អាជ្ញាធរខេត្តព្រះវិហារ៖ ពលរដ្ឋដែលសាងសង់ផ្ទះ និងរុករានដីរដ្ឋនឹងត្រូវបណ្តេញចេញ

អាជ្ញាធរខេត្តព្រះវិហារ អះអាងថា ពលរដ្ឋជាង៣០គ្រួសារដែលមកសាងសង់ផ្ទះដោយខុសច្បាប់នៅលើដីកម្មសិទ្ធរបស់រដ្ឋនៅភូមិម្រេច ឃុំស្រយ៉ង់ ស្រុកគូលែន ខេត្តព្រះវិហារ នឹងត្រូវសមត្ថកិច្ចចម្រុះរុះរើខ្ទម និងផ្ទះចេញ។

លោក ណុប វុទ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តព្រះវិហារ បានឲ្យដឹងនៅរសៀលថ្ងៃទី០៧ ខែមីនាឆ្នាំ២០២៤នេះថា អាជ្ញាធរពាក់ព័ន្ធដែលដឹកនាំដោយលោក ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ បានបន្តចុះរុះរើខ្ទម​ និងផ្ទះរបស់ពលរដ្ឋដែលដើរចាប់ដីរដ្ឋនៅភូមិភ្នំម្រេចក្នុងឃុំស្រយ៉ង់ ស្រុកគូលែន ខេត្តព្រះវិហារ។

លោកបន្តថា អាជ្ញាធរខេត្តព្រះវិហារ បានចុះអនុវត្តវិធានការការពារ និងថែរក្សាការពារដីរដ្ឋដែលបានចុះបញ្ជីរួចហើយ ហើយបានធ្វើជាដីសម្បទានសេដ្ឋកិច្ចឲ្យទៅក្រុមហ៊ុនសិលាដាម៉ិច។ លោកបន្ថែមថា ពលរដ្ឋទាំងនោះជាជនអនាធិប​តេយ្យដែលតែងតែដើរចាប់ដីខុសច្បាប់ហើយមិនមែនជាពលរដ្ឋនៅខេត្តព្រះវិហារនេះទេ យើងមានការជូនដំណឹងឲ្យគាត់រុះរើដោយខ្លួនឯង និងមានការផ្សព្វផ្សាយតាមប្រព័ន្ធផ្សព្វផ្សាយនានារួចហើយ។ ដូច្នេះយើងបានធ្វើការងារបែបបទរដ្ឋបាលរួចហើយទើបយើងឈានទៅដល់ការអនុវត្តការពារដីរដ្ឋដើម្បីទុកបន្សល់ឱ្យកូនចៅជំនាន់ក្រោយទៅថ្ងៃអនាគតទៀត។

លោកបញ្ជាក់ថា ការចុះអនុវត្តច្បាប់ទៅលើការសាងសង់ផ្ទះដោយអនាធិបតេយ្យរបស់ពលរដ្ឋដែលមកពីបណ្ដាស្រុកនិងខេត្តផ្សេងៗនោះ អាជ្ញាធរនឹងបន្តចុះរុះរើរហូតអស់ក្រុមដែលមករស់នៅបែបអនាធិបតេយ្យនៅលើដីរដ្ឋតទៅទៀត។

សូមរម្លឹកថា ក្រុមហ៊ុនសម្បទានសេដ្ឋកិច្ចសិលាដាម៉ិច គឺសុំសិទ្ធិពីរាជរដ្ឋាភិបាលដើម្បីដាំកៅស៊ូក្នុងផ្ទៃដី៩០០០ហិចតាតែដោយបច្ចុប្បន្នកាត់ឆ្វៀលអស់នៅសល់ប្រមាណ៦ពាន់ហិចតា។ ក្រុមហ៊ុននេះបានផ្អាកមួយរយៈក៏បន្តមកវិញដោយសុំសិទ្ធិអភិវឌ្ឍន៍ថ្មីទៀត។

ពលរដ្ឋលើកឡើងថា ក្នុងនាមពលរដ្ឋមករស់នៅទីនេះយូរមកហើយ គាត់មិនចង់បានអ្វីនោះទេ គឺគាត់សុំតែដីនឹងផ្ទះរបស់គាត់នៅទីនេះ ដែលធ្លាប់រស់នៅយូរមកហើយ។ ពលរដ្ឋបន្តថា កាលពីថ្ងៃទី៦ ខែមីនា ឆ្នាំ២០២៤ អាជ្ញាធរចម្រុះនៃខេត្តព្រះវិហារ បានបាញ់ និងគប់គ្រាប់បែកផ្សែង ព្រមទាំងចាប់ពលរដ្ឋដាក់ឡានក្រុងអស់ប្រមាណជា៣០នាក់ ដោយអះអាងថា ពួកគាត់សាងសង់ផ្ទះនៅលើដីរដ្ឋដោយគ្មានច្បាប់ទម្លាប់។

សូមបញ្ជាក់ផងដែរថា ករណីអាជ្ញាធរឃាត់ខ្លួនពលរដ្ឋយកទៅសួរនាំនៅស្នាក់ការរដ្ឋបាលព្រៃឈើ ប្រមាណជា៣០នាក់នោះ គឺនឹងរៀបចំសំណុំរឿងដើម្បីចាត់ការទៅតាមផ្លូវច្បាប់៕

អត្ថបទ៖ ជុន កុសល