ព័ត៌មានជាតិ

ផ្លូវជាតិលេខ ២១ ចម្ងាយជិតជាងគេទៅច្រកព្រំដែនវៀតណាមមានកូនព្រែកជាង ៥០ កន្លែង

បានផុស

២ years មុន

នៅ

ថ្ងៃពុធ ២១ កុម្ភៈ ២០២៤

ដោយ

Dy Bunnara

ផ្លូវជាតិលេខ ២១ ពីទីរួមខេត្តកណ្ដាលទៅកាន់ច្រកទ្វារព្រំដែនជ្រៃធំ ជាផ្លូវជាតិដែលមានចម្ងាយជិតជាងគេទៅព្រំដែនប្រទេសវៀតណាម។

នៅតាមបណ្ដោយផ្លូវជាតិជាច្រកដឹកជញ្ជូនដ៏សំខាន់នេះ មានកូនព្រែកច្រើនជាង ៥០ កន្លែងលើប្រវែងផ្លូវជាង ៦៣ គីឡូម៉ែត្រ។

«ផ្លូវនេះវាពិតជាមានការលំបាកបន្តិច ទៅលើការសាងសង់។ ការចំណាយក៏ច្រើន មូលហេតុនៅត្រង់ថាយើងមានកូនព្រែកច្រើនណាស់នៅតាមដងផ្លូវនេះ»។ នេះបើតាមការថ្លែងបញ្ជាក់របស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជាក្នុងពិធីសម្ពោធផ្លូវជាតិលេខ ២១ កាលពីឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតប្រមុខដឹកនាំកម្ពុជាបានអះអាងថា មានអ្នកខ្លះបានមកលួចខ្សឹបឲ្យលុបកូនព្រែកតូចៗ ដើម្បីជំនួសវិញដោយការចាក់ដី ហើយចំណេញដីធ្លីទៀតផង។ ប៉ុន្តែសម្តេចបានប្រាប់ទៅវិញថា រឿងហ្នឹងវាជាបទពិសោធន៍មួយ ដែលធ្លាប់បានឃើញតាមផ្លូវជាតិលេខ ១។ ផ្លូវជាតិលេខ ១ ត្រង់ចំណុចស្ពានដែលជប៉ុនកសាងពីរកន្លែង ពីដើមជាព្រែក ប៉ុន្តែ ប៉ុល ពត បានបិទ។ ដល់បិទ ទឹកជំនន់ឆ្នាំ ២០០០ ស្ទើរតែលិចទីក្រុងភ្នំពេញ ហើយពេលនោះសម្តេចបានដាក់បទបញ្ជាកាត់ផ្លូវជាតិលេខ ១ ទើបបន្ធូរចរន្តទឹកពីខាងលើចុះមក។

នៅខាងក្រោមតាមបណ្ដោយផ្លូវជាតិលេខ ២១ មានស្ពានកាត់ព្រែកតូច/ធំ រហូតដល់ជាង ៥០ ស្ពាន។ បើតាមសម្តេចតេជោ ត្រូវកសាងស្ពានមិនអាចលុបព្រែកបានទេ ត្បិតព្រែកនាំចូលដីល្បាប់ហ្នឹងម្ខាង ហើយម្ខាងទៀតគឺចរាចរបន្លាស់ទីត្រីនៅពេលដែលមានទឹកឡើង ដែលធ្វើឱ្យកើតមានធនធានត្រីនៅផ្នែកខាងក្រោម និងការស្រោចស្រពទឹកសម្រាប់ដោះស្រាយវិស័យកសិកម្ម។

ផ្លូវជាតិលេខ២១ មានប្រវែងសរុប ៦៣,៦ គីឡូម៉ែត្រ ចាប់ពីរង្វង់មូលតាខ្មៅដល់ច្រកជ្រៃធំព្រំដែនវៀតណាម បានសម្ពោធដាក់ឲ្យប្រើប្រាស់កាលពីឆ្នាំ ២០២២ ក្រោមឥណទានសម្បទានពីរដ្ឋាភិបាលនៃសាធារណរដ្ឋកូរ៉េ។

លោក ស៊ុន ចាន់ថុល អតីតរដ្ឋមន្ត្រីក្រសួងសាធារណការនិងដឹកជញ្ជូន បានលើកឡើងអំពីសារៈសំខាន់នៃផ្លូវមួយខ្សែនេះ បើគិតអំពីចម្ងាយផ្លូវទាំងអស់ដែលតភ្ជាប់ជាមួយសាធារណរដ្ឋសង្គមនិយមវៀតណាម ផ្លូវជាតិលេខ ២១ មានចម្ងាយជិតជាងគេក្នុងការផ្លាស់ប្តូរទំនិញទៅវិញទៅមក។ មិនគ្រាន់តែសម្រួលការដឹកជញ្ជូនទំនិញ ការនាំអគ្គិសនីពីវៀតណាមមកកាន់កម្ពុជាក៏ធ្វើទៅតាមច្រកនេះយ៉ាងច្រើនផងដែរ៕