អភិបាលខេត្តឧត្តរមានជ័យ ប្ដេជ្ញាពង្រឹងជីវភាពពលរដ្ឋក្នុងខេត្ត ខណៈស្ថិតិបង្ហាញថា ពលរដ្ឋខេត្តនេះមានចំណូលទាបជាងគេ

អភិបាលខេត្តឧត្តរមានជ័យ លោក មាន ចាន់យ៉ាដា ប្រកាសប្ដេជ្ញាចិត្ត និងព្យាយាមឱ្យអស់លទ្ធភាពដើម្បីដោះស្រាយរាល់បញ្ហាប្រឈម និងតម្រូវការរបស់ប្រជាពលរដ្ឋ ជាពិសេសការពង្រឹងជីវភាពប្រជាពលរដ្ឋក្នុងខេត្តឱ្យកាន់តែមានភាពរីកចម្រើន។  

លោកអភិបាលខេត្តឧត្តរមានជ័យថ្មីរូបនេះ បានប្តេជ្ញាចិត្តយ៉ាងមុតមាំអនុវត្តតាមរដ្ឋធម្មនុញ្ញ គោលការណ៍ណែនាំរបស់រាជរដ្ឋាភិបាល ពិសេសយុទ្ធសាស្ត្របញ្ចកោណដំណាក់កាលទី១ និងគោលនយោបាយអាទិភាពទាំង៦ របស់រាជរដ្ឋាភិបាល និងជាពិសេសប្តេជ្ញាគាំទ្រ និងព្យាយាមពង្រឹងជីវភាពប្រជាពលរដ្ឋក្នុងខេត្តទាំងមូលឱ្យកាន់តែមានភាពរីកចម្រើនតទៅមុខបន្ថែមទៀត។

ការប្ដេជ្ញាធ្វើឱ្យជីវភាពប្រជាពលរដ្ឋក្នុងខេត្តកាន់តែរីកចម្រើនពេលនេះ ស្របពេលដែលខេត្ត​ស្ថិត​នៅ​ទិស​ឧត្តរ​ជាប់​ព្រំដែន​ថៃមួយនេះ ត្រូវបានបង្ហាញថា គឺជា​ខេត្ត​ដែល​មានកម្រិត​ប្រាក់​ចំណូល​សម្រាប់​​ពលរដ្ឋ​ម្នាក់ៗ​ទាប​ជាង​គេនៅ​ក្នុង​ចំណោម ២៥រាជធានី​ខេត្តរបស់កម្ពុជា។ បើយោងតាមរបាយការណ៍​របស់​​វិទ្យាស្ថានជាតិស្ថិតិ នៃ​​ក្រសួង​ផែនការ​ គឺប្រាក់​ចំណូល​សម្រាប់​មនុស្សម្នាក់ (GDP Per Capita) ​ក្នុង​ខេត្ត​ឧត្តរមានជ័យ​មាន​ត្រឹម ១ពាន់ដុល្លារ​អាមេរិក ខណៈពលរដ្ឋក្នុងខេត្តព្រះសីហនុ មានប្រាក់ចំណូលខ្ពស់ជាង​គេ គឺ៤ ៦០២ដុល្លារ។

តែយ៉ាងណាមិញ របាយការណ៍​បង្ហាញពីចំណូលពលរដ្ឋ​ម្នាក់ៗតាម​បណ្តារាជធានី​ខេត្តនេះ​ គឺ​​​​គិត​ត្រឹម​ឆ្នាំ២០២២ ខណៈ​​ឆ្នាំ២០២៣ ក្រសួង​ផែនការ​ មិន​ទាន់​បញ្ចេញ​របាយការណ៍​ផ្លូវការ​នៅ​ឡើយ ដែលទិន្នន័យ​ប្រាក់ចំណូលសម្រាប់​ពលរដ្ឋម្នាក់ៗអាច​មាន​ការ​ប្រែប្រួល ​អាស្រ័យ​តាមកំណើន ​​ឬការ​ថយចុះនៃសេដ្ឋកិច្ចរបស់រាជធានី​ខេត្តនីមួយៗ។

នៅក្នុងពិធីប្រកាសចូលកាន់មុខតំណែងជាអភិបាលខេត្តឧត្តរមានជ័យ ក្រោមអធិបតីភាពលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី៨ ខែកក្កដា ឆ្នាំ២០២៤ លោក មាន ចាន់យ៉ាដា ក៏បានប្ដេជ្ញាចិត្តថែរក្សាស្មារតីសាមគ្គីភាព ឯកភាពផ្ទៃក្នុងជួរគណៈអភិបាល មន្ត្រីរាជការ ក្រុមប្រឹក្សា រួមទាំងក្រសួងស្ថាប័ន មន្ទីរ-អង្គភាពពាក់ព័ន្ធ ឱ្យមានរបៀបរៀបរយ អនុវត្តការងារមានភាពរលូន និងប្រកបដោយប្រសិទ្ធភាព ខិតខំជំរុញអនុវត្តគោលនយោបាយ ភូមិ ឃុំ សង្កាត់មានសុវត្ថិភាពឱ្យកាន់តែមានប្រសិទ្ធភាព និងប្រសិទ្ធផលខ្ពស់ ខិតខំលើកកម្ពស់ការថែរក្សា ការពារបូរណភាពទឹកដីអធិបតេយ្យភាពជាតិ និងបង្កើនការរក្សាសន្តិសុខសណ្តាប់ធ្នាប់តាមបន្ទាត់ព្រំដែន ព្រមទាំងបន្តពង្រឹងពង្រីកទំនាក់ទំនងកិច្ចសហប្រតិបត្តិការល្អផងដែរ។

គួរបញ្ជាក់ថា លោក មាន ចាន់យ៉ាដា ឋានន្តរស័ក្តិឧត្តមមន្ត្រី ថ្នាក់លេខ១ អតីតអភិបាលរងរាជធានីភ្នំពេញ ត្រូវបានតែងតាំងជាអភិបាលខេត្តឧត្តរមានជ័យ ជំនួសលោក ប៉ែន កុសល្យ ដែលត្រូវបានផ្ទេរ និងតែងតាំងជាអភិបាលខេត្តត្បូងឃ្មុំ៕

ដោយ៖ ធឿន វ៉ាន់សុង