ចូលដល់រដូវវស្សា អង្គការយូនីសេហ្វណែនាំអាណាព្យាបាលពីវិធីមួយចំនួនការពារកូនពីជំងឺគ្រុនឈាម

នៅក្នុងរដូវវស្សា មានភ្លៀងធ្លាក់ច្រើន ធ្វើឱ្យកើតមានមូសខ្លាច្រើនដូចគ្នា ជាហេតុធ្វើឱ្យកើតមានជំងឺគ្រុនឈាមលើមនុស្សពេញវ័យ និងកុមារ។ ហេតុនេះហើយ អង្គការយូនីសេហ្វកម្ពុជា បានផ្សព្វផ្សាយវិធីសាស្ត្រមួយចំនួនសម្រាប់អាណាព្យាបាល ក្នុងការការពារកូនៗពីជំងឺគ្រុនឈាម។

បើតាមអង្គការយូនីសេហ្វកម្ពុជា បានឱ្យនិយមន័យថា គ្រុនឈាម គឺជាជំងឺមួយប្រភេទដែលបង្កឡើងដោយមូសខ្លាញីខាំ ហើយវាក៏អាចមានគ្រោះថ្នាក់ដល់ជីវិតដែរ ជាពីសេសគឺកុមារតែម្តងប្រសិនជាមិនទទួលការព្យាបាលទាន់ពេលវេលាទេនោះ។ ប្រភពដដែលក៏បានបញ្ជាក់ដែលថា មាតាបិតា ត្រូវតែប្រញាប់យកកូនទៅពេទ្យជាបន្ទាន់ ប្រសិនជាឃើញរោគសញ្ញាដូចជា ក្តៅខ្លួនខ្លាំង ក្អួតចង្អោរ ឈឺសាច់ដុំ អស់កម្លាំង ឈឺក្នុងពោះ ហូរឈាមតាមអញ្ចាញធ្មេញ ឬ ច្រមុះ បន្ទោរបង់មានឈាម កន្ទួលលើស្បែក និងក្តៅខ្លួនខ្លាំងជាដើម។

បន្ថែមពីនេះ ក្រៅពីរោគសញ្ញា យូនីសេហ្វ ក៏បានណែនាំឱ្យអាណាព្យាបាលចេះពីវិធីការពារមួយចំនួន ដើម្បីកុំឱ្យមូសខាំ ដូចជា៖ ប្រើថ្នាំលាប ឬ ថ្នាំបាញ់មូស ដោយអានការណែនាំមុននឹងប្រើ ចៀសវាងមានផលប៉ះពាល់នានា។ គេងក្នុងមុងឱ្យបានត្រឹមត្រូវ, ស្លៀកសម្លៀកបំពាក់ណាដែលវែងៗ និងជិតខ្លួន ព្រមទាំងពលុបបំបាត់កន្លែងដក់ទឹក និងជម្រកមូស កុំឱ្យមូសកាន់តែកើតឡើងមក។

សូមជម្រាបថា រោគសញ្ញាខាងលើមិនត្រឹមតែកើតចំពោះកុមារទេ សូម្បីតែមនុស្សពេញវ័យដែលកើតជំងឺគ្រុនឈាម ក៏មានរោគសញ្ញាបែបនេះដែរ ដូច្នេះ ជំងឺនេះមិនអាចធ្វេសប្រហែសបានឡើយ ត្រូវប្រញាប់ទៅមន្ទីរពេទ្យ ប្រសិនជាលោកអ្នកមានអាការៈបែបនេះ៕