញាថា មន្ទីរពេទ្យនឹងខិតខំពង្រឹងគុណភាពឱ្យបានកាន់តែល្អប្រសើរដើម្បីចូលរួមលើកកម្ពស់វិស័យសុខាភិបាលនៅស្រុកខ្មែរឱ្យកាន់តែរីកចម្រើនថែមទៀតផង
ដែរ៕

អត្ថបទ៖ សំអឿន