មិនធម្មតា! យុវតីខ្មែរវ័យក្មេងម្នាក់ កំពុងបម្រើការងារជាវិស្វករនៅក្រុមហ៊ុន Tesla នៅអាមេរិក

ជាមោទនភាពរបស់កម្ពុជា ដែលយុវតីវ័យក្មេងរបស់កម្ពុជាមួយរូប កញ្ញា សិដ្ឋ​ ទេពលៈ អាយុត្រឹមតែ ២៣ឆ្នាំ មានសមត្ថភាពបម្រើការងារជាមួយក្រុមហ៊ុន Tesla នៅសហរដ្ឋអាមេរិក ដោយកញ្ញាជានិស្សិតបញ្ចប់ការសិក្សាថ្នាក់អនុបណ្ឌិតកាលពីពេលថ្មីៗជំនាញសំណង់ស៊ីវិលពីសាកលវិទ្យាល័យ Georgia Tech នៅអាមេរិកតែម្តង។

កញ្ញា សិដ្ឋ​ ទេពលៈ បានទៅរស់នៅសហរដ្ឋអាមេរិក និងសិក្សានៅទីនោះតាំងពីឆ្នាំ២០១៥ ដោយកញ្ញាបានសិក្សារហូតដល់ចប់ថ្នាក់អនុបណ្ឌិតនៅអាមេរិក។ បន្ទាប់ពីបញ្ចប់ការសិក្សាថ្នាក់អនុបណ្ឌិត យុវតីឆ្នើមរូបនេះ ក៏ទទួលបានការងារនៅក្រុមហ៊ុនរថយន្តល្បីឈ្មោះ គឺក្រុមហ៊ុន Tesla ដែលជាមោទនភាពមួយរបស់កម្ពុជា។ សាព័ត៌មាន Georgia Tech​ បានផ្សាយថា អំឡុងពេលដែលផ្លាស់ប្តូរទៅរស់នៅអាមេរិកថ្មីៗ យុវតីរូបនេះ ត្រូវប្រឈមបញ្ហាច្រើនណាស់ ទាំងវប្បធម៌ ការរស់នៅ បរិយាកាស និងមនុស្សនៅជុំវិញខ្លួន។ ជាពិសេស នាងមិនដែលគិតថា ខ្លួនជាសិស្សពូកែដូចសិស្សដទៃឡើយ ប៉ុន្តែ កញ្ញានៅតែទទួលបានការគាំទ្រ និងលើកទឹកចិត្តពីក្រុមគ្រួសារ គ្រូ និងមិត្តភក្តិ ដែលអាចធ្វើឱ្យកញ្ញាទទួលបានភាពជោគជ័យបែបនេះ។

បច្ចុប្បន្ន យុវតី សិដ្ឋ ទេពលៈ គឺជាវិស្វករសំណង់ស៊ីវិលសម្រាប់ក្រុមហ៊ុន Tesla នៅរោងចក្រ​ Fremontដែលទើបតែចូលនៅដើមខែកុម្ភៈនេះតែម្តង។ មុននឹងឈានដល់ក្លាយជាបុគ្គលិកនៅទីនោះ កញ្ញាបានហាត់ការងារ ដើម្បីរៀនសូត្រពីការងារផ្សេងៗរបស់ក្រុមហ៊ុន ទើបឈានដល់ការដាក់ពាក្យ និងសម្ភាស ពិនិត្យ តាមដានការងារមុនក្លាយជាបុគ្គលិកពេញសិទ្ធិ។ សម្រាប់ផ្នែកការងារដែលកញ្ញាត្រូវទទួលខុសត្រូវក្នុងក្រុមហ៊ុនឡានមួយនេះ គឺត្រូវមើលថែ និងពិនិត្យប្រព័ន្ធទឹកនៅក្នុងរោងចក្រផលិតឡាននោះ កុំឱ្យមានទឹកភ្លៀង ឬជ្រាបទឹកចូលនៅរោងចក្រ ពោល គឺផ្តោតលើប្រព័ន្ធអាកាសធាតុនៅទីនោះ។

នៅក្នុងបទសម្ភាសជាមួយសារព័ត៌មានក្នុងស្រុកមួយ កញ្ញា បានបង្ហាញពីអារម្មណ៍ថា ពិតជាមានភាពរីករាយយ៉ាងខ្លាំង ដែលមានឱកាសចូលបម្រើការងារក្នុងក្រុមហ៊ុន​ដ៏ល្បីមួយនេះ ហើយក៏ជាមោទភាពមួយសម្រាប់កម្ពុជាដែរ។ នៅពេលនេះ កញ្ញា ផ្តោតសំខាន់ធ្វើការងារនៅអាមេរិកយកបទពិសោធជាមុនសិន ហើយសម្រាប់ថ្ងៃអនាគត កញ្ញា ក៏មានគម្រោងបម្រើការងារនៅកម្ពុជា និងចែករំលែកបទពិសោធ ក៏ដូចជា ណែនាំដល់អ្នកដែលមានចំណង់ចំណូលចិត្តចង់រៀនផ្នែកសំណង់ស៊ីវិលនេះដែរ ប្រសិនជាខ្លួនមានឱកាស។

ក្រៅពីការសិក្សា កញ្ញា សិដ្ឋ ទេពលៈ ចូលចិត្តអានសៀវភៅ ​​ព្រមទាំង ការហ្វឹកហ្វឺនដែលអាចធ្វើឱ្យនាងមានភាពរឹងមាំក្នុងជីវិត ដែលជួយឱ្យនាងអាចពង្រឹងជំនាញផ្សេងៗបាន រួមទាំង​​បង្រៀននាងពីការអត់ធ្មត់ និងរៀបចំផែនការក្នុងជីវិតឱ្យបានល្អ៕

​