ព័ត៌មានជាតិ

មន្ត្រីជំនាញក្រសួងអប់រំ កំពុងចុះសិក្សាពីកង្វះខាតអគារសិក្សានៅទូទាំងប្រទេស ដើម្បីឱ្យសិស្សទទួលបានកន្លែងសិក្សាសមរម្យ

បានផុស

២ years មុន

នៅ

ថ្ងៃសៅរ៍ ២៣ មីនា ២០២៤

ដោយ

មន្ត្រីជំនាញ នៃក្រសួងអប់រំ យុវជន និងកីឡា បាននិងកំពុងចុះសិក្សាស្រាវជ្រាវពីកង្វះខាតអគារសិក្សានៅទូទាំងប្រទេស ដើម្បីឱ្យសិស្សានុសិស្សទទួលបានកន្លែងសិក្សាបានសមរម្យ ខណៈបច្ចុប្បន្នបរិមាណសិស្សហាក់មានការកើនឡើង។

លោកបណ្ឌិត កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅថ្ងៃទី ២៣ មីនា នេះថា «ការសិក្សាការខ្វះខាតអគារសិក្សានេះ គឺធ្វើទាំងបឋមសិក្សា មត្តេយ្យ មធ្យមសិក្សា ហើយការដោះស្រាយត្រូវវិភាគតាមរយៈចរន្តសិស្ស កំណើនប្រជាជន ការកំណត់ទីតាំងសាងសង់ ហើយរហូតមកដល់ពេលនេះ យើងមិនបញ្ចប់ការសិក្សានៅឡើយ នៅបន្តមួយចំនួនទៀត ដើម្បីទទួលព័ត៌មានគ្រប់ជ្រុងជ្រោយ»។

លោកបណ្ឌិត កាន់ ពុទ្ធី បានបន្តទៀតថា ការសង់សាលាបន្ថែមនេះ ផ្តោតទៅលើសាលាណាជួបការលំបាក ពិសេសនៅតាមបណ្តាខេត្តផ្សេងៗ និងសាលាដែលមានរោងដោលយកធ្វើជាថ្នាក់រៀនដូចជាខេត្តនៅភាគឦសានដូចជា ព្រះវិហារ ស្ទឹងត្រែង រតនគីរី ឧត្តរមានជ័យ និងមណ្ឌលគីរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះសិក្សាស្រាវជ្រាវកង្វះខាតអគារសិក្សានៅទូទាំងប្រទេសនេះ បន្ទាប់ពីថ្មីៗនេះ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានណែនាំឱ្យពិនិត្យ និងរៀបចំឡើងវិញ នូវផែនការសកម្មភាពអាទិភាពការងារសាងសង់ និងនិយាមគ្រូបង្រៀន ការរៀបចំឱ្យមានប្រព័ន្ធប្រមូលទិន្នន័យចំនួនគ្រូបង្រៀន ចំនួនសិស្ស ចំនួនបន្ទប់ និងថ្នាក់រៀន នៅតាមសាលារៀន។

លោកបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍មួយចំនួន ដើម្បីបង្កើនប្រសិទ្ធភាព និងប្រសិទ្ធផលការងារ ដូចជា ៖ ត្រូវដោះស្រាយបញ្ហាប្រឈមជាកញ្ចប់ ដោយបង្កើតជាប្រព័ន្ធតាមដានច្បាស់លាស់ ចុះពិនិត្យផ្ទាល់ ដើម្បីប្រមូលទិន្នន័យ និងវាយតម្លៃ ផ្អែកលើភាពជាក់ស្ដែង,ពិនិត្យមើលឡើងវិញនូវការងារគ្រប់គ្រងបុគ្គលិក និងគ្រូបង្រៀន,នាយដ្ឋានផែនការ ត្រូវបន្តចុះពិនិត្យផ្ទាល់តាមសាលា ដើម្បីប្រមូលទិន្នន័យចំនួនសិស្សបន្ទប់រៀន ថ្នាក់រៀន និងចំនួនសិស្សក្នុងមួយថ្នាក់ ដើម្បីធានាបាននូវគុណភាពក្នុងការរៀន និងបង្រៀន រួចរៀបចំប្រជុំដាក់ផែនការ និងត្រូវប្រជុំជាប្រចាំ ដើម្បីតាមដានវឌ្ឍនភាព និងកំណត់ការងារអាទិភាព៕

អត្ថបទ ៖ សំអឿន